1 Hu habhaazyo ɨho ʉApoolo lwa hali huula hu Kolinto, ʉPaulo ahashʉʉla mu mukowa ʉgwa hu Aasiya, ahafiha hwi booma ɨlya hu Efeeso. Hu habhaazyo lwa li hu Efeeso, ahakhomaana na bhooziwa bhamo, 2 ahabhabhʉzɨɨlɨzya ahaga, “Lwa mwamwɨtɨha ʉYeesu, bhʉlɨ, mwahambɨlɨɨye ʉMʼpepo ʉMʼfinjile?” Bhahamwamula bhahaga, “Ndaali, hwope na hwʉmvwe huje, alɨɨho, saga tʉmvwɨzye lwonti.” 3 Ahabhabhʉzɨɨlɨzya nantele ahaga, “Ɨshi, mwahoziiwe hu lwozyo bhʉlɨ?” Bhahamwamula bhahaga, “Tahoziiwe hu lwozyo ʉYoohani lwa halʉmbɨlɨlaga.”

4 ɄPaulo ahabhabhʉʉzya ahaga, “ɄYoohani ahabhozyaga abhantu abhonesye huje, bhalaatile hu mbiibhi zyabho. Ahabhabhʉzyaga huje, bhamwɨtɨhaje ʉyo wa hwɨnza mwisinda lyakwe. Ʉyo yʉ Yeesu.” 5 Abhantu bhaala lwa bhʉmvwa ɨnongwa ɨzyo, bhope bhahooziwa hwi taawa lya Mwɨnɨ ʉYeesu. 6 ɄPaulo lwa bhabhɨɨshɨla ɨnyoobhe zyakwe, ʉMʼpepo ʉMʼfinjile ahabhiishila, bhahanda ayanje hu njango ɨmpya, na hwande akuwe. 7 Abhantu ɨbho bhahali bhalume ishʉmi na bhabhɨɨlɨ ɨshi.

8 Hu habhaazyo ahɨ meezi gataatu, ʉPaulo ahatʉʉhaga mu nyumba ɨya puutile na manyiilile. Ʉmwo ahayangaga na bhantu hu dandamazu, ahajehanaga nabho huje, bhɨɨtɨshe ɨnongwa ɨzyɨ wumwɨnɨ ʉwa Ngʉlʉbhɨ. 9 Leelo, bhamo bhahabha na mooyo amakhome, bhahakhaana ahumwɨtɨshe, bhahanda alije idala lya Mwɨnɨ ʉYeesu pitagaalila lyɨ lubhʉngaano. Ɨpo ʉPaulo ahabhaleha, ahabheega abhooziwa, ahanda abhamanyizye ɨnsiku zyonti mu nsukuulu ya yahali ya muntu ʉyo bhahagaga Tilaano. 10 ɄPaulo ahajendeelela abhombe ɨsho hu maaha gabhɨɨlɨ. Ɨpo bhonti bha bhahakhalaga mu mukowa ʉgwa hu Aasiya, aBhayahuudi peeka na bha saga Bhayahuudi bhahʉmvwa ɨNongwa ɨNyinza ɨzya Mwɨnɨ ʉYeesu.

11 Hu habhaazyo ɨho, ʉNgʉlʉbhɨ ahabhombaga amayele amagoosi ashɨlɨle hwa Paulo. 12 Abhantu bhaheegaga ʉtwenda awe amenda agɨ mbombo ɨgo ʉPaulo ahakwataga, bhahatwalaga hwa bhabhinu, bhope bhahaponaga ʉbhinu waabho, nantele ɨmpepo zyahabheepaga.

13-14 Pahali na Bhayahuudi bhamo bha bhahajendaga ʉhwu nʉʉhwo, ahwefwe ɨmpepo ɨmbiibhi mwa bhantu. Bhamo mwɨbho bhahali bhaana pʉnga (7) bhɨ shilume bha muntu wa bhahagaga Sikewa, ʉnʼsayi ʉnʼgoosi ʉmo wa Bhayahuudi. Isiku limo bhahajela abhombele itaawa lya Mwɨnɨ ʉYeesu huzidaje ɨmpepo, bhahaga, “Hwi taawa lya Yeesu ʉyo ʉPaulo ahunʼʉmbɨɨlɨla, tihubhadaga huje, fumi hwa muntu ʉnʉ.” 15 Leelo ipepo limo lyahabhaamula lyahaga, “ɄYeesu ɨmʼmɨɨnye, wope ʉPaulo ɨmʼmɨɨnye, leelo amwɨ mwɨ bheenu?” 16 Ɨpo ʉmuntu ʉla wa hali ni pepo, ahabhatomoshela bhonti, ahabhamena hwi khone. Ahabhakhoma haani, ahabhavwalazya mu mabɨlɨ, bhope bhahafuma mu nyumba sha bhali shibwida, bhahashɨmbɨla.

