1 Ɨgo lwa gaashɨla, ʉPaulo ahasogola hwi booma ɨlya hu Aseene, ahabhala hwi booma ɨlya hu Kolinto. 2 Ahakhomaana nʉ Nʼyahuudi ʉmo, itaawa lyakwe ahali yʉ Akila, ʉyo ahapapwilwe hu mukowa ʉgwa hu Ponto. ɄAkila peeka nʉ nʼshɨ waakwe ʉPulisiila bhahafumile hwi booma ɨlya hu Luumi mu nsi ɨya hu Itaaliya. Bhahafumile ʉhwo hu habhaazyo hashe lwene lwa haashɨla, pɨpo ʉmwɨnɨ ʉKilawudiyo* Kilawudiyo ahali yʉ mwɨnɨ ʉnʼgoosi wa Bhaluumi. Bhaazya izwi Kilawudiyo hu Ɨngalulanyo ɨzyɨ mazwi amajenu hu wandilo wɨ shitaabu ɨshi. ahalajiziizye huje, aBhayahuudi bhonti bhasogole hu Luumi. Ɨpo ʉPaulo ahabhala hubhalamushe ʉAkila nʉ nʼshɨ waakwe. 3 Abheene bhahabhombaga ɨmbombo ɨya sone ɨnkwembe nanshi ʉmwene. Hu nongwa ɨyo, ahanda akhale nabho na bhombe ɨmbombo ɨla nabho. 4 Shila lisiku lyɨ Sabaato, ʉPaulo ahatʉʉhaga mu nyumba ɨya puutile na manyiilile, ahajehanaga na Bhayahuudi na bha saga Bhayahuudi huje, bhope bhamwɨtɨshe ʉYeesu.

5 Hu habhaazyo hɨnɨɨho ʉSiila nʉ Tiimoti bhahafiha afume hu mukowa ʉgwa hu Makedoniya. Ɨpo ʉPaulo ahanda amanyizye izwi lya Ngʉlʉbhɨ hu habhaazyo haakwe honti hwa Bhayahuudi abhamwabho. Ahalʉmbɨlɨlaga na hubhabhʉʉzye huje, ʉYeesu yʉ Kilisiti. 6 Leelo, aBhayahuudi bhahanʼkhaana na hunʼije ʉPaulo. Ɨpo ahakunyunta inkondi mu menda gaakwe,† Ahakunyunta inkondi mu menda gaakwe hwa huje yʉ Ngʉlʉbhɨ yʉʉyo wa bhakhaanile. ɄPaulo ahabhombile ɨsho alolesye huje, ʉNgʉlʉbhɨ abhalolile aBhayahuudi ɨbho nanshi saga bhantu bhaakwe. ahabhabhʉʉzya ahaga, “Nkashele ʉNgʉlʉbhɨ ahubhafunda, lwenyu mwɨmwɨ! Saga alɨɨho ʉwa mbʉne anɨ hwi zwi ɨlyo. Afume sanyʉʉnʉ, ɨmbala hwa bhantu bha saga Bhayahuudi hubhalʉmbɨɨlɨle.”

7 Ɨpo ʉPaulo ahafuma mu nyumba ɨya puutile na manyiilile, ahabhala, ahatʉʉha mu nyumba ya muntu ʉmo wa saga Nʼyahuudi leelo wa hunʼtiniha ʉNgʉlʉbhɨ. Itaawa lyakwe ahali yʉ Tiito Yuusito. Ɨnyumba ɨyo yahapalamɨɨne nɨ nyumba ɨya puutile na manyiilile. Mwʉmwo ʉPaulo ahajendeelela alʉmbɨɨlɨle ɨNongwa ɨNyinza ɨzya Mwɨnɨ ʉYeesu. 8 Ʉnʼongozi ʉwɨ nyumba ɨya puutile na manyiilile ɨla, ʉyo itaawa lyakwe ahali yʉ Kilisipo, ahamwɨtɨha ʉMwɨnɨ ʉYeesu, peeka na bhantu bhonti abha mu khaaya yaakwe. ABhakolinto abhinji lwa bhahʉmvwaga amazwi ga Paulo, bhope bhahagɨtɨhaga na hwoziwe.

9 Isiku limo nʉsiku, ʉMwɨnɨ ʉYeesu ahamʼʉʉzya ʉPaulo mu ndoleshelo ahaga, “Ʉgandi ahwogope, ʉjendelelaje alʉmbɨɨlɨle, ʉgandi apʉʉme, 10 pɨpo anɨ ɨndi peeka nawe. Nʉʉmo ʉmuntu wa gajezya aje, ahuvwalazye, pɨpo mwi booma ɨli ɨmbasaluuye abhantu abhinji bhabhe bhasundwe bhaanɨ.” 11 Ɨpo ʉPaulo ahakhala ʉmwaha gweka na meezi nʼtanda hu Kolinto, ahabhamanyizyaga abhantu izwi lya Ngʉlʉbhɨ.

12 Ɨshi ʉGaaliyo lwa waabha nʼgoosi wɨ mukowa ʉgwa hu Akaaya, aBhayahuudi bhahajeehana hu mwoyo gweka hunʼkhate ʉPaulo. Bhahanʼtwala hunʼtaake pitagaalila lya Gaaliyo. 13 Bhahanʼtaaka ʉPaulo, bhahaga, “Ʉmuntu ʉnʉ ahubhamanyizya abhantu huje, bhamʼpuutaje ʉNgʉlʉbhɨ hwi dala lya saga lilɨngaana nɨ ndajizyo.”

