1 Isiku ɨlyɨnjɨ ɨlyɨ Sabaato, ʉYeesu ahatʉʉha mu nyumba ɨya puutile na manyiilile. Ʉmwo ahali ʉmuntu ʉyo ahalemɨɨye ʉnʼkhono. 2 ABhafalisaayo bhahamʼendaga haani ʉYeesu, bhalole nkashele abhala humʼponie ʉmuntu ʉla pi siku ɨlyɨ Sabaato, awe khala. Nkashele abhala humʼponie, bhalyaje idala ɨlya hunʼtaake ʉYeesu. 3 ɄYeesu ahamʼʉʉzya ʉmʼinu ʉla ahaga, “Ɨnza, ʉyɨmɨɨlɨle ɨpa paahati.” 4 Ɨpo ʉYeesu ahabheenya abhantu bhaala, ahabhabhʉzɨɨlɨzya huje, “Ɨshi, alɨngaane nɨ ndajizyo zya Moose, lyenu linza lya likhondɨɨye abhombe pi siku ɨlyɨ Sabaato, abhombe ɨnyinza awe abhombe ɨmbiibhi, aponie awe agoje?” Abheene bhahapʉʉma myɨ! 5 ɄYeesu ahabheenya bhonti hwi lyoyo, ahazugumila mu mwoyo gwakwe, hu nongwa yɨ khome wɨ mooyo gaabho. Ɨpo ʉYeesu ahamʼʉʉzya ʉmuntu ʉla huje, “Golosya ʉnʼkhono gwaho.” Ʉmuntu ʉla ahagolosya ʉnʼkhono gwakwe, ahapona, gwahabha mwinza lwene. 6 Pɨnɨɨpo aBhafalisaayo bhaala bhahafuma panzɨ, bhahabhʉngaana na jeehane na bhantu bha Heloode ʉAntipa.* Abhantu bha Heloode ʉAntipa bhahali mpʉga ya Bhayahuudi ya yahali ni khone. Abheene na Bhafalisaayo saga bhahaganɨɨne lwonti, lyoli hu nongwa zimo lwene. Bhonti bhahogopaga amanyishe hwa Yeesu mu nsi yonti, ɨpo bhahanda ahwɨtɨɨhane ahwanze idala ɨlya hunʼgojele ʉYeesu. Lwa bhali pa lubhʉngaano, bhahanza idala ɨlya hunʼgojele ʉYeesu.

7-8 Ɨpo ʉYeesu ahasogola ʉmwo, ahabhala hu Nsʉmbi ɨYa Hu Galilaaya peeka na bhasundwe bhaakwe. Lwa bhʉmvwa amayele ga habhombaga, ɨmpʉga ɨngoosi ɨya bhantu yahanda humʼɨnjɨɨlɨzye. Bhahafumile mu pɨɨpɨ na hutali. Bhahafumile hwi booma ɨlya hu Yelusaleemu, hu mukowa ʉgwa hu Galilaaya, ʉgwa hu Yudeeya nʉ gwa hu Idumeeya, hwi syɨla li sooho ɨlyɨ Yolodaani na mu pɨɨpɨ mu mabooma ga hu Tiilo na hu Siidoni. 9 Ɨmpʉga ɨla yahali ngoosi haani, ɨpo ʉYeesu ahabhabhʉʉzya abhasundwe bhaakwe ahaga, “Bhɨɨshi haani ʉwaato huje, nkashele ɨmpʉga ɨhumbiganya, ɨntʉʉhaje mu waato.” 10 Abhabhinu bhahabuhaanaga na sejeelele hwa mwene huje, bhamʼpalamansye, pɨpo abhantu bhinji bhahali bhaponile. 11 Abhantu bhonti bha bhahali nɨ mpepo ɨhandamanu lwa bhanʼola lwene, bhahagwanga pa manama gaakwe na lile haani hwi zwi igoosi huje, “Awe ʉli Mwana Wa Ngʉlʉbhɨ!” 12 Ɨpo ahazikhaana haani ɨmpepo huje, zisahanyampaanye hwa bhantu huje, ʉmwene yʉ naanu.

13 ɄYeesu ahazʉbha mwi gamba. Ahabhakwizya abhantu, bhahɨnza hwa mwene. 14 Ahabhasalula abhantu ishʉmi na bhabhɨɨlɨ bhahanzaga huje, bhabhanje nawo wiila, abhasontelezyaje alʉmbɨɨlɨle. Ɨbho ahabhapeela itaawa bhasontwa. 15 Nantele, ahabhapeela ikhone ɨlya hwefwezye ɨmpepo mwa bhantu. 16 Ɨga ga mataawa ga bhantu ishʉmi na bhabhɨɨlɨ bha hasaluuye. ɄSiimoni, ʉyo ʉYeesu ahamʼpiiye itaawa ɨlyɨnjɨ ahajile, “We Peeteli” hwa huje lyalawe, 17 ʉYaakobo nʉ Yoohani bha bhahali bhavwɨlɨ bha Zebedaayo, bhaala ʉYeesu ahabhapeelile itaawa ɨlya Boyanige, hwa huje Bhaana Bhɨ Lyʉngʉmo, 18 ʉAnduleeya, ʉFilipo, ʉBasolomaayo, ʉMataayo, ʉToomasi, ʉYaakobo ʉmʼvwɨlɨ wa Alʉfaayo, ʉTadaayo, ʉSiimoni ʉNʼzeloote† ʉSiimoni ʉNʼzeloote Bhaazya Mataayo 10:4; Luuka 6:15. ɄSiimoni ahali na mataawa gabhɨɨlɨ, limo yʉ Siimoni ʉNʼzeloote, ɨlyamwabho yʉ Siimoni ʉNʼkaanani. hwa huje lwɨla nsi yaakwe, 19 nʉ Yuuda ʉSikalyoti, ʉyo ahanʼsambushiiye ʉYeesu pamandɨ.

