¹ Magpadayon kamo sa paghinigugmaanan bilang mga kauturan ni Kristo. ² Ayaw kamo malimot sa pagbaton ng mga taga-iban nga lugar sa indo bayay. Kay paagi diri, may pila ka mga tawo nga wayà nakakasayod nga nakakapadayon galì sinda ning mga anghel. ³ Dumduma nindo ang mga nakakulong, nga daw kamo hay nakakulong da nga kaibahan ninda. Imaw da ang mga ginapasakitan nga daw sa indo da ini lawas ginahuman.

⁴ Dapat gid respetuhon ang pag-asawa ng kada isa kag maging matutom gid sa isa kag isa ang mag-asawa. Kay husgahan ng Dios ang mga tawo nga naga-iba nga wayà makasay kag nagapangawatan.

⁵ Likawi nindo ang paghigugmà sa kuwarta. Makuntinto kamo sa mga butang nga igwa kamo, kay naghambay ang Dios,

⁷ Dumduma permi nindo ang mga nagadumaya sa indo nga nagtudlò sa indo ng hambay ng Dios. Hunàhunaa nindo ning maayo ang bunga ng inda pagkabuhì. Patuyari nindo ang inda pagtuo. ⁸ Si Hesu-Kristo hay wayà gid nagabag-o nang una kag niyan, kag imaw da siya sa wayà katapusan. ⁹ Ayaw kamo magpadaya-daya sa iba-iba nga mga pagpanudlò kag iba kaysa sa kamatuuran nga indo nabaton. Maayo nga mapalig-on ang aton kaugalingon paagi sa grasya ng Dios, kag bukon sa pagsunod sa mga layi parti sa mga pagkaon. Wayà gid ning puyos ang pagsunod ng mga tawo sa inà nga mga layi. ¹⁰ Kita nga mga nagatuo hay may altar, kag wayà otoridad nga magkaon sa aton altar ang mga Judio nga nagahalad sa inda sambahan.

¹¹ Kay sunò sa Kasuguan, ang dugò ng mga hayop nga halad sa pagpakalimpyo sa salà ng mga tawo hay ginadaya ng pinakapunò ng mga parì didto sa Pinakabanal nga Lugar, pero ang lawas ng adto nga mga hayop hay ginadaya sa luwas ng kampo kag didto ginasunog. ¹² Kag pareho da diri ang natabò kay Hesus kay didto da siya namatay sa luwas ng banwa, agud paagi sa iya dugò limpyuhon niya ang mga salà ng tawo. ¹³ Nganì magkadto kita kay Hesus sa luwas ng kampo kag didto maagihan da naton ang naagihan niya nga kahuy-anan. ¹⁴ Kay wayà ning permamenti nga siyudad diri sa kalibutan nga para sa aton nga mga nagatuo, kundì nagahuyat kita ning permamenti nga siyudad sa paabuton. ¹⁵ Nganì maghalad kita permi ning pagdayaw sa Dios paagi kay Hesus. Imaw ini ang bunga nga nagahalin sa aton mga bibig nga nagadiklara nga ang Dios ang Ginoo. ¹⁶ Ayaw kamo malimot nga maghuman ning maayo kag magbinuligan sa isa kag isa, kay imaw ini ang mga halad nga nagatao ning kalipay sa Dios.

¹⁷ Tumana nindo ang mga nagadumaya sa indo kag magpasakop kamo sa inda mga ginasugò, kay nagapadayon sinda sa pag-asikaso ng indo espirituhanon nga kabuhì. Pag maabot ang adlaw, manabat sinda sa Dios parti sa inda pagdipara sa indo. Kung tumanon nindo sinda, magaserbisyo sinda nga may kalipay; pero kung indì, magakalisod sinda kag indì ini mapuslan nindo.

¹⁸ Ipangamuyò nindo kami permi kay sigurado kami nga malimpyo ang amon konsinsya kag nagatinguhà gid kami nga maghuman ning tamà sa tanan nga butang. ¹⁹ Labi na gid nga ginapangabay ko nga ipangamuyò nindo sa Dios nga pabalikon ako dirà sa indo nga daan.

²⁰ Ang Dios ang nagatao sa indo ng katawhayan. Siya ang nagbuhì halin sa kamatayon ng aton Ginoong Hesus, nga imaw ang wayà ning kapareho nga Miyugbantay sa aton bilang iya mga karnero. Kag tungod sa iya dugò gingpamatuuran niya ang kasugtanan nga wayà katapusan. ²¹ Kabay nga itao niya sa indo ang tanan nga maayo nga butang nga kahinangyanon nindo, agud mahuhuman nindo ang iya kabubut-on. Kag kabay nga paagi kay Hesu-Kristo, humanon niya sa aton kabuhì ang nakakapalipay sa iya. Sa Dios ihalad naton ang paghimayà abir san-o. Kabay pa!

²² Mga kauturan kay Kristo, nagapangabay ako nga pamatian nindo ning maayo ang akon laygay, kay matag-od lang da ini nga sulat ko sa indo. ²³ Gusto ko masayuran nindo nga ang aton utod nga si Timoteo hay gingpaluwas na sa prisuhan. Kung mag-abot siya nga daan, makarà ako dirà sa indo kaibahan niya.

²⁴ Kamusta na lang sa tanan nga mga nagadumaya sa indo dirà kag sa tanan nga banal nga tawo ng Dios. Nagapangamusta da sa indo ang aton mga kauturan nga taga-Italia.

²⁵ Kabay pa nga pakamaayuhon kamo tanan ng Dios.