14 ɄPaulo lwa hwanza ayanje, ʉGaaliyo ahabhabhʉʉzya aBhayahuudi ahaga, “Ʉmvwaji amwɨ Bhayahuudi! Nkashele lyoli muhunʼtaaka ʉmuntu ʉnʉ hu nongwa yɨ nanzi, awe yɨ mbiibhi, nɨnzaga hubhʉmvwe. 15 Leelo, pɨpo mudaliihana hu nongwa yɨ mazwi, amataawa nɨ ndajizyo zyenyu, muzimale mwɨmwɨ. Anɨ ndaali huje, ɨmbe witongwa wɨ nongwa ɨzyo.” 16 Ɨpo ʉGaaliyo ahabhalajizya abhalwi bhaakwe huje, bhabhadaje. Bhope abhalwi bhahabhadaga aBhayahuudi ɨbho mwi koloti. 17 Ɨpo ɨmpʉga yonti yahanʼkhata ʉSositeene, Bhaazya 1 Kolinto 1:1. Pamo ʉSositeene yʉ muntu weeka nʉʉnʉ wa bhanʼtaha ɨpa. ʉnʼongozi ʉwɨ nyumba ɨya puutile na manyiilile, bhahanda hunʼkhome pitagaalila li koloti. Leelo, ʉGaaliyo saga ahasaagaga zyonti zya bhahabhombaga.

18 ɄPaulo ahajendeelela akhale hu Kolinto ɨnsiku zinyinji. Pamandɨ, ahabhalaga abhooziwa abhamwabho, ahabhala peeka nʉ Pulisiila nʉ Akila mwi booma ɨlya hu Kenkeleeya. Ʉhwo ʉPaulo ahasyengula isisi hwi twe‡ ahasyengula isisi hwi twe ABhayahuudi hu habhaazyo ha bhahafinjile nʉ Ngʉlʉbhɨ hu nongwa zimo, bhahasyengulaga isisi hwi twe abhonesye huje, bhamalile ɨmfingo. hu nongwa ya je, amalɨzɨɨzye ɨmfingo yaakwe. Ɨpo ahinjila mu meeli abhale hu mukowa ʉgwa hu Siiliya. 19 Lwa bhaafiha hwi booma ɨlya hu Efeeso, ʉPaulo ahabhaleha ʉPulisiila nʉ Akila huje, bhakhale ʉhwo. Ʉmwene ahatʉʉha mu nyumba ɨya puutile na manyiilile, ahabhalʉmbɨɨlɨla aBhayahuudi abhamwabho. 20 Ɨpo bhahanʼaabha ʉPaulo huje, ayonjezye ɨnsiku ɨzya khale humwabho, leelo ʉmwene ahakhaana. 21 Ahabhalaga, ahabhabhʉʉzya ahaga, “Nkashele ʉNgʉlʉbhɨ asʉngwɨlwe, nahaiweela nantele huliimwɨ.” Ɨpo ahasogola pa Efeeso nɨ meeli.

22 ɄPaulo lwa waafiha mwi booma ɨlya hu Kayisaliiya, ahayileha ɨmeeli. Ɨpo ahabhala hu Yelusaleemu hubhalamushe abhooziwa, nantele ahabhala hwi booma ɨlya hu Antiyokiya. 23 Lwa waakhala hu habhaazyo hashe, ahasogola, ahaweela hu mukowa ʉgwa hu Galatiya nʉ gwa hu Filigiya, ahabhajinjizyaga amooyo abhooziwa bhonti.

24 Hu habhaazyo ɨho, ʉNʼyahuudi ʉmo, itaawa lyakwe ahali yʉ Apoolo, wa hapapwilwe mwi booma ɨlya hu Alekizandiliya, ahabhala hu Efeeso. Ahali mʼmanyihanyi wa yanje, nantele ahazimɨɨnye haani ɨNsimbo ɨMfinjile. 25 Ʉmuntu ʉyo ahamanyiziiwe idala lya Mwɨnɨ ʉYeesu. Wope ahabhamanyizyaga abhantu ɨNongwa ɨNyinza ɨzya Yeesu hu lyoli, pɨpo ʉmwoyo gwakwe gwahapulupuutaga. Hwope ɨsho ahamɨɨnye lwʉ lwozyo lwa Yoohani lwene. 26 Ahatʉʉha mu nyumba ɨya puutile na manyiilile, ahanda amanyizye ɨNongwa ɨNyinza ɨzya Yeesu hu dandamazu. ɄPulisiila nʉ Akila lwa bhʉmvwa ɨmanyizyo zya Apoolo, bhahamwega, bhahabhala nawo humwabho, bhahamʼmanyizya idala ɨlyo lya Ngʉlʉbhɨ, nka limanye shinza haani.

27 Pamandɨ ʉApoolo ahanzaga abhale mu mukowa ʉgwa hu Akaaya, abhooziwa abhamwabho bhahanʼjinjizya ʉmwoyo. Bhahabhasimbila ɨkalaata abhooziwa abhamwabho abha hu Akaaya huje, bhamwambɨɨlɨle shinza. Lwa waafiha huula, ahabhaavwa haani abhooziwa hu mpyana ya Ngʉlʉbhɨ. 28 Ahabhamenaga aBhayahuudi abhamwabho hu dandamazu pa lubhʉngaano lwa bhantu, hwi dala ɨlya hubhasimishizye nɨ Nsimbo ɨMfinjile huje, ʉYeesu yʉ Kilisiti.