1 Lwa lyashɨla isiku ɨlyɨ Sabaato, ʉMaliya ʉwa hwi booma ɨlya hu Magidaala, ʉSaloome nʉ Maliya ʉnyina wa Yoose nʉ Yaakobo ʉnʼdoodo, bhahakala ɨnyemba zya zinunshila shinza huje, bhabhale bhagupashe ʉmʼvimba gwa Yeesu. 2 Isiku ɨlya Mulʉngʉ nashampwi, bhahabhala hu nkʉngwa ɨya Yeesu. Bhahafiha isanya lwa lihwanda atukule. 3 Lwa bhajenda mwi dala, bhahanda ayangane huje, “Ɨshi, weenu anza hutefwezye iwe liila pa lyango pa nkʉngwa paala?” 4 Iwe liila lyahali ligoosi haani. Lwa bhapalamiiye afishe, bhaheenya pa nkʉngwa, bhahalola iwe liila libhungulusye, lili panshɨnjɨ.

5 Lwa bhatʉʉha muuhati mu nkʉngwa, bhahanʼola ʉnʼsahaala ʉmo ʉya kwɨte amenda amazelu. Akhɨɨye hu bhazu ʉlwa hu nyoobhe ɨndɨɨlo ɨyɨ nkʉngwa. Abhashɨ bhaala bhahagunduha haani. 6 Ɨpo ʉnʼsahaala ʉla ahabhabhʉʉzya huje, “Mugandi agundushe. Ɨmɨɨnye huje, muhumwanza yʉ Yeesu ʉwa hu Nazaleeti, nantele bhahanʼkhomelɨɨye pa shikhobheehanyo. Azyʉshile, saga alɨɨho ɨpa! Enyi ɨpo bhahanʼgoneleziizye. 7 Ɨshi bhalaji, mubhabhʉʉzye ʉPeeteli na bhasundwe abhamwabho huje, ʉYeesu abhatagaliiye abhale hu mukowa ʉgwa hu Galilaaya. Huhuula hwa mwahaihunʼola nanshi sha habhabhʉzɨɨzye.”  Bhaazya Maalʉko 14:28. 8 Lwa bhʉmvwa ɨsho, bhahanda ayinje hu lyoga, na swije. Bhahafuma panzɨ, bhahasogola pa nkʉngwa paala, mumo bhahashɨmbɨlaga. Saga bhahamʼʉʉzya ʉmuntu nʉʉmo hu nongwa ya je, bhahogʉʉpe haani.

9 ɄYeesu lwa zyʉha pi siku ɨlya Mulʉngʉ nashampwi, ahanʼoleshela nasʉʉti ʉMaliya ʉwa hwi booma ɨlya hu Magidaala ʉla ahamwefwizye ɨmpepo pʉnga (7). 10 Wope ahabhala ahabhabhʉʉzya bhaala bha bhahali peeka nʉ Yeesu sha sɨɨle afwe. Mu habhaazyo haala bhahali sha bhali mu zugumizu na zonde. 11 Ɨpo lwa bhʉmvwa hwa Maliya ʉwa hu Magidaala huje, anʼolile ʉYeesu mwʉmi lwene, bhahakhaana.

12 Isiku liliila, ʉYeesu ahabhaloleshela abhasundwe bhabhɨɨlɨ. Abhasundwe bhaala bhahali mwi dala, bhahabhalaga hu vipanga. Bhahapootwa humʼmanye, pɨpo ʉmwene ahalolehaga ali shɨnjɨ lwene. 13 Lwa bhamʼmanya, ɨpo bhahaweela hubhabhʉʉzye abhamwabho, leelo abhasundwe ɨbho saga bhahabhɨtɨɨshe.

14 Hu malishilo, ʉYeesu ahabhaloleshela abhasundwe bhaakwe ishʉmi nʉ weeka bha bhahakhɨɨye peeka, bhahalyanga ɨshalye. ɄYeesu ahabhadaamila hu nongwa yɨ khome wɨ mooyo gaabho, pɨpo bhahakhaanile hubhɨɨtɨshe abhamwabho bhaala bha bhahanʼolile ʉYeesu huje, azyʉshile afume hwa bhafwe. 15 Ɨpo ahabhabhʉʉzya huje, “Bhalaji mu nsi zyonti, mubhalʉmbɨɨlɨle ɨNongwa ɨNyinza ɨzya huliinɨ abhantu bhonti. 16 Ʉmuntu wowonti ʉla ahwɨtɨha hunʼsʉʉbhɨle ʉNgʉlʉbhɨ na hwoziwe, ahaifyʉlwa. Leelo, ʉmuntu wowonti ʉla akhaana hunʼsʉʉbhɨle ʉNgʉlʉbhɨ, ahailongwa. 17 Abhantu bhaala bhahwɨtɨha hunʼsʉʉbhɨle ʉNgʉlʉbhɨ, bhahaibhombaga ɨvimanyishizyo ɨvi. Hwi taawa lyanɨ bhahaiyefwaga ɨmpepo mwa bhantu, bhahaiyangaga hu njango ɨmpya. 18 Hwope nkashele bhakhata ɨnzoha nɨ nyoobhe, awe hwope nkashele bhamwela ahantu hohonti ha hagoga, saga vyahaibhomba nahamo. Bhahaibhɨɨhaga ɨnyoobhe zyabho mwa bhabhinu, bhope bhahaiponaga.”

19 ɄMwɨnɨ ʉYeesu lwa waamala ayanje nabho, ʉNgʉlʉbhɨ ahamwega azʉbhe hu mwanya. Ahakhala peeka nʉ Ngʉlʉbhɨ alongozye peeka nawo. Bhaazya mu futinooti yɨ Maalʉko 12:36. 20 Abhasundwe bhaakwe bhaala bhahasogola paala. Bhahabhala alʉmbɨɨlɨle ɨNongwa ɨNyinza poponti. ɄMwɨnɨ ʉYeesu ahabhapeelaga ikhone ɨlya bhombele ɨvimanyishizyo. Shɨnɨɨsho sha hasimishizyaga amazwi ɨgo huje, gɨ lyoli.# Amazwi agɨ lwoli lwɨ fundihandwɨmo (9) afishe lwɨ mashʉmi gabhɨɨlɨ (16:9-20) saga galɨɨho mu nsimbo zimo ɨzyɨ mandɨ ɨzyɨ Shiyunaani.