Ɨkalaata ɨya nʼsontwa ʉPaulo hwa
Tiito
Ʉtagaalizyo
Ɨkalaata ɨnɨ yahasimbwilwe nʉ Paulo, ʉnʼsontwa wa Yeesu Kilisiti hwa Tiito (bhaazya Tiito 1:1, 4). Ɨbhoneha huje, ahasimbile mu maaha ga mu 65 awe ga mu 66 ɨshi, afume ʉYeesu lwa wapaapwa. Ahanʼsimbiiye ʉmuntu ʉla bhahagaga Tiito. Ʉmuntu ʉyo ahakhalaga hwi booma ɨlya hu Kileete. ɄTiito ahali Nʼyunaani, ahapɨnduushe ʉPaulo lwa halʉmbɨlɨlaga (bhaazya Tiito 1:4; aBhagalatiya 2:3). Ahabhombile nʉ Paulo ɨmbombo ɨya Mwɨnɨ ʉYeesu Kilisiti ɨnsiku nyinji. Ahabhaazyo hamo, ʉPaulo ahanʼsontelezyaga abhombe ɨmbombo ɨya Mwɨnɨ mu vipanga vimo (bhaazya 2 aBhakolinto 7:6-15; 8:6, 16-24). Ahabhaazyo hamo bhahabhombaga peeka (bhaazya Tiito 1:5).
Ɨnsɨɨbho ɨya Paulo asimbe ɨkalaata ɨnɨ, yahali ya humʼʉʉzye ʉTiito huje, amalɨɨzye ɨmbombo ya bhahayileshile, ya bhahali peeka mu Kileete. Ɨmbombo nyeene yahali ya salule abhenyeelezi mu vibhanza na hubhajinjizye aBhakilisiti abha mu Kileete, pɨpo bhahalɨɨho abhamanyizyi abhi lenga (bhaazya Tiito 1:9-16; 3:9-11).
1
ɄPaulo ahunʼamuha ʉTiito
Anɨ nɨ Paulo, ʉmʼomba mbombo wa Ngʉlʉbhɨ, ʉnʼsontwa wa Yeesu Kilisiti, nɨɨnɨ ɨhusimbila awe Tiito. Ansonteleziizye hwa bhantu ɨbho, ʉNgʉlʉbhɨ yʉʉyo abhasaluuye huje, bhabhe nʉ lwɨtɨho, bhazimanye ɨzya nalyoli zyonti zya zileeta ɨnjendo ɨnyinza pa maaso ga Ngʉlʉbhɨ. Ʉlwɨtɨho na manye ɨlyoli ɨyo, visimishizya ʉlusʉʉbhɨlo huje, bhahawaaje ʉwʉʉmi ʉwa wiila na wiila. Mu habhaazyo ɨnsi shɨ sɨɨle apelwe, ʉNgʉlʉbhɨ ya saga ayanga ilenga, ahabhɨshɨɨye ʉfingo hu wʉʉmi wʉʉwo. Ahabhaazyo ha hakhondɨɨye lwa haafiha, ahabhabhʉʉzya abhantu ɨNongwa ɨNyinza ɨzya Yeesu hwi dala ɨlya lʉmbɨɨlɨle hwanɨ. ɄNgʉlʉbhɨ ʉMʼfyʉli weetu yʉʉyo ahalajiziizye huje, ɨndʉmbɨlɨlaje.
Awe Tiito, we ɨhusimbila ɨzi, we mwana waanɨ lyoli mu lwɨtɨho lwa tili nalwo. ɄDaada ʉNgʉlʉbhɨ nʉ Mʼfyʉli weetu ʉYeesu Kilisiti bhallolelaje ʉwiila, na hupeele ʉtengaanu.
Ɨmbombo ɨya Tiito mu Kileete
Nahalleshile hu Kileete huje, ʉmalɨɨzye alɨngaanye zyonti zya zyahasyalile, na hubhabhɨɨshe abhagoosi mu vibhanza vya mu mabooma gonti, nanshi nahalajiziizye. Wowonti ʉya sibhanje nʼgoosi wɨ shibhanza, akhondɨɨye huje, bhagandi ahunʼyanje ɨmbiibhi nazimo. Abhanje nʉ nʼshɨ weeka, agandi asʉngwe abhashɨ abhanjɨ. Abhaana bhaakwe bhakhondɨɨye huje, bhabhanje nʉ lwɨtɨho, bhagandi abhe na mashento na mampʉlɨ. Ʉmwenyeelezi ʉnʉ akhondɨɨye huje, bhagandi ahunʼyanje ɨmbiibhi nazimo, pɨpo abha asaluulwe nʉ Ngʉlʉbhɨ abhombe ɨmbombo yaakwe. Nantele, asahabhanje muntu wa li na mashento, awe ya viitwa nalinaali. Nantele, asahabhanje mwezi, awe ya li mwandiizi, awe ya li mʼpafu. Lyoli akhondɨɨye huje, abhanje muntu ʉya poshela abhajenu. Aziganaje ɨnyinza, abhanje nʼtengamazu, abhombaje zya zihwanziwa. Abhanje muntu nʼsangalusu ʉya hwijela. Akhataje amazwi agɨ lyoli, nanshi sha hamanyiziiwe huje, abhamanyizyaje abhanjɨ hu manyizyo ɨngolosu, abhatolaje bha bhazikhaana.
10 Bhalɨɨho abhantu abhinji mu Kileete bha bhadindizya ɨmanyizyo zyɨ lyoli, haani aBhakilisiti bha bhafumile mwa Bhayahuudi bha bhamanyizya amiiho gaabho. Amazwi gaabho huyanje ɨzyɨ shaana lwene na khopelane. 11 Ɨbho bhakhondɨɨye huje, bhapʉmɨzɨwe amalomu gaabho. Pɨpo bhamanyizya amazwi ga saga minza, bhanangaanya ʉlwɨtɨho lwɨ khaaya ɨnyinji ɨzya Bhakilisiti. Ga gabhaazya ɨbho, bha bhakhopela abhombe ɨgo, hwa huje bhazyagaje mwʉmwo ɨmpɨɨya!
12 Bhɨɨbho aBhakileete, weeka mu bhakuwi bhɨɨbho lwene ahayanjile ahajile, “ABhakileete bhayanga ɨzyɨ malenga ɨnsiku zyonti, bhali nanshi ɨhanu ɨhali ɨmbiibhi, bhoolo, nantele bhapafu.” 13 Amazwi gɨɨgo ga gayangwilwe hwɨbho gɨ lyoli. Leelo, shɨɨsho, ʉbhadaamile haani huje, bhajinyaje mu lwɨtɨho. 14 Nantele, bhakhondɨɨye huje, bhaleshe atejeelezye ɨvilaale ɨvya Bhayahuudi, nɨ ndajizyo zya zibhɨhwɨlwe na bhantu bha bhakhaana ɨzyɨ lyoli. 15 Hwa bhantu abhagolosu pa maaso ga Ngʉlʉbhɨ, saga halɨɨho ahantu nahamo ha hagabhabhɨɨha abhe bhaavu. Leelo, hwa bhantu bha bhali bhaavu, na bha saga bhahunʼsʉʉbhɨla ʉYeesu Kilisiti, ɨvintu vyonti hwa bheene vibha vyavu. Ɨnjeele zyabho nɨ nsɨɨbho zyabho zyonti zibha nyaavu. Abhamanyizyi abhi lenga bhahamanyizyaga huje, idala ɨlya bhe bhagolosu pa maaso ga Ngʉlʉbhɨ hu hwizushe amiiho gaabho, nanshi akhaane alye ɨvyalye vimo. Bhahagaga huje, nkashele abhooziwa saga bhahwizuha amiiho ɨgo, bhabha bhaavu. ɄPaulo saga ahɨtɨhanaga na bhamanyizyi ɨbho sha bhahayangaga. 16 Bhahwiyanga huje, bhamɨɨnye ʉNgʉlʉbhɨ, leelo hu njendo zyabho, bhahunʼkhaana. Bhahumʼviisya haani, nantele saga bhahumwɨtɨha, saga bhali nɨ njendo ɨnyinza nazimo zya zikhondɨɨye. Bhaazya 2 Tiimoti 3:5.

1:15 Abhamanyizyi abhi lenga bhahamanyizyaga huje, idala ɨlya bhe bhagolosu pa maaso ga Ngʉlʉbhɨ hu hwizushe amiiho gaabho, nanshi akhaane alye ɨvyalye vimo. Bhahagaga huje, nkashele abhooziwa saga bhahwizuha amiiho ɨgo, bhabha bhaavu. ɄPaulo saga ahɨtɨhanaga na bhamanyizyi ɨbho sha bhahayangaga.

1:16 Bhaazya 2 Tiimoti 3:5.