2 Imota nu wulindamafu kihuma kwa Nguluvi uWiheesu nu Mutwa uYeesu Kilisito, five lumo noomwe.

3 Atunwajwe uNguluvi, uDaada wa Mutwa weesu uYeesu Kilisito, uDaada yuna ikitusungupila, khