6
Zya zikhondɨɨye hwa bhakalwe bha bhali Bhakilisiti
1 Abhakalwe bhonti bhakhondɨɨye huje, bhabhatinihaje abhagoosi bhaabho hu nshɨnshɨ yonti huje, itaawa lya Ngʉlʉbhɨ peeka nɨ manyizyo zya timanyizya, vigandi aligwe. 2 Nkashele abhagoosi bhaabho Bhakilisiti, abhakalwe bhagandi hubhasyoshele huje, bhasi pɨpo bhaholo bhaabho mwa Kilisiti. Leelo, bhakhondɨɨye huje, bhonjezyaje abhabhombele shinza, pɨpo ɨbho bha bhabha nɨ zya pamwanya mu mbombo yaabho, bhabha Bhakilisiti bhamwabho, nantele bhakʉndwe bhaabho.
Amazwi ɨgo, ʉbhamanyizyaje abhantu bhonti mu shibhanza, na bhakhajiizye gɨnɨɨgo.
Abhamanyizyi abhi lenga
3 Huli abhantu bha bhamanyizya amazwi gi lenga, bha saga bhahwɨtɨɨhana na mazwi gɨ lyoli aga Mwɨnɨ weetu ʉYeesu Kilisiti, awe ɨmanyizyo ɨzyɨ shiwooziwa. 4 Ɨbho bhahwibaada lwene, saga bhazimɨɨnye nazimo, bhahwanza hudaliihane hu mazwi ga gali weene. Ʉwo wa wandilo wa bhantu abhe nɨ jɨɨla, ibho, nɨ ndigo, abhasɨbhɨɨlɨle shibhiibhi abhamwabho, 5 na daliihane na bhamwabho habhɨlɨ habhɨlɨ. Abhantu bha bhali nanshi ɨbho, zya bhasɨɨbha mbiibhi, saga bhali nɨ lyoli. Bhasɨɨbha aje, ahwilɨngaanisye na bhooziwa, bhagazyaga ɨzya pamwanya.
6 Leelo, lyoli huje, abhooziwa bhonti bhazyaga ɨzya pamwanya ɨngoosi, nkashele bhahobhoha mu mooyo gaabho hwa vya bhali navyo. 7 Lwa tahapapwaga mu nsi ʉmu, saga tahɨnzɨle naho nahamo. Shɨnɨɨsho, nahamo ha tahaihwega lwa tisogola mu nsi ʉmu. 8 Ɨshi nkashele tabha nɨ vyalye na menda, tihobhohaje nɨɨvyo mu mooyo geetu. 9 Abhantu bha bhahwanza ɨshʉʉma huje, bhabhe bhatabhazi, bhahwitʉʉsya mu njelo, na khatwe mu lwonzo nɨ nsʉngwo ɨnyinji ɨzyɨ lema. Ɨnsʉngwo ɨzyo zibhakwesanjila mu nanjisu, bhamalishila ʉmwo. 10 Ɨyanga ɨsho, pɨpo azigane ɨmpɨɨya, wʉ wandilo wɨ mbiibhi zyonti. Bhalɨɨho bhamo bha bhazigɨɨne haani ɨmpɨɨya, zibhabhɨɨshɨle huje, bhaluleshe ʉlwɨtɨho lwabho, bhavwalaziizye amooyo gaabho hu zugumizu haani.
ɄPaulo ahunʼsunda ʉTiimoti
11 Leelo, awe wʉ muntu wa Ngʉlʉbhɨ, ʉzishɨmbɨlaje ɨzyo zyonti. Ʉhwifumyaje abhombe zyonti ɨzi ɨpa: ʉgolosu, ɨnjendo ɨnyinza pa maaso ga Ngʉlʉbhɨ, ʉlwɨtɨho, ʉkʉndwa, ʉjimvu, na hwiyiisye. 12 Ʉhwifumyaje haani mu lʉgʉ ʉwinza ʉwa lwɨle ʉlwɨtɨho huje, ʉhawaaje ʉwʉʉmi ʉwa wiila na wiila. Ʉwʉʉmi ʉwo wa wuula wahakwiziiwe nʉ Ngʉlʉbhɨ, ʉhalaatile ʉlwɨtɨho lwaho hwa Yeesu, pa maaso ga bhasimishizi abhinji.
13 Ɨhulajizya pa maaso ga Ngʉlʉbhɨ wa vipeela vyonti ʉwʉʉmi, na pa maaso ga Yeesu Kilisiti, wa hafumiizye ʉwusimishizi ʉwinza pa maaso ga Pontiyo Pilaato, Bhaazya Maalʉko 15:2. 14 ʉzitinihaje ɨndajizyo ɨzyo sinta ananje, na fishe pi siku liila ʉMwɨnɨ weetu ʉYeesu Kilisiti ahaiyɨnza nantele. 15 Ahwɨnze hwakwe ʉhwo hwahaibha mu habhaazyo haala ʉNgʉlʉbhɨ yʉʉyo ahabhɨɨshɨle.
ɄNgʉlʉbhɨ wɨ nsayo, nantele yʉʉyo alongozya!
Yʉ Nʼgoosi wa bhagoosi bhɨ nsi yonti, nantele yʉ Mwɨnɨ wa bhamwɨnɨ.
16 Yʉʉyo mwene wa saga afwa,
akhala mu nʼkhozyo ʉnʼkhali guula nʉʉmo wa gaguzʉmbɨɨlɨla.
Saga alɨɨho ʉmuntu wa nʼolile, saga alɨɨho wa bhajiiye hunʼole.
Ayambɨlɨlaje ɨnshɨnshɨ ni khone ɨlyɨ wiila na wiila! Zibhanje shɨɨsho!
Ɨnsundo zya Paulo hwa bhatabhazi
17 Ʉbhabhʉzyaje bha bhali bhatabhazi mu nsi ʉmu huje, bhagandi hwibaade. Nantele, bhagandi asʉʉbhɨle ɨvintu vya bhali navyo, vya vili vya mu nsi ʉmu, vyabho hu habhaazyo hashe lwene. Ʉbhabhʉzyaje huje, bhanʼsʉbhɨlaje ʉNgʉlʉbhɨ, wa tipeela ɨvintu vyonti hu winji huje, tiviseshelaje. 18 Nantele, ʉbhabhʉzyaje huje, bhabhombaje ɨnyinza hahinji. Bhavwaje abhantu abhanjɨ mu vintu vyabho hu mwoyo gwɨ mpyana. 19 Ɨsho sha bhasibhe bhahwibhɨshɨɨye ɨzya habhaazyo haala hahwɨnza, zya zyahaibha lwalo ʉlwa hubhakhamantanye huje, bhahawaaje ʉwʉʉmi ʉwa wiila na wiila.
Amazwi aga lagane
20 Awe Tiimoti, ɨmbombo ɨya bhamanyizye ɨlyoli abhantu, ʉNgʉlʉbhɨ ya piiye, ʉdandamaje ayibhombe shinza. Ʉhwiyefwaje mu nongwa ɨmfwasu zya saga zifuma hwa Ngʉlʉbhɨ. Nkashele ziyangwa huje, zyɨ manyiihanyi, leelo saga zyɨ lyoli lwonti, zya nangaanye ɨlyoli. 21 Bhalɨɨho abhantu bhamo bha bhahwibaada huje, bhali nʉ manyi ʉwo, leelo wubhateziizye huje, bhaleshe ahwɨtɨshe ɨlyoli.
Ʉwiila wa Ngʉlʉbhɨ wubhanje peeka naamwɨ mwenti.