20 Ɨpo ʉYeesu ahatʉʉha mu nyumba. Ɨmpʉga ɨya bhantu yahabhʉngɨɨne paala. ɄYeesu na bhasundwe bhaakwe bhahapotiilwe alye nka shalye, pɨpo ɨmbombo ɨya bhabhombele abhantu yahali ngoosi haani. 21 Ʉnyina na bhanakwabho lwa bhʉmvwa ɨnongwa ɨzyo, bhahaga abwaluushe. Ɨpo bhahabhala humweje.

22 Bhope abhamanyizyi abhɨ ndajizyo zya Moose bha bhahafumile hwi booma ɨlya hu Yelusaleemu bhahagaga, “Ali ni Belizebuuli!” Nantele, bhahagaga, “Lya lihumʼpeela ikhone ɨlya hwefwezye ɨmpepo mwa bhantu, ɨlyo li Belizebuuli,‡ Belizebuuli Ɨli litaawa lyɨnjɨ lya Seetano. igoosi ɨlyɨ mpepo.” 23 Ɨpo ʉYeesu ahabhakwizya, ahanda hubhabhʉʉzye hu holanyo huje, “Ɨshi, ʉSeetano agahwiyeefwa nanshi bhʉlɨ bhʉlɨ? 24 Nkashele abhantu abhɨ wumwɨnɨ weeka bhalwa ʉlʉgʉ bhɨɨbho na bhɨɨbho, ʉwumwɨnɨ ʉwo wahaigwa. 25 Bhope abhantu abha mu nyumba yeeka nkashele bhanda alwe bhɨɨbho na bhɨɨbho, ɨnyumba ɨyo saga ɨgalʉnjɨha nalumo. 26 Nkashele ʉSeetano alwa nɨ mpepo ɨzyamwabho, ʉwumwɨnɨ waabho wutapuhɨɨne, wugɨmɨɨlɨla nanshi bhʉlɨ bhʉlɨ? Saga wugɨmɨɨlɨla nalumo, lyoli wuula wugwiye nzɨɨla. 27 Leelo, ɨlyoli ya yɨɨnɨ. Ʉmuntu saga agatʉʉha mu nyumba ya muntu ʉla wa li ni khone, na humʼfyʉle ɨvintu vyakwe, sinta humʼpinye nasʉʉti. Lyoli nkashele ahumʼpinya, ɨpo agamʼfyʉla ɨvintu vyakwe vyonti.

28 Lyoli anɨ ɨhubhabhʉʉzya, abhantu bhahaikhobhoshelwa ɨmbiibhi zyabho zyonti. Nantele, bhahaikhobhoshelwa nkashele bhahunʼshenta wowonti. 29 Handɨ nkashele ʉmuntu ahunʼshenta ʉMʼpepo ʉMʼfinjile, saga ahaikhobhoshelwa nalumo. Ʉyo ahaibha na malando gɨ mbiibhi zyɨ wiila na wiila.” 30 Ahabhabhʉzɨɨzye ɨsho, pɨpo abheene bhahagaga, “Ali ni pepo ikhandamanu.”

31 Ɨpo, ʉnyina na bhadoodo bhaakwe ʉYeesu bhahafiha ɨpo, bhahɨmɨɨlɨla panzɨ pa nyumba ɨla mwa hamanyizyaga. Bhahanʼsonteelezya ʉmuntu ʉmo huje, anʼkwizye ʉYeesu mu nyumba, bhayanje nawo. 32 Ɨmpʉga ɨngoosi ɨya bhantu yahakhɨɨye, yahanʼzyʉngʉʉlɨle. Ɨpo bhahamʼʉʉzya ʉYeesu bhahaga, “Enya, ʉbhɨɨnyu na bhanakwenyu bhali panzɨ, bhahukwizya.” 33 ɄYeesu ahabhaamula huje, “Ʉnyina waanɨ na bhaholo bhaanɨ bha naanu?” 34 Ɨpo ahabheenya abhantu bha bhakhɨɨye bha bhahanʼzyʉngʉʉlɨle, ahaga, “Enyi, ɨbha bha bhaanyina bhaanɨ, nantele bhaholo bhaanɨ.” 35 Ahonjela ahaga, “Ʉmuntu wowonti ʉla wa bhomba ga hwanza ʉNgʉlʉbhɨ huje, abhombaje, ʉyo holo waanɨ, nyina waanɨ, nantele yilʉmbʉ waanɨ.”