1 Nashampwi lwene, abhalongozi bha bhasayi bha Ngʉlʉbhɨ, abhagoosi na bhamanyizyi abhɨ ndajizyo zya Moose, hwa huje ikoloti lyonti, bhahajeehana. Bhahamʼpinya ʉYeesu, bhahanʼtwala hwa Pilaato, ʉnʼongozi wa Bhaluumi wa halongozyaga hu nsi ɨya hu Yudeeya.

2 ɄPilaato ahamʼʉzɨɨlɨzya ʉYeesu huje, “Awe ʉli mwɨnɨ wa Bhayahuudi?” ɄYeesu ahamwamula huje, “Awe wayanga.” 3 Abhalongozi bha bhasayi bhahanʼtaakaga ʉYeesu hu nongwa ɨnyinji lwene. 4 ɄPilaato ahamʼʉzɨɨlɨzya nantele ʉYeesu, ahaga, “Saga ʉhwamula nalimo? Enya sha bhahutaaka weewe ɨnongwa ɨnyinji.” 5 Leelo, ʉYeesu saga ahamwamula nalimo. Ɨpo ʉPilaato ahaswiga!

6 Ɨshi pa chaaka ɨyɨ Paasaka, ʉPilaato ʉnʼongozi ahali na miiho aga hubhigulile ʉnʼkʉngwe weeka, ʉla abhantu bhahanʼaabhaga huje, ayigulilwe. 7 Ahali ʉmuntu ʉmo, itaawa lyakwe ahali yʉ Balaaba. Ʉmwene ahapinyiilwe mu hoobhe peeka na bhamwabho, pɨpo bhonti bhahabhombile ibho nʉ goji hu lumanyi waabho. 8 Ahabhaazyo hahaala ʉYeesu lwa hali hwa Pilaato, abhantu abhinji bhahabhala hwa Pilaato, bhahanʼaabha huje, abhigulile ʉnʼkʉngwe weeka, shishiila sha halʉbhɨɨye abhombe. 9 ɄPilaato ahabhaamula huje, “Ɨshɨ, muhwanza aje, ɨmbigulile ʉMwɨnɨ Wa Bhayahuudi?” 10 Ahayanjile ɨsho, pɨpo ahamɨɨnye huje, abhalongozi bha bhasayi bha Ngʉlʉbhɨ bhahanʼtwalile ʉYeesu hwa mwene hu nongwa yɨ jɨɨla yaabho lwene. 11 Ɨpo abhalongozi bha bhasayi bhahayisooha ɨmpʉga ɨya bhantu ɨla huje, ɨnʼaabhe ʉPilaato abhigulile ʉBalaaba. 12 ɄPilaato ahabhabhʉzɨɨlɨzya nantele huje, “Ɨshi leelo, muhwanza ɨmbombe bhʉlɨ nʉ muntu ʉnʉ wa muyiga Mwɨnɨ Wa Bhayahuudi?”

13 Abhantu bhonti bhahɨtɨshɨla hwi bwago bhahaga, “Nʼkhobheehanye pa shikhobheehanyo!” 14 ɄPilaato ahabhabhʉzɨɨlɨzya huje, “Atulile yeenu?” Ɨpo abheene bhahazanzala haani abwaganishe, bhahaga, “Nʼkhobheehanye pa shikhobheehanyo!” 15 ɄPilaato ahabhigulila ʉBalaaba, pɨpo ahanzaga huyisʉngwɨzye ɨmpʉga ya bhantu. Ahabhalajizya abhalwi bhaakwe huje, bhanʼshete ʉYeesu nɨ nsanzʉ, na hunʼkhomeele pa shikhobheehanyo.

16 Abhalwi bhahamwega ʉYeesu, bhahabhala nawo pa khaaya ya Pilaato. Bhahabhʉngaanya ɨmpʉga ɨngoosi ɨya bhalwi. 17 Bhahanʼkwatizya ʉYeesu ʉmwenda ʉmʼvuutu ʉgwɨ shimwɨnɨ. Bhahatabha ɨnsushe ɨyɨ mimvwa, bhahanʼkwatizya hwi twe. Bhahabhombile ɨsho humʼɨɨshe abhe nkati yʉ mwɨnɨ, hunʼsʉfwanye. 18 Bhahanda hunʼjebhule na hunʼamushe, bhahaga, “Ʉkwa, waagona Mwɨnɨ Wa Bhayahuudi!” 19 Bhahanʼkhomaga pi twe ni lanzi, bhahanʼswɨlɨlaga amatɨ, bhahanʼsugamililaga na humwundamilile pansi. 20 Lwa bhaamala hunʼsʉfwanye, bhahamwawula ʉmwenda ʉmʼvuutu guula, na hunʼkwatizye nantele amenda gaakwe. Bhahamʼfumya hwʉnzɨ, bhahasogola nawo abhale hunʼkhomeele pa shikhobheehanyo.