17 Ɨnongwa ɨzyo zyahamanyiha haani hwa Bhayahuudi na bha saga Bhayahuudi bhonti bha bhahakhalaga hu Efeeso. Bhonti bhahakhatwa nɨ lyoga, bhahamʼmwamihaga ʉMwɨnɨ ʉYeesu. 18 Abhantu abhinji bha bhahamwɨtɨɨshe ʉYeesu, bhahalaata pitagaalila lya bhantu ɨmbiibhi zyabho ɨzyo bhahabhombile. 19 Abhinji mwɨbho bhahabhombaga ʉlozi. Bhahaleeta ɨvitaabu vyabho ɨvyo vyahabhavwaga amanyile abhombe ʉlozi, bhahavipemba mu mwoto pitagaalila lya bhantu bhonti. Lwa bhabhaazya ɨvitaabu viila, bhahega vifisya ɨmpɨɨya ɨnyinji haani, amashʉmi gasaanu elufu (50,000) hu mpɨɨya yaabho.* ɨmpɨɨya yaabho Ɨmpɨɨya ɨmo yahali ɨya hunʼsombe ʉmuntu hu mbombo ɨyi siku lyeka. 20 Hu nongwa ɨyo, ɨNongwa ɨNyinza ɨzya Mwɨnɨ ʉYeesu zyahonjelelaga anyampaane mwa bhantu na hwonjeelele abhe ni khone tee.

21 Lwa gaashɨla ɨgo gonti, ʉPaulo ahasɨɨbha huje, abhale hwi booma ɨlya hu Yelusaleemu ashɨlɨle hu mabooma aga hu mukowa ʉgwa hu Makedoniya, nʉ gwa hu Akaaya. Ahayanga ahaga, “Hu habhaazyo lwa nahaifiha hu Yelusaleemu, ɨhwanziwa afishe na hwi booma ɨlya hu Luumi.” 22 Ɨpo ahabhasonteelezya abhantu bhabhɨɨlɨ ʉTiimoti nʉ Elaasito mwa bhaala bha bhahamwavwaga, huje, bhanʼtagaalile abhale hu Makedoniya. Ʉmwene ahasagala hu mukowa ʉgwa hu Aasiya hu habhaazyo hashe.

23 Hu habhaazyo ɨho, pa Efeeso pahafumila ʉvwalanganu ʉgoosi haani, hu nongwa yi dala lya Mwɨnɨ ʉYeesu. 24 Ɨshi mwi booma ɨlyo mwahali nʉ muntu ʉmo wa hasyanaga ɨholanyo hu majela agɨ mpɨɨya ɨnyinji. Itaawa lyakwe ahali yʉ Demeetilo. Ahasyanaga ʉtukholanyo twa tukholɨɨne nɨ nyumba ɨmfinjile ɨya ngʉlʉbhɨ waabho ʉwɨ shishɨ ʉAliteemi. Ɨmbombo ɨyo yahabhapeelaga abhasyani bhaakwe ɨmpɨɨya zinyinji ɨzya pamwanya. 25 ɄDemeetilo ahabhabhʉngaanya abhasyani bhaakwe, peeka na bhabhomba mbombo abhamwabho bha bhahabhombaga ɨmbombo ɨyo. Ahabhabhʉʉzya ahaga, “Mubhalume amwɨ, mumɨɨnye shinza huje, tihuzyaga ɨmpɨɨya ɨnyinji afumilane nɨ mbombo ɨnɨ. 26 Ɨshi leelo, muhwʉmvwa na lole ɨsho ʉPaulo sha hubhakʉndɨɨlɨzya na hubhagalulanye abhantu abhinji pa Efeeso ɨpa, nantele na bhantu abhinji abhɨ mbali zyonti ɨzya hu Aasiya. Ahubhakʉndɨɨlɨzya abhantu huje, ‘Mwɨtɨshe aje, ɨholanyo zya zigombwa na bhantu, saga bhangʉlʉbhɨ bhɨ lyoli.’ 27 Ɨshi, saga ɨsho lwene ndaali huje, ɨmbombo yeetu ɨnɨ bhanza huyisyoshele. Lyoli nɨ nyumba ɨmfinjile ya ngʉlʉbhɨ weetu ʉnʼgoosi ʉAliteemi yope bhanza huyisyoshele. ɄAliteemi ʉngʉlʉbhɨ ʉnʼgoosi, ʉyo tihumʼpuuta mu mukowa ʉgwu gwonti ʉgwa hu Aasiya na mu nsi ɨzyɨnjɨ zyonti, ɨnshɨnshɨ yaakwe yahaimaliha lwonti.”

