¹ Pagkatapos adto, nakità ko ang bag-o nga langit kag ang bag-o nga dutà kay wayà na ang dati nga langit kag dutà, wayà na da ang dagat. ² Kag nakità ko ang banal nga siyudad, ang bag-o nga Jerusalem, nga nagababà sa langit halin sa Dios nga preparado pareho ng kiyasayon nga babayi nga nagpagwapa na para sugaton ang iya mapapangasawa.

³ Pagkatapos nabatian ko ang makusog nga bosis halin sa trono nga nagahambay, “Tan-awa! Niyan ang ginaistaran ng Dios hay sa mga tawo na! Magatinir ang Dios sa inda. Sinda hay maging iya mga tawo, kag ang Dios mismo hay makaibahan ninda kag kilayahon ninda siya nga inda Dios. ⁴ Pagapahiron ng Dios ang kada luha sa inda mga mata. Ang mga tawo hay indì na mamamatay kag wayà na ning kalisod, pagtangis o kasakit kay ang dati nga mga bagay hay nagligad na.”

⁵ Pagkatapos ang nagapungkò sa trono naghambay, “Tan-awa! Ginabag-o ko ang tanan nga mga bagay.” Kag hambay pa gid niya, “Isulat mo kay ini nga mga hambay hay matuod kag masaligan.” ⁶ Naghambay pa gid siya sa akon, “Ang tanan nga butang hay natapos na! Ako ang Pang-una kag ang Pang-ulihi,^a ang gusto hambayon, ako ang gingtunaan ng tanan kag akon tapuson ang tanan. Ang mga ginauhaw hay akon painumon nga wayà ning bayad sa tubì nga halin sa tuburan nga nagatao ning kabuhì nga wayà katapusan. ⁷ Ang sin-o man nga magdaog kuntra sa malain, makabaton siya ning panublion. Kag ako ang maging Dios niya, kag siya naman ang maging ongà ko. ⁸ Pero makaluluoy ang pagadangatan ng mga tawo nga matayaw, ng mga wayà nagpadayon sa inda pagtuo kay Hesus, ng mga nagahuman ning malaw-ay nga mga butang, ng mga miyugpangpatay, ng mga nagahuman ning imoral nga pakipag-relasyon, ng mga miyugpangbarang^b, ng mga nagasamba sa dios-diosan kag ng tanan nga pusong. Ang lugar nga dapat sa inda hay sa kalapad-lapad nga nagadabadaba ang kalayo nga may asupre, nga imaw ang ikaduha nga kamatayon.”

⁹ Ang isa sa pito nga anghel nga may pito nga hambawan nga punò ning pito nga katapusan nga mga salot hay nagpalapit kag naghambay sa akon, “Kari diri, kay ipakità ko sa imo ang kiyasayon nga babayi, nga imaw ang mapapangasawa ng Karnero.”

¹⁰ Pagkatapos ang Espiritu ng Dios hay nag-abot sa akon, kag gingdaya ako sa ibabaw ng kabahoy-bahoy kag kataas-taas nga bukid. Gingpakità niya sa akon ang Jerusalem, ang banal nga siyudad nga nagababà sa langit halin sa Dios. ¹¹ Kahayag-hayag gid ini tungod sa himayà ng Dios. Nagakintab pareho ng kamahay-mahay nga mga bato, daw bato nga haspe nga makintab pareho ng kristal. ¹² Igwa ning katibay-tibay kag mataas nga pader kag may 12 nga puwertahan. Ang kada isa hay may bantay nga anghel. Kag nakasulat sa mga puwertahan ang mga pangayan ng 12 nga tribo ng Israel. ¹³ May tuyo nga puwertahan sa kada kilid: tuyo sa Esti, tuyo sa Norte, tuyo sa Sur kag tuyo sa Westi. ¹⁴ Ang pader ng siyudad hay may pundasyon nga 12 nga bato kag nakasulat diri ang pangayan ng 12 nga mga apostol ng Karnero.

¹⁵ Ang anghel nga nagahambay sa akon hay may daya nga bulawan nga pangsukoy agud sukuyon ang siyudad, ang mga puwertahan, kag ang pader. ¹⁶ Ang siyudad hay kuwadrado, pareho ang kahabà kag kalapad. Gingsukoy ng anghel ang siyudad, kag ang kahabà hay bali 12,000 ka istadia,^c imaw da ang kalapad kag ang kataas. ¹⁷ Gingsukoy da ng anghel ang pader, bali 144 ka pechus,^d sunò sa pangsukoy nga ginamit ng tawo, nga ginamit da ng anghel.

¹⁸ Bato nga haspe ang pader. Ang siyudad hay himò sa puro nga bulawan, kag makintab nga pareho ng kristal. ¹⁹ Nadikurasyonan ng tanan nga klasi ng kamahay-mahay nga mga bato ang pundasyon ng pader. Ang una hay haspe, ang ikaduha sapiro, ang ikatuyo kalsedoniya, ang ikaupat esmeralda. ²⁰ Ang ikalima onise, ang ikaunom kornalina, ang ikapito krisolito, ang ikawayo berilo, ang ikasiyam topasyo, ang ikanapuyò krisopraso, ang ikaonsi hasinto kag ang ikadose hay amatista.

²¹ Ang 12 nga puwertahan hay perlas, ang karsada ng siyudad hay himò sa puro nga bulawan nga makintab pareho ng kristal.

²² Wayà ako ning makità nga templo sa siyudad kay ang Ginoo nga Dios, ang makagagahom sa tanan kag ang Karnero imaw ang templo. ²³ Ang siyudad hay indì na kahinangyan ning adlaw o bulan agud nga mahayagan ini, kay ang himayà ng Dios ang nagatao ning kahayag didto kag ang iwagan hay imaw ang Karnero. ²⁴ Ang tanan nga tawo hay magakabuhì paagi sa kahayag ng siyudad kag ang mga harì sa dutà hay magatao ng inda mga manggad sa iya. ²⁵ Ang mga puwertahan ng siyudad hay wayà na ginasarahi kay wayà na ning gab-i didto. ²⁶ Pagaday-on ng mga tawo halin sa iba-iba nga lugar ang inda mga manggad kag pagtahod sa iya. ²⁷ Pero wayà gid ning may makasuyod didto abir mahigkò nga butang sa panirò ng Dios. Indì da makasuyod ang mga nagahuman ning mga kalaw-ay-law-ay o ang mga nagabinakak. Ang makakasuyod lang didto hay ang mga tawo nga ang inda mga pangayan hay nakasulat sa Libro ng Kabuhì. Ini nga libro hay sa Karnero.