1 Lwa tafyʉlwa mu nsʉmbi, tahamanya huje, tili mu nsi yɨ li paahati pa nsʉmbi. Itaawa lyakwe bhahagaga Meelita. 2 Abhakhaaya abha pa Meelita bhahatejelɨɨye shinza tee. Bhahatipembela ʉmwoto ʉgwa hwote, pɨpo ɨmvula yahatoonyaga, nantele hwahali ni sasa. 3 ɄPaulo ahatenya ɨnkwi nyishe, ahazibhɨɨha mu mwoto. Pɨɨpo, ɨnzoha yahafuma mu nkwi ziila hu nongwa yi lyoto lyɨ mwoto. Ɨnzoha yahanʼuma na hunʼsyempeele ʉPaulo mu nyoobhe. 4 Abhakhaaya abha paala lwa bhaalola huje, ɨnzoha ɨla ɨlembeela mu nyoobhe ya Paulo, bhahabhʉʉzanya bhahaga, “Bhaya! Ʉmuntu ʉnʉ, nʼgoji. Hwope nkashele afyʉlɨɨlwe mu nsʉmbi, ʉngʉlʉbhɨ weetu wa hwɨtwa ʉNʼgolosu saga amwɨtɨshɨɨye huje, abhe mwʉmi.” 5 Ɨpo ʉPaulo ahayisanyantila mu mwoto ɨnzoha ɨla, leelo saga ahavwalɨɨye nka pamo. 6 Abhantu bhaala bhahasɨɨbhaga aje, ʉPaulo anza tutubhe awe agwe pansi lubhilo, na fwe. Bhahagʉʉla hu habhaazyo ahatali hashe, sha bhahwenya ha habhala humwaje. Lwa bhaalola huje, nahamo ha hamwajile, bhahagalulanya ɨnsɨɨbho zyabho, bhahanda ayanje huje, “Ʉmuntu ʉnʉ saga nʼgoji, ali palushimo mwa bhangʉlʉbhɨ bheetu!”

7 Pa tahootaga ʉmwoto pahapalamɨɨne nʉ nʼgʉnda gwa nʼongozi wɨ nsi ɨla ɨya hu Meelita. Itaawa lyakwe ahali yʉ Pubiliyo. Ʉnʼgoosi ʉyo ahatambɨlɨɨye shinza hu khaaya yaakwe. Ɨpo tahadɨɨla ɨnsiku zitaatu. 8 Hu habhaazyo ɨho, ʉyise wa Pubiliyo ahagonile pa shitala, pɨpo ahabhinile ɨnzegema na halisye idanda. ɄPaulo ahatʉʉha muuhati muula mwa hali ʉmʼinu. Ahamʼɨɨshɨla ɨnyoobhe, ahapuuta hwa Ngʉlʉbhɨ, ahamʼponia. 9 ɄPaulo lwa wamʼponia ʉmuntu ʉla, ɨpo abhabhinu abhanjɨ bhonti abha mu nsi ɨya hu Meelita bhahamwɨnzɨlaga ʉPaulo. Wope ahabhaponiaga. 10-11 Abhantu bhaala bhahatitiniishe haani.

Ɨshi lwa taamala ameezi gataatu mu nsi ɨyo, tahayaaga ɨmeeli ɨmo ya yahagʉʉlaga huje, ahabhaazyo ahi sasa hashɨle. Lwa tihwilɨngaanya asogole nɨ meeli, bhahatipeela ɨvyalye na hutipashilile mu meeli ɨvintu ɨvyɨnjɨ vya tahabhuliliilwe mu nshʉʉla. Ɨmeeli ɨyo yahali ya mwi booma ɨlya hu Alekizandiliya. Itaawa lyakwe bhahagaga aBhangʉlʉbhɨ aMapasa. 12 Pamandɨ tahashʉʉla, tahafiha hwi booma ɨlya hu Silakusa. Tahadɨɨla ʉhwo ɨnsiku zitaatu. 13 Afume ɨpo, tahashʉʉla abhale hwi booma ɨlya hu Legiyo. Lwa hwasha, ɨhaala ɨya ntende yahavugula. Ɨhaala ɨyo yahataavwa ashʉʉle lubhilo. Ɨndaabhɨ yaakwe tahafiha hwi booma ɨlya hu Puteyoli. 14 Ʉhwo tahakhomaana na bhooziwa abhamwetu bhamo. Bhahatilamba huje, tikhale nabho ɨnsiku pʉnga (7). Pamandɨ, tahashʉʉla lwɨ manama abhale hwi booma ɨlya hu Luumi. 15 Abhooziwa abhamwetu abha hu Luumi lwa bhʉmvwa huje, tili mwi dala abhale humwabho hu Luumi, bhahɨnza hutambɨɨlɨle pi booma lya bhahagaga Lembuka ɨLya Hu Apiyo na pi booma lya bhahagaga ɨNyumba Zitaatu ɨZya Bhajenu. ɄPaulo lwa bhalola, ahanʼsalifya ʉNgʉlʉbhɨ. Ʉmwoyo gwa Paulo gwahagwɨla. 16 Lwa taafiha hwi booma ɨlya hu Luumi, ɨpo ʉPaulo ahɨtɨshɨlwa huje, akhalaje mwene mu nyumba. Leelo pahabha nʉ nʼwi ʉwa hunʼɨndɨɨlɨle.