28 Abhasyani abhamwabho lwa bhʉmvwa ɨnongwa ɨzyo, bhahaviitwa haani. Bhahabwagaga ibwago bhahagaga, “ɄAliteemi ʉwa hu Efeeso yʉ nʼgoosi!” 29 Ibooma lyonti ɨlya hu Efeeso lyahabha nʉ vwalanganu. Bhahabhakhata abhantu bhabhɨɨlɨ abha hu Makedoniya, ʉGaayo nʉ Alisitaaluko. Ɨbho bhahashʉʉlaga peeka nʉ Paulo. Bhahabhala nabho pa lubhʉngaano. 30 ɄPaulo ahanzaga huje, abhale pa lubhʉngaano lwa bhantu bhaala, leelo abhooziwa bhahanʼkhaana. 31 Hwope abhamo mu bhalongozi abha hu mukowa ʉgwa hu Aasiya bha bhahali bhamanyani bhaakwe, bhope bhahasonteelezya ɨnongwa ɨzya hunʼsunde huje, agandi abhale pa lubhʉngaano paala.

32 Lwʉnʉʉlwo abhantu bha bhahabhʉngɨɨne paala, bhahazyanguuhana haani. Bhahabwagaga haani, bhamo bhahayangaga ɨli, bhamo liila. Abhinji saga bhahazimɨɨnye zya zibhabhʉngɨɨnye peeka. 33 ABhayahuudi bhahamwɨmɨɨlɨsya ʉmuntu ʉyo bhahagaga ʉAlekizanda pitagaalila lya bhantu bhaala. Abhantu abhanjɨ mu lubhʉngaano luula bhahanʼkwepela ɨzya yanje. Wope ahavwenzya ʉnʼkhono humwanya huje, bhapʉʉme, pɨpo ahanzaga ahwiyʉʉmɨle.† ahanzaga ahwiyʉʉmɨle Ahabhombile ɨsho, pɨpo ahanzaga hubhabhʉʉzye aje, aBhayahuudi saga bhɨɨbho bhasonziizye ʉlwese ʉlwo. 34 Leelo, ɨmpʉga ɨla lwa yaamanya huje, Nʼyahuudi, bhonti peeka bhahabwagaga ibwago hu masaala gabhɨɨlɨ, bhayiga, “ɄAliteemi ʉwa hu Efeeso yʉ nʼgoosi!”

35 Hu malishilo, ʉnʼsimbi ʉnʼgoosi ʉwi booma liila ahabhapʉmɨɨlɨzya abhantu bhaala ahaga, “Mubhantu amwɨ mu bha pa Efeeso, nʉʉmo wa saga amɨɨnye huje, ibooma ɨli lyɨlyo lihwenya ɨnyumba ɨmfinjile ɨya ngʉlʉbhɨ ʉAliteemi ʉnʼgoosi, peeka nɨ holanyo yaakwe ɨyo yahalagɨɨye afume hu mwanya. 36 Nʉʉmo ʉmuntu wa bhajiiye huzikhaane ɨnongwa ɨzi! Ɨshi, amwɨ muhwanziwa apʉʉme myɨ, musahabhombe lyolyonti sinta asɨɨbhe nasʉʉti. 37 Mubhaleetile ɨpa abhantu ɨbha, leelo saga bhiibhile ahantu nahamo mu nyumba ɨmfinjile ɨya ngʉlʉbhɨ weetu, nantele hwope saga bhanʼijile ʉngʉlʉbhɨ weetu ʉwɨ shishɨ. 38 Nkashele ʉDemeetilo na bhasyani abhamwabho bhali nɨ nongwa zimo hwa bhantu ɨbha, bhahwanziwa hubhataake pilongolela lya bhitongwa abhɨ ndajizyo. Abheene bhamɨɨnye abhombe shɨ hwanziwa. 39 Nkashele muli nɨ nongwa ɨyɨnjɨ, muyitwale pitagaalila lyɨ lubhʉngaano lwi booma lwa luhwanziwa nɨ ndajizyo zyetu. 40 Ɨshi nanshi sha tibhombile ɨleelo, zigataazya ataakiwe nʉ longozi wɨ Shiluumi huje, tasonzya ʉvwalanganu ʉgoosi. Nkashele bhatitaake, saga tili ni zwi ɨlya hwamule hu vwalanganu ʉwu.” 41 Ʉnʼsimbi lwa waamala ayanje ɨsho, ahabhabhʉʉzya abhantu huje, bhabhalaje humwabho. Bhope bhahasogola.