21 Lwa bhali mwi dala, bhahakhomaana nʉ muntu ʉya hashɨlaga afume hu shipanga. Itaawa lyakwe ahali yʉ Siimoni, ahali nʼkhaaya wa hwi booma ɨlya hu Kileene. Ʉmuntu ʉla ahali yise wa Alekizanda nʉ Luufo. Abhalwi bhahamʼbijilizya huje, abhʉʉsye ɨshikhobheehanyo sha Yeesu. 22 Bhahanʼtwala ʉYeesu pa bhahagaga pa Goligoota, hwa huje, Pi Fupa Li Twe. 23 Bhahamʼpeela ʉYeesu ɨdivaayi ya bhahasangɨɨnye nʉ nʼembo. Ʉnʼembo ʉgwo gwahamwavwaga ʉmuntu asahwiyʉmvwaje haani amavune. Leelo, ʉmwene ahakhaana amwele. 24 Ɨpo bhahanʼkhomeela pa shikhobheehanyo paala, bhahagabhana amenda gaakwe.* bhahagabhana amenda gaakwe Bhahabhombile ɨsho alɨngaane na miiho gaabho gɨ Shiluumi huje, abhalwi bha bhahunʼkhobheehanya ʉmʼomba mbiibhi, bheegaje amenda gaakwe. Bhahaduunya ɨnduunya† bhahaduunya ɨnduunya Lumo abhalwi bhaala bhahabhɨɨshɨle ʉtusanzʉ twa tuli nɨ vimanyishizyo awe amawe ga gali na mataawa mu shɨlɨɨlo. Bhahabhombile ɨsho huje, weenu ayeeje hantu heenu mu bheene. huje, weenu anza hweje mwenda bhʉlɨ. Bhaazya ɨNsalifyo (Zaburi) 22:18. 25 Lwa bhahunʼkhomeela, yahali mu saala ɨya taatu nɨndaabhɨ.

26 Bhahasimbile pamwanya pa shikhobheehanyo ɨnsimbo ɨzyɨ malando gaakwe, zyahagaga, “ɄNɄ YɄ MWƗNƗ WA BHAYAHUUDI.” 27 Bhahanʼkhomelɨɨye na bhabhomba mbiibhi bhabhɨɨlɨ pa vikhobheehanyo. Weeka bhahanʼkhomelɨɨye hu bhazu ʉlwa hu ndɨɨlo ʉlwa Yeesu nʉ wamwabho hu bhazu ʉlwa hu mongo. 28 Ɨpo zyahabhombeha ɨNsimbo ɨMfinjile zya ziyiga, “Bhahamʼaazizya peeka na bhabhomba mbiibhi.” # Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani. 29 Abhantu bha bhahashɨzanyaaga mwi dala paala, bhahanʼigaga na yinzye amatwe gaabho bhahagaga, “Oogo! Awe, wʉ bhugulanya ɨnyumba ɨmfinjile ɨya Ngʉlʉbhɨ na huyizenje nantele hu nsiku zitaatu! 30 Ɨshi leelo, teenye ʉhwifyʉle weewe, ʉyiishe pa shikhobheehanyo ɨpo.” 31 Bhope abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose bhonti peeka, bhahanʼigaga ʉYeesu. Bhahabhʉzanyaaga bheene bhahagaga, “Bhaya, ahabhafyʉlaga abhanjɨ, leelo apootwa ahwifyʉle yʉʉyo! 32 Bhasi, ʉmwene ahwiyanga huje, yʉ Kilisiti, ʉMwɨnɨ Wa Bhaizilaeeli. Ɨshi teenye ayiishe pa shikhobheehanyo huje, tinʼole na humwɨtɨshe.” Na bhantu bhaala, bha bhahakhomelɨɨlwe pa vikhobheehanyo peeka nawo, bhope bhahanʼigaga.