17 Ɨshi lwa taamala ɨnsiku zitaatu paala, ʉPaulo ahabhakwizya abhagoosi bhamo bha Bhayahuudi abha paala. Lwa bhabhʉngaana, ʉPaulo ahabhabhʉʉzya ahaga, “Mwɨ bhaholo bhaanɨ, nʉʉmo ʉmuntu ʉwɨ shikholo sheetu wa nahanʼtuliiye zimo, hwope saga nahananjile poshe hu miiho geetu ga bhahatileshiiye abhamaama bheetu. Leelo, aBhayahuudi bhamo bhahahata hwi booma ɨlya hu Yelusaleemu, bhahambɨɨha mu nyoobhe zya Bhaluumi. 18 ABhaluumi bhaala lwa bhambʉzɨɨlɨzya shinza, bhahanzaga aje, bhanigulile. Saga bhahawulolile ʉbhiibhi wa nahabhombile ʉwa je, ɨngagogwa. 19 Leelo, aBhayahuudi bhaala bhonti bhahasinta huje, ɨnigulilwe. Ɨpo nahapootwa ɨlya bhombe. Nahalaabha huje, ɨnongwa yaanɨ ɨbhale alongwe hwa mwɨnɨ ʉnʼgoosi ʉKayisali ʉhwu. Abhombe ɨsho saga hulolesya huje, bhasi nahanzaga hubhataake aBhayahuudi abhamwetu. 20 Ɨshi ɨmbakwiziizye amwɨ aje, anɨ ɨnjanje naamwɨ ɨnongwa zya zimbɨɨshɨle huje, ɨmpinywe na manyololo ɨga. Ɨntakwilwe hu nongwa ya je, anɨ ɨhumwɨtɨha ʉMeesiya. Ʉmwene lusʉʉbhɨlo lwetu ʉlwo ʉNgʉlʉbhɨ lwa hatilapiiye atɨ huje, ahaihunʼsonteelezya huliitɨ tiBhaizilaeeli.”

21 Ɨpo abhagoosi bhaala bha Bhayahuudi bhahamwamula ʉPaulo bhahaga, “Atɨ saga tambɨlɨɨye ɨkalaata yoyonti afume hu mukowa ʉgwa hu Yudeeya yɨ yanga ɨnongwa zyaho. Nantele nʉʉmo ʉwamwetu wowonti wa yɨnzɨle afume ʉhwo na yanje ɨmbiibhi zyaho zimo. 22 Leelo atɨ tihwanza ahwʉmvwe afume huliiwe shʉ sɨɨbha, pɨpo ɨmpʉga ɨnɨ yʉ londolezya timɨɨnye huje, ɨyangwa shibhiibhi hwonti.”

23 Ɨpo bhahɨtɨɨhana nʉ Paulo isiku lya bhahaikhomaana mu nyumba ɨla ʉPaulo ahakhalaga. Isiku ɨlyo lwa lyafiha, aBhayahuudi bhaala bhahabhʉngaana hu winji ashɨle hwisinda. ɄPaulo ahabhabhʉʉzya ɨnongwa ɨnyinji ɨzyɨ wumwɨnɨ wa Ngʉlʉbhɨ afume shampwi afishe shalyabheela. Ahabhakʉndɨlɨzyaga huje, bhope bhamwɨtɨshe ʉYeesu. Ahabhalangaga na mazwi ga gahasimbwilwe mu ndajizyo zya Moose, na mu vitaabu vya bhakuwi bha Ngʉlʉbhɨ abhɨ mandɨ ga gayanga ɨnongwa zya Yeesu. 24 Bhamo mu Bhayahuudi bhahagɨɨtɨha amazwi gaala ʉPaulo ga hayangaga hu nongwa ya Yeesu huje, gɨ lyoli. Leelo bhamo bhahagakhaana. 25 Ɨshi hwahabha nʉ legano ʉwɨ nsɨɨbho hu bheene na bheene. Ɨpo bhahanda asogole. Lwa bhasogola, ʉPaulo ahabhabhʉʉzya ahaga, “ɄMʼpepo ʉMʼfinjile ahayanjile gɨ lyoli, lwa habhabhʉzyaga abhamaama bheenyu ashɨlɨle hwa nʼkuwi wa Ngʉlʉbhɨ ʉYesaaya huje,

28 ɄPaulo ahajendeelela ayanje ahaga, “Ɨshi! Mumanye shinza huje, ʉfyʉli ʉwu wa wufumile hwa Ngʉlʉbhɨ, wubhalile na hwa bhantu bha saga Bhayahuudi. Abheene bhahaiyʉmvwa na hwambɨɨlɨle ʉfyʉli.”

29 ɄPaulo lwa waamala ayanje amazwi ɨgo, aBhayahuudi bhaala bhahasogola sha bhadaliihana tee.# Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.

30 Hu habhaazyo ahɨ maaha gabhɨɨlɨ, ʉPaulo ahakhalaga mu nyumba ya hapanjile yʉʉyo. Hu habhaazyo ɨho honti, ahabhejelelaga mwʉmwo bha bhahamwɨnzɨlaga. 31 Ahabhalʉmbɨlɨlaga abhantu ɨnongwa ɨzyɨ wumwɨnɨ wa Ngʉlʉbhɨ, na hubhamanyizye ɨNongwa ɨNyinza ɨzya Mwɨnɨ ʉYeesu Kilisiti hu dandamazu, sinta akhaanwe nʉ muntu wowonti.