2
ɄYeesu ali ni khone ɨlya khobhoshele ɨmbiibhi
(Mataayo 9:1-8; Luuka 5:17-26)
1 ɄYeesu ahabhala nantele hu Kapelenaumu. Ɨnsiku nyishe lwene lwa zyahashɨla, abhantu bhahʉmvwa huje, ali pa khaaya paala.
* 2 Ɨpo abhantu abhinji haani bhahabhʉngaana mu nyumba muula, saga pahali na pa shɨle pa lyango. ɄYeesu ahabhalʉmbɨlɨlaga abhantu izwi lyɨ wumwɨnɨ wa Ngʉlʉbhɨ.
3 Lwa lʉmbɨɨlɨla, bhahamwɨnzɨla abhantu bhanɨ bha bhahanyemuuye mu shɨlɨlɨ ʉmuntu wa lemɨɨye.
4 Bhahapootwa hunʼtʉʉsye pa hali ʉYeesu, pɨpo hwahali nɨ mpʉga ɨngoosi ɨya bhantu. Bhahazʉbha hwi gʉlʉ
† lyɨ nyumba, bhahadobhola igʉlʉ, bhahamwisya mu shɨlɨlɨ ʉmʼinu paala ʉYeesu ahali.
5 ɄYeesu lwa waalola zya bhabhomba abhantu bhaala, ahamanya huje, bhali nʉ lwɨtɨho. Ahamʼʉʉzya ʉmʼinu ʉla huje, “Mwana waanɨ, ɨmbiibhi zyaho zikhobhosheliilwe.”
6 Leelo, abhamanyizyi bhamo abhɨ ndajizyo zya Moose bha bhahakhɨɨye paala, bhahasɨɨbhaga mu mooyo gaabho huje,
7 “Ʉmuntu ʉnʉ ayanga bhʉlɨ bhʉlɨ ɨsho? Ahunʼiga yʉ Ngʉlʉbhɨ, nʉʉmo ʉmuntu halɨ wa gabhakhobhoshela abhantu ɨmbiibhi, lyoli yʉ Ngʉlʉbhɨ mwene.”
8 ɄYeesu ahamanya lwene zya bhasɨɨbha, ahabhabhʉʉzya huje, “Yeenu mu mooyo geenyu musɨɨbha ɨsho?
9 Ɨshi, lyenu lya lili lipʉpʉʉsu haani,
humʼʉʉzye ʉmuntu ʉnʉ wa lemɨɨye huje, ‘Ɨmbiibhi zyaho zikhobhosheliilwe,’ awe huje, ‘Ɨmɨɨlɨla, ega ɨshɨlɨlɨ shaaho, bhalaga’?
10 Ɨshi leelo, ɨmbalanje huje, anɨ nɨ Mwana Wa Muntu,
‡ lyoli ɨndi ni khone ɨlya hubhakhobhoshele ɨmbiibhi abhantu mu nsi.” Ɨpo ʉYeesu ahamʼʉʉzya ʉmuntu ʉla wa lemɨɨye huje,
11 “Ɨhubhʉʉzya ɨnjiga, ɨmɨɨlɨla, ega ɨshɨlɨlɨ shaaho, bhalaga hu khaaya!”
12 Papaala, bhonti bhahamwenya ʉmuntu ʉla ahɨmɨɨlɨla, aheega ɨshɨlɨlɨ shaakwe, ahafuma hwʉnzɨ. Abhantu bhonti bhahaswiga na humʼmwamishe ʉNgʉlʉbhɨ, bhahaga, “Saga tipɨɨte agalole amayele
§ nanshi ɨgo ga gafumila sanyʉʉnʉ!”
ɄYeesu ayɨnzɨle hubhafyʉle abhabhomba mbiibhi
(Mataayo 9:9-13; Luuka 5:27-32)
13 ɄYeesu ahafuma, ahabhala nantele hunshɨnjɨ hu Nsʉmbi ɨYa Hu Galilaaya. Abhantu abhinji bhahamʼɨnjɨlɨzyaga huhuula, wope ahabhamanyizyaga.
14 Pilongolela ʉYeesu lwa shɨzanya munshɨnjɨ mu nsʉmbi, ahanʼola ʉmuntu ʉmo wa bhahagaga Laawi ʉmwana wa Alʉfaayo. Asomvya sonko pa bhasomvezya isonko. ɄYeesu ahamʼʉʉzya huje, “Ɨnzaga, ʉmbɨnjɨlɨzyaje anɨ, ʉbhe nʼsundwe waanɨ.” ɄLaawi ahɨmɨɨlɨla, ahanda humʼɨnjɨɨlɨle.
15 Pamandɨ ʉYeesu na bhasundwe bhaakwe bhahabhala alye ɨshalye hwa Laawi. Abhasomvya sonko
* na bhabhomba mbiibhi
† abhanjɨ abhinji bha bhahamʼɨnjɨlɨlaga, bhahalyanga ɨshalye peeka nabho.