33 Afume mu saala nʼtanda pasanya afishe mu saala ɨlya fundihandwɨmo (9), hwahabha hiisi mu nsi yonti. 34 Pa mu saala ɨlya fundihandwɨmo (9), ʉYeesu ahakhoola ɨhoolo ɨngoosi ahaga, “Eloyi, Eloyi, lama sabakitani?” Hwa huje, “Ngʉlʉbhɨ waanɨ, Ngʉlʉbhɨ waanɨ, yeenu wandeha?”  Bhaazya ɨNsalifyo (Zaburi) 22:1. 35 Abhantu bhamo bha bhahɨmɨlɨɨye paala, lwa bhʉmvwa ʉYeesu zya yanga, bhahaga, “Ahunʼkwizya yʉ Eliya ʉnʼkuwi wa Ngʉlʉbhɨ.” 36 Ʉmuntu ʉmo ahashɨmbɨla nalinaali, ahazubhiha ahakʉsʉ mu divaayi ɨndozu, ahapinyiila mwi lanzi itali. Ahalibhʉʉsya humwanya, ahamʼpeela ʉYeesu huje, amwele. Ʉmuntu ʉyo ahayanga huje, “Leshi teenye nkashele ʉEliya abhala hwɨnze humwisye pa shikhobheehanyo ɨpo!” 37 ɄYeesu ahakhoola ɨhoolo ɨngoosi, ahafwa pɨnɨɨpo. 38 Ɨpo igolole‡ Igolole ɨlyo lyahazigaga abhantu bhasahatʉʉhaje aPafinjile Pa Pafinjile, pa khala ʉNgʉlʉbhɨ. Igolole ɨlyɨ nyumba ɨmfinjile ɨya Ngʉlʉbhɨ lyahali nanshi igolole ɨli sebhele ifinjile ɨlya Ngʉlʉbhɨ. Bhaazya aFume (Kutoka) 26:31-33; aBhaebulaniya 6:19; 10:19-22. lyahazembuha, lyahalehaana pabhɨɨlɨ afume pamwanya afishe pansi aPafinjile Pa Pafinjile mu nyumba ɨmfinjile ɨya Ngʉlʉbhɨ. 39 Ʉnʼongozi ʉmo ʉwa bhalwi wa hɨmɨlɨɨye pitagaalila lya Yeesu, lwa wanʼola ʉYeesu afwa nanshi shiila, ahayanga huje, “Lyoli ʉmuntu ʉnʉ ahali Mwana Wa Ngʉlʉbhɨ!”

40 Bhahali abhashɨ bha bhahenyaaga sha hutali. Mwʉnʉʉmwo ahali ʉMaliya ʉwa hwi booma ɨlya hu Magidaala, ʉSaloome nʉ Maliya ʉnyina wa Yoose nʉ Yaakobo ʉnʼdoodo. 41 Abhashɨ ɨbho bhahamʼɨnjɨlɨzyaga na humʼombele ʉYeesu mu habhaazyo ɨho, lwa hali hu mukowa ʉgwa hu Galilaaya. Bhahali paala na bhashɨ abhamwabho abhinji lwene, bha bhahabhalile peeka nawo hwi booma ɨlya hu Yelusaleemu.

42 Isiku lyɨnɨɨlyo lyahali pa Shihaanu, isiku lya huhwilɨngaanye hu nongwa yɨ Sabaato§ ƗSabaato yahandaga isanya lwa liswa pa Shihaanu afishe lwa liswa pa Shiyeeluka. Ɨndajizyo zya Bhayahuudi saga zihwɨtɨha asyɨle ʉmuntu pi siku ɨlyɨ Sabaato. ɨya Bhayahuudi apuute na tʉʉye. Lwa hwapalamila lyabheela, 43 ahɨnza ʉmuntu ʉmo wa bhahagaga ʉYoosefu, nʼkhaaya wi booma ɨlya hu Alimasaaya. Ahali wɨ nshɨnshɨ haani, nantele ahali palushimo mwi koloti igoosi ɨlya Bhayahuudi. Nantele, ahasʉbhɨlaga ahwɨnze hwɨ wumwɨnɨ wa Ngʉlʉbhɨ. Ʉyo ahabhala hwa Pilaato sinta lyoga hunʼaabhe huje, amwɨtɨshɨzye abhale agweje ʉmʼvimba gwa Yeesu, agusyɨle nalinaali.

44 Ɨpo ʉPilaato lwa wʉmvwa huje, ʉYeesu afwiye nalinaali shɨɨsho, ahaswiga! Ahanʼkwizya ʉnʼtwale huje, asimishizye nkashele ʉYeesu afwiye lyoli. 45 Lwa wasimishizya huje, ʉYeesu afwiye, ʉPilaato ahamwɨtɨshɨla ʉYoosefu huje, agweje ʉmʼvimba. 46 Ɨpo ʉYoosefu wope ahakala ikɨbha ɨlyɨ mpɨɨya ɨngoosi. Ahabhala pa shikhobheehanyo paala, ahiisya pansi ʉmʼvimba gwa Yeesu, ahagukwinshila ni kɨbha liila. Ahagubhʉʉsya, ahabhala, ahagubhɨɨha ʉmʼvimba guula mu nkʉngwa ya yahabaniilwe mwi lyalawe na hulibhungulusye iwe igoosi. Ahalibhɨɨha pa lyango pa nkʉngwa, ahadinda. 47 Bhope ʉMaliya ʉwa hu Magidaala nʉ Maliya ʉnyina wa Yoose nʉ Yaakobo ʉnʼdoodo bhahenyaaga pa bhahasyɨlaga.