Kihanga mu nsengo ya Nguluvi
3
1 Vahuvililaaji vayangu, pina nikhandi kunyeenyu nisikhandi nilogola noomwe ngaja shina nilogola na vaanu vina vilongosewa nu Numbula uMunofu. Leelo nikhandi nilogola noomwe ngaja shina nilogola na vaanu vina vilongosewa ni njowo sa mu nyi, awu ngaja vaana avashaali mu lihuuvi lya Kilisito. 2 Nikhandi nikivangʼwesa utupyo hela, nisikhavalisiise ishakiilya, kwa kiiva ndi musikhakwiliile kiilya. Hata lino musikwiliile, 3 kwa kiiva mushaanali mulongosewa ni njowo sa mu nyi. Wuli, nda munyeenyu kuna wushooyo ni libaatu, ago gasiwonensa kiija mushaanali mulongosewa ni njowo sa mu nyi, na mwikhala ngaja vaanu va mu nyi? 4 Niijova ilyo kwa kiiva avaanu vamonga vilogola gaanave, uyunji iijova, “One nili wa Pawulo,” uyunji iijova, “One nili wa Apolo.” Lino ago giwonensa kiija, mushaanali mwigaha ngaja vaanu va mu nyi.5 Lino, uApolo yu naani? Na one Pawulo yuune naani? Ose tili vavanda hela va Nguluvi. UNguluvi wátufilikhaga kivakhoma mumuhuviilile uMutwa uYeesu. Shila muunu wágahile ngaja shina wápelwagwa nu Mutwa. 6 One navyalaga imbeyu, uApolo wáyitililaga, uNguluvi yumwene yuna wámesaaga na kikusa. 7 Lino uNguluvi yuna iikusa yumwene wa kitiilwa, ndaali umunya kivyala awu umunya kiyitilila. 8 Umuunu yuna ivyala na yuna iyitilila woona vana lugulumilo lumo, uNguluvi akhamupeela shila muunu amahombo gaakwe, ngaja shina wásengaga insengo yaakwe. 9 Ose woona tili vasenga nsengo va Nguluvi, na omwe muli mugunda gwakwe, khanji muli nanda yaakwe.
10 UNguluvi kwa mota yaakwe wánitanjilisa kisenga uluutu ngaja musengaaji munofu, khanji munya wumanyi, na umuunu uyunji isenga pa luutu ulo. Leelo, shila muunu ayangalile wunofu, shina isenga pa luutu ulo, 11 kwa kiiva uluutu luna lusenjiilwe yu Yeesu Kilisito yumwene. Kusiina umuunu yuna akwiliile kiviikha ulunji. 12 Pa luutu ulo, umuunu akwiliile kisenga kwa sahaabu awu kwa hela, awu kwa mangʼanga ga lifungu likhome, kwa mapishi, awu kwa masole, awu kwa mapepete. 13 Leelo insengo ya shila muunu yikhawonekha kiija, yili shihwana wuli. Ilijuva lila ilya wuhigo, insengo soona sikhava bahawuvalafu, kwa kiiva insengo ya shila muunu yikhajelwa kwa mooto gwa wuhigo. 14 Nda insengo ya muunu yisingamale, umuunu uyo akhaposheela amahombo. 15 Leelo nda insengo ya muunu yipye, apo asiipata amahombo. Uyo yumwene akhakulusiwa, leelo akhava ngaja muunu yuna wákulukha mu mooto.
16 Aasi, musimeenye kiija omwe muli nanda ya Nguluvi, khanji uNumbula wa Nguluvi iikhala mukhati yeenyu? 17 Lino umuunu nda ananje inanda ya Nguluvi, uNguluvi akhamunanga umuunu uyo, kwa kiiva nanda ya Nguluvi, inanda iyo yiyeene omwe.
18 Shila muunu munyeenyu asikhayijangaga. Umuunu nda ikiyiwona kiija, munya wumanyi kwa kiyihwananisa na vaanu va nyi iyi, ayiviikhaje muyasu, baheene apate uwumanyi wa shiyooli. 19 Agahe ndeeno, kwa kiiva uwumanyi wa mu nyi iyi, wuyasu pa Nguluvi. Shiisho ndeeno shina yiyandiikhwe mu Mayandikhwa aManofu, “UNguluvi ikivakhata avanya wumanyi mu wusugu waanave.”a 20 Khanji yiyandiikhwe kiija, “UMutwa agameenye amahiiva ga vanya wumanyi kiija, gangaya lutono.”b
21 Lino umuunu yoyoona asikhayisufyaga kiija umwene muvanda wa mulongosaaji yumonga, kwa kiiva ose woona uNguluvi atuviishile kivatanjilisa omwe, 22 nive one Pawulo, ave uApolo, awu uPetulo. Khanji uNguluvi avapeelile ifiinu fyona ifya kivatanjilisa, five fya mu nyi, awu wuumi, awu mfwa, fina fikwali lino, awu fina fikhava fikwali, fyona fyenyu. 23 Khanji omwe muli vaanu va Kilisito, nayu Kilisito woope, wa Nguluvi.