16 Ɨshi, abhamanyizyi abhɨ ndajizyo zya Moose bhamo bha bhahali Bhafalisaayo, lwa bhanʼola ʉYeesu alya peeka na bhasomvya sonko na bhabhomba mbiibhi abhanjɨ, bhahabhabhʉzɨɨlɨzya abhasundwe bhaakwe bhahaga, “Yeenu leelo asangaana na lye peeka na bhasomvya sonko na bhabhomba mbiibhi?”
17 ɄYeesu lwa wʉmvwa, ahabhabhʉʉzya huje, “Abhantu bha saga bhabhinile lwonti, saga bhahumwanza ʉnʼganga, handɨ abhabhinu bha bhahumwanza ʉnʼganga. Anɨ saga nahɨnzɨle hubhaane bha bhahwilola huje, bhagolosu, ndaali! Ɨnɨnzɨle hubhaane abhabhomba mbiibhi huje, bhabhe bhasundwe bhaanɨ.”
Ɨmanyizyo ɨmpya
(Mataayo 9:14-17; Luuka 5:33-39)
18 Mu habhaazyo hamo, abhasundwe bha Yoohani ʉMwozi na bhasundwe bha Bhafalisaayo bhahahwiyiimaga alye.
‡ Isiku limo, abhantu bhamo bhahabhala hwa Yeesu, bhahamʼʉzɨɨlɨzya bhahaga, “Pa nsiku zya puute, abhasundwe bha Yoohani ʉMwozi na bhasundwe bha Bhafalisaayo saga bhalya. Yeenu awe, abhasundwe bhaaho pa nsiku ɨzya puute saga bhahwiyiima alye?”
19 ɄYeesu ahabhaamula ahaga, “Abhaloleezi bha mweji bhagahwiyiima alye bhʉlɨ bhʉlɨ, lwa bhali peeka nʉ mweji pa weeji? Mu habhaazyo honti lwa bhali peeka nawo saga bhagahwiyiima alye lwonti!
20 Leelo, ahabhaazyo hahwɨnza abhanjɨ lwa bhahaihumwefwa ʉmweji. Abhaloleezi bha mweji lwa saga bhali nawo lwonti, ɨpo bhahaihwiyiima alye.
21 Hwope asangaanye ɨmanyizyo zyanɨ zya zili mpya na miiho geenyu hulɨngaana lwene na patishe ɨshipatiho shɨ mwenda ʉmʼpya mu mwenda ʉnʼkʉʉlʉ. Ɨshipatiho shiila shibhala huguzɨmbule ʉmwenda ʉgwo na hwonjeezye azɨmbushe.
22 Nantele, asangaanye ɨmanyizyo zyanɨ zya zili mpya na miiho geenyu hulɨngaana lwene na sulule ɨdivaayi
§ ya saga ndozu mu nyambɨ ɨnkʉʉlʉ, pɨpo lwɨ lʉla na bʉʉse, ɨnyambɨ ɨbhala kunwe abʉʉse na bazuuhane. Ɨdivaayi ya saga ndozu ɨhwanziwa abhɨɨhwe mu nyambɨ ɨmpya.”
ɄYeesu yʉ Mwɨnɨ wi siku ɨlyɨ Sabaato
(Mataayo 12:1-8; Luuka 6:1-5)
23 Isiku limo ɨlyɨ Sabaato, ʉYeesu peeka na bhasundwe bhaakwe bhahashɨzanyaaga mu magʉnda gɨ ngano. Abhasundwe bhaakwe bhahanda anyuntule amatwe gɨ ngano na lye.
24 Ɨpo aBhafalisaayo bhahamʼʉzɨɨlɨzya ʉYeesu bhahaga, “Enya, yeenu abhasundwe bhaaho bhabhomba ɨmbombo pi siku lyɨ Sabaato ɨlyo ɨndajizyo zya Moose zikhaana?”
25 ɄYeesu ahaamula huje, “Bhʉlɨ, saga mwahabhaziizye mu Nsimbo ɨMfinjile, ʉDaudi
* sha habhombile, ɨnzala lwa yahanʼuma ʉmwene na bhamwabho?
26 Ɨmandɨ luula ʉAbiyasali lwa hali nʼsayi nʼgoosi wa Ngʉlʉbhɨ, ʉDaudi ahatʉʉha mwi sebhele ifinjile lya Ngʉlʉbhɨ, ahalya ɨntogito ɨzya pa shipuuto.
† Alɨngaane nɨ ndajizyo zya Moose, bhasayi bha Ngʉlʉbhɨ bheene bha bhahɨtɨshɨlɨɨlwe alye ɨntogito ɨzyo,
leelo ʉDaudi ahalya zyɨnɨɨzyo, nantele ahabhapeela na bhamwabho, bhope bhahalya. Wope ʉNgʉlʉbhɨ ahabhɨtɨshɨɨye.”
27 Ɨpo ʉYeesu ahabhabhʉʉzya huje, “Abhantu saga bhahapeliilwe huje, bhazitinihaje ɨndajizyo ɨzyɨ Sabaato, handɨ isiku ɨlyɨ Sabaato lyahabhɨhwɨlwe nʉ Ngʉlʉbhɨ huje, libhavwaje abhantu.
28 Nantele, mumanye huje, anɨ nɨ Mwana Wa Muntu ɨndi ni khone na hu Sabaato.”