¹ Pagkatapos adto, gingpakità sa akon ng anghel ang subà nga ang iya tubì hay nagatao ning kabuhì nga wayà katapusan. Ang tubì hay matin-aw pareho ng kristal, kag nagahalin ini sa trono ng Dios kag ng Karnero, ² kag nagabahà sa tungà ng karsada ng siyudad. Sa kada luyo ng subà hay may punò ng kahoy nga nagatao ning kabuhì. Nagabunga ini ning isa ka klasi^a kada bulan, 12 ka klasi sa isa ka tuig. Ang mga dahon ng kahoy hay buyong sa sakit ng mga tawo.

³ Wayà na ning makikità sa siyudad nga abir ano nga mga gingsumpà ng Dios, kay yadto didto ang trono ng Dios kag ng Karnero. Ang mga ulipon ng Dios hay magaserbisyo sa iya. ⁴ Makikità ninda ang iya hitsura kag ang iya pangayan hay isusulat sa inda mga agtang. ⁵ Wayà na ning gab-i didto, nganì indì na sinda magkahinangyan pa ning iwag o ng hayag ng adlaw. Kay ang Ginoo nga Dios imaw ang magaiwag sa inda. Kag sinda hay magaharì hasta sa wayà katapusan.

⁶ Pagkatapos naghambay ang anghel sa akon, “Ini nga mga hambay hay matuod kag masaligan. Ang Ginoo nga Dios nga nagtao ng iya Espiritu sa mga miyugbalità ng mensahe ng Dios, ang nagsugò sa iya anghel agud ipasayod sa iya mga miyugserbisyo kung ano ang mga butang ang madalì na lang nga matabò.”

⁷ “Pamatì kamo!” Hambay ni Hesus. “ Madalì na ako maabot! Malipayon ang mga nagatuman sa mga mensahe nga gingpropesiya sa ini nga libro!”

⁸ Ako si Juan, ang nakabatì kag nakakità ini nga mga butang. Nang akon ini mabatian kag makità, nagluhod ako para sambahon ang anghel nga nagpakità sa akon ini nga mga butang. ⁹ Pero naghambay siya sa akon, “Ayaw inà paghumana! Ako hay miyugserbisyo da ng Dios pareho mo, ng imo mga kauturan nga mga miyugbalità ng mensahe ng Dios kag ng tanan nga nagatuman ng mga hambay sa ini nga libro. Ang Dios lang gid ang dapat mo nga sambahon!”

¹⁰ Kag ginghambay pa niya sa akon, “Ayaw pagtagua ang mga mensahe nga gingpasayod nga yari diri sa ini nga libro kay madalì na lang gid ini tanan matabò. ¹¹ Ang mga tawo nga malain hay magapadayon sa pagpakasalà, kag ang nagahuman ning imoralidad hay magapadayon sa paghuman ning mahigkò. Ang matarong hay magapadayon sa paghuman ning tamà, kag ang banal, hay magapalayò sa malain.

¹² “Pamatì kamo!” Hambay ni Hesus. “Madalì na ako mag-abot! Daya ko ang premyo ng kada isa sunò sa iya mga ginghuman! ¹³ Ako ang Alpha kag Omega,^b ang Pang-una kag ang Pang-ulihi, ako ang gingtunaan ng tanan kag akon tapuson ang tanan.”

¹⁴ Malipayon ang mga nagalaba ng inda mga barò^c agud tugutan sinda nga makasuyod sa mga puwertahan ng siyudad kag makakaon ning bunga ng kahoy nga nagatao ning kabuhì. ¹⁵ Pero mabibilin sa luwas ng siyudad ang mga nagahuman ning malain pareho sa ayam^d, sa mga miyugpangbarang^e, sa mga nagahuman ning imoral nga pakipag-relasyon, sa mga nagapangpatay, sa mga nagasamba sa mga dios-diosan, kag sa mga mahilig magbinakak.

¹⁶ “Ako si Hesus ang nagsugò sa akon anghel agud ipasayod sa indo ini nga mga butang para sa mga nagatuo sa iba-iba nga mga lugar. Ako hay ginghalinan kag inapo ni David nga Harì, ako ang mahayag nga bituon sa kaagahon.”

¹⁷ Nagahambay ang Espiritu Santo kag ang babayi nga kiyasayon, “Kari!” Kag ang abir sin-o nga nakakabatì ini hay maghambay da, “Kari!”

Magpalapit ang abir sin-o nga ginauhaw, magbuoy ang abir sin-o nga gusto ng tubì nga nagatao ning kabuhì nga wayà katapusan. Ini hay wayà ning bayad.

¹⁸ Ako mismo hay nagapaandam gid sa abir sin-o nga nakakapamatì sa mga mensahe sa ini nga libro. Ang bisan sin-o nga magdugang sa mga mensahe sa ini nga libro hay idugang da ng Dios sa iya ang mga salot nga nakasulat sa ini nga libro. ¹⁹ Kag ang bisan sin-o nga mag-iban ng abir ano sa mga mensahe sa ini nga libro hay ibanan da sa iya ng Dios ang iya parsyudad te sa bunga ng kahoy nga nagatao ning kabuhì. Kag indì da siya pasudlon sa banal nga siyudad, nga nakasulat sa ini nga libro.

²⁰ Si Hesus mismo ang nagapamatuod sa tanan nga nakasulat diri. Hambay niya, “Huo, madalì na ako mag-abot!”

Hambay ko, “Kabay pa! Kari na, Hesus nga Ginoo!”

²¹ Kabay pa nga ang grasya ni Hesus nga aton Ginoo hay mabaton nindo tanan. Kabay pa!