1 Ʉbhizusyaje abhantu huje, bhahwiyisyaje hwa bhagoosi abhɨ nsi, na hubhʉmvwe. Bhahwilɨnganyaaje abhombe ɨmbombo zyonti ɨnyinza. 2 Pagandi abhe na bhantu bha bhaseeha, awe bha bhali ni bho, lyoli bhabhanje bhateehamu, nantele bhajimbiilizu hwa bhantu bhonti.

3 Hu habhaazyo haala ahɨ mandɨ, natɨ tahali bhapɨzu sinta ntiniho. Tahakhopeliilwe, tahakhatwaga mu nsʉngwo ɨnyinji nyinji lwene, nantele tahali nɨ njendo ɨmbiibhi. Tahazilanaga na lolelane ɨjɨɨla.

4 Leelo, huli na mazwi ga gayiga, “ɄNgʉlʉbhɨ ʉMʼfyʉli weetu, lwa walolesya ɨmpyana yaakwe nʉ kʉndwa waakwe hwa bhantu, 5 ahatifyʉla. Saga huje, tahabhombile aminza atɨ, leelo hu nkʉmbʉ yaakwe lwene, ahatoziizye ɨmbiibhi zyetu, ahatipaapa ʉlwa bhɨɨlɨ, ʉMʼpepo ʉMʼfinjile ahatipela shipya. 6 Ʉyo ya yʉʉla ʉNgʉlʉbhɨ ahatitiiye hu winji hwi dala lya Yeesu Kilisiti, ʉMʼfyʉli weetu. 7 Sha shɨɨsho, hu wiila waakwe ʉNgʉlʉbhɨ atɨtɨɨshe huje, tili bhasundwe, atibhɨshɨɨye huje, tejeelele ʉwʉʉmi ʉwa wiila na wiila wa tisʉʉbhɨla.”  Amazwi ɨga gahali nteelo zya Bhakilisiti abhɨ mandɨ. 8 Izwi ɨlyo likhondɨɨye alyɨtɨshe. Ɨhwanza huje, ʉlikhajizyaje hwi khone huje, bhaala bha bhamwɨtɨɨshe na hunʼsʉʉbhɨle ʉNgʉlʉbhɨ, bhizuhaje abhombe aminza. Likhondɨɨye abhombwe, nantele lihwavwa abhantu.

9 Peeka nɨɨgo, ʉseguhaje amadali agɨ shikwesu, aga bhambishe amataawa ga bhamaama bha bhahafwiye, awe adaliihane hu gaala ga gali mu ndajizyo. Ɨgo gonti saga gatʉʉla nahamo, lyoli, gɨ shaana lwene! 10 Ʉmuntu wowonti ʉya lumanya abhantu, ʉnʼsundaje, hwope habhɨlɨ honti. Nkashele saga ahwʉmvwa, ʉmwefwaje mu shibhanza. 11 Halɨ ʉmɨɨnye huje, ʉmuntu nanshi ʉyo, ananjiishe, nantele mʼomvi wɨ mbiibhi, ahwimelile mwene.

12 Ahabhaazyo haala ɨhaihunʼsonteelezya ʉAlitema awe ʉTikiiko huliiwe, ʉkhalaganyaaje ahwɨnze hwi booma ɨlya hu Nikopooli ʉhwu huje, tikhomaane hwʉnʉʉhwu. Ɨhaibhala asyale hu Nikopooli mu habhaazyo ahi sasa. 13 Ʉbhombe hu dandamazu wonti abhaavwe ʉZeena, ʉya lambila abhantu, nʉ Apoolo. Bhasahabhulilwe ahantu nahamo lwa bhashʉʉla. 14 Abhantu bheetu bhamanyilaje abhombe aminza huje, bhabhapeelaje abhantu abhanjɨ ɨvintu vya bhabhuliilwe ɨnsiku zyonti. Ɨpo abhantu bheetu bhahaibhakhondezyaga abhanjɨ mu khalo waabho.

15 Abhantu bhonti bha tili peeka, bhahulamuha. Nawe, ʉtilamushilaje aBhakilisiti abhamwetu bha bhatiganile mu lwɨtɨho. Ʉwiila wa Ngʉlʉbhɨ wubhanje peeka naamwɨ mwenti.