1 Leelo, ɨnongwa ɨzyo saga zyahagwɨzɨɨzye nka heeka ʉmwoyo gwakwe ʉYoona, ahaviitwa. 2 Wope ahayanganiha hwa Yehoobha ahaga, “Awe Yehoobha, halɨ anɨ saga nahamɨɨnye afume hu wandilo lwa nahali hu khaaya huje, ʉnza bhasaajile lwene? Sha shɨɨsho nahashɨmbɨlaga lubhilo abhale hu Talashiishi. Nahamɨɨnye lwonti huje, awe we Ngʉlʉbhɨ wʉ li nɨ nkʉmbʉ nʉ mwoyo ʉmwinza ʉwa wiila. Nantele, saga ʉviitwa lubhilo, ʉli nɨ mpyana nʉ kʉndwa. Nahamɨɨnye huje, ʉnza leshe ɨnsɨɨbho zyaho ɨzya hubhagoje abhantu ɨbha. 3 Ɨshi leelo, awe Yehoobha, ɨhulaabha haani huje, ʉyeefwe ʉwʉʉmi waanɨ. Hwashi ɨmfwanje lwene.” 4 Wope ʉYehoobha ahamwamula ahaga, “Manyi ʉyiga ʉbhomba shinza lwʉ viitwa?”

5 ɄYoona aheepa mwi booma, ahabhala akhale hwa litukulila isanya. ɄYoona ahazenga ɨsheegu huhuula, ahakhala hwʉho pa nzundila, ahagʉlɨlaga ahwenye zya zibhala lyaje ibooma liila.

6 Ɨpo ʉYehoobha ʉNgʉlʉbhɨ ahamezya igobwe. Lyahakula lubhilo na humʼpeele ʉYoona ɨnzundila, lyahamwefwezya amayɨmba gaala ga hali nago. ɄYoona ahasha haani hu nongwa yi gobwe liila. 7 Leelo, isiku ɨlya bhɨɨlɨ lwa hwasha, ʉNgʉlʉbhɨ ahalilajizya ibhʉngʉ, lyahabhala lyahafyogomba igobwe. Igobwe ɨlyo lyahʉʉma. 8 Lwa lyalama isanya, ʉNgʉlʉbhɨ ahaleeta ɨhaala ya yahali ni lyoto haani afume hwa litukulila isanya. Lyope isanya ikhali lyahamwoshaaga ʉYoona pi twe, hashe azilishe. ɄYoona ahalola huje, hwashi pa fwanga lwene, ahaga, “Hwashi ɨmfwanje lwene, na je ɨmbe na mayɨmba nanshi ɨga.”

9 ɄNgʉlʉbhɨ ahamʼʉʉzya ʉYoona ahaga, “Ɨshi awe ʉyiga ʉbhomba shinza aviitwe hwi gobwe ɨlyo pa lyʉmɨle?” Wope ʉYoona ahaga, “Ena! Anɨ ɨlola huje, ɨbhomba shinza aviitwe apululile afwe.”

10 ɄYehoobha ahamʼʉʉzya ʉYoona ahaga, “Awe ʉlisaajila igobwe lya saga ʉvyalile. Limelile na kule hwi siku lyeka, nɨndaabhɨ yaakwe lyahʉʉma. 11 Leelo bhʉlɨ, anɨ saga ɨhondɨɨye huje, ɨnjisaajile ɨNinaawi, ibooma igoosi liila, lya lili na bhantu ashɨle ɨlaaki ɨmo nɨ elufu mashʉmi gabhɨɨlɨ? Saga bhazimɨɨnye ɨmbiibhi nɨ nyinza, nantele muli nɨ vyʉma vinji haani ʉmwo.”