¹ Niyan, kung parti sa aton nga nagatuo, ang aton halimbawà hay pareho sa mga nagadyagan sa palumbaan nga ginapalibutan ng madamò nga mga tawo nga imaw ang mga nagpamatuod ng inda pagtuo sa Dios. Nganì bayaan na naton ang mga salà nga nagapugong sa aton, ang tanan nga butang nga nagapabug-at sa aton pagdyagan. Magpadayon gid kita sa pagdyagan nga may pagtiis nga yarà sa aton atubangan hasta sa katapusan. ² Isentro naton ang aton panirò kay Hesus nga imaw ang nauna bilang pinunò kag nagtapos sa pagdyagan ng pagtuo. Ging-antos niya ang paglangsang sa krus kag gingbaliwayà niya ini nga kahuy-anan, kay ginghunahunà niya ang kalipay nga nagahuyat para sa iya. Kag niyan yadto na siya nagapungkò sa tuo hampig ng trono ng Dios.

³ Hunahunaon nindo ning maayo kung pauno ging-antos ni Hesus ang mga pagkuntra sa iya ng mga makasasalà nga tawo, agud indì magluya ang indo tagipusuon kag indì maduyà ang indo pagporsige.

⁴ Ang matuod, wayà pa da ning may gingpatay sa indo tungod sa indo paglaban sa pagkuntra ng mga makasasalà nga tawo. ⁵ Ano, nalimutan na ba nindo ang laygay ng Dios sa indo bilang iya mga ongà? Nakasulat sa Kasulatan,

⁷ Nganì tiison nindo ang mga pagdisiplina nga nagaabot sa indo, kay ginakabig kamo ng Dios nga iya mga ongà. Sin-o ang ongà nga wayà ginadisiplina ng iya tatay? ⁸ Kung wayà kamo ginadisiplina ng Dios pareho ng naagihan ng tanan nga iya ongà, bukon niya kamo matuod nga mga ongà. ⁹ Dì ba gingdisiplina kita ng aton lawasnon nga mga tatay, kag tungod diri ginatahod naton sinda? Mas labi pa gid nga magpasakop kita sa pagdisiplina ng aton espirituhanon nga Tatay, agud magakabuhì kita hasta san-o. ¹⁰ Ang aton mga tatay diri sa dutà hay gingdisiplina kita sa matag-od nga tiyempo sunò sa inda ginaisip nga makakaayo sa aton. Pero ang Dios hay nagadisiplina para sa aton gid kaayuhan, agud makaparte kita sa iya banal nga kinaugalì. ¹¹ Mintras ginadisiplina kita niyan, wayà kita nalilipay kundì nagakalisod. Pero sa ulihi, magabunga ini nga pagdisiplina ning katawhayan, kay nasanay na kita paagi diri, magaresulta ini ning matarong sa aton kabuhì.

¹² Nganì pakusuga ang indo maluya nga lawas kag tipuna ang nabibilin nindo nga kusog. ¹³ Magpanaw kamo sa tadlong nga dayan agud indì kamo mapakì, kundì mag-ayo ang siki nga napakì.

¹⁴ Tinguhaa nga maging maayo ang indo relasyon sa tanan nga tawo, kag tinguhaa da nga maging matarong ang indo pagkabuhì. Kay kung bukon matarong ang indo pagkabuhì, indì nindo makità ang Ginoo. ¹⁵ Maging alerto kamo kay basì kung may igwa sa indo magapalayò sa grasya ng Dios, kag basì kung may igwa sa indo magpanggulo pareho ng isa ka sirà nga prutas sa basket nga nagatapon sa iban, kag madamò ang nasisirà. ¹⁶ Maging alerto da kamo nga wayà ning abir isa sa indo ang maghuman ning imoral kag magbaliwayà ng mga butang nga espirituhanon pareho ni Esau. Kay gingbaligyà niya ang iya karapatan bilang panganay para sa isa lang ka pagkaon. ¹⁷ Nasayuran da nindo nga nang ulihi gusto niya nga mabaton ang bendisyon para sa pagiging panganay pero wayà siya pagtaw-i, abir nag-uwang pa siya. Kay wayà gid ning paagi nga maghinuysoy siya sa iya ginghuman.

¹⁸ Ang indo pagpalapit sa Dios bukon pareho ng pagpalapit ng mga Israelita. Nagpalapit sinda sa Bukid ng Sinai nga nakikità ninda, kag ini hay bukid nga nagadayab, may makahiyadlok nga kaduyom, kag may makusog nga hangin. ¹⁹ May nabatian sinda nga tunog ng budyong kag may nagahambay pa. Kag pagkabatì ninda ng adto nga bosis, nagpakitluoy sinda nga kung puydi indì na siya maghambay sa inda. ²⁰ Kay hinadlukan gid sinda sa iya gingsiling, “Ang bisan sin-o, abir hayop nga magpalapit sa bukid dapat nga buguyon hasta mapatay.”^{b 21} Makahiyadlok gid ang inda nakità didto kag abir nganì si Moises naghambay, “Nagapangurog ako sa kahadlok.”^c

²² Pero nagpalapit kita sa Bukid ng Sion, sa siyudad ng Dios nga buhì, sa langitnon nga Jerusalem, sa malipayon nga punsyon nga may mga anghel nga indì mabilang. ²³ Nagpalapit kita sa pagtipon-tipon ng mga ginakabig nga panganay nga mga ongà ng Dios, nga ang inda mga pangayan hay nakasulat na didto sa kalangitan. Nagpalapit kita sa Dios ng tanan nga imaw ang hukom, kag sa mga espiritu ng mga tawo nga gingpakamatarong ng Dios kag wayà na gid ning salà. ²⁴ Nagpalapit kita kay Hesus nga imaw ang miyugpatungà ng bag-o nga kasugtanan. Ang iya dugò nga gingwisik hay nagapamatuod nga gingpatawad na kita sa aton mga salà, kag mas maayo pa ini kaysa sa dugò ni Abel nga nagapakitluoy ning bayos.^d

²⁵ Nganì mag-andam kamo kag indì magpabungoy sa ginahambay ng Dios sa indo. Ang mga tawo nang una nga nagpabungoy sa paandam ng Dios sa inda diri sa dutà hay wayà makalikaw sa parusa. Nganì pauno kita makalikaw sa parusa kung ipasuyod kag ipalapos naton sa talinga ang paandam nga halin sa kalangitan? ²⁶ Tungod sa bosis ng Dios, naghuyag nang una ang dutà. Pero nagpangakò siya niyan, nga huyagon pa gid niya ning kaisa pa, bukon lang ang dutà kundì patì na ang langit.^{e 27} Ang hambay nga “kaisa pa” hay klaro nga ginapakità nga duyaon na niya ang tanan nga puydi mahuyag nga ginghuman, kag ang indì mahuyag imaw ang mabibilin.

²⁸ Nganì permi kita magpasalamat sa Dios kay nababaton na naton ang iya gingharian nga indì mahuyag. Magsamba kita sa iya sa paagi nga iya nagustuhan, nga may pagtahod kag kahadlok. ²⁹ Kay kung magparusa ang aton Dios hay daw sa kalayo nga nagapang-upos.