Umwanandeje uPawulo wáyandikhaga ibalula iyi kwa vahuvililaaji ava ku lijumbi lya Kolinto. Ilijumbi ilyo, likhandi lijumbi likhome mu nyi ya Akaya ku Wuyunaani, khanji likhandi limanyikha mandu mu nyi yoona iya Wuyunaani. Ibalula iyi yikhandi ya kivakhangasa inumbula aVakolinto, kwa kiiva yumwene yuna wáshiyansaaga ishipuga sha vahuvililaaji ava ku Kolinto. Pina asinayandishe ibalula iyi, kunyuma akhandi ikivajendela na kivatwalila ibalula, leelo avahuvililaaji vamonga ava shipuga isho vakhandi vanangeene na kibagunkhana mu lihuuvi. Baheene wáyandikhaga ibalula iyi, kivatanga vapulinkhane pina asinaafishe ku Kolinto.

Yiwonekha kiija, avahuvililaaji vamonga vakhajovile kiija uPawulo asikhasiyangaliile wunofu ihela sa shipuga sha vahuvililaaji va Kilisito, khanji vakhandi viijova kiija umwene asili mwanandeje wa shiyooli. Ndeeno mu balula iyi, itaviilila kiija umwene yu naani, khanji itaviilila ulwa nsengo ya kikhoma iMola iNofu, yina uNguluvi wámushemelelaga kikhoma. Khanji ikivamanyisa avahuvililaaji kiija, vavatangaje avahuvililaaji ni fipuga fyona fya vahuvililaaji va Yeesu, kwa hela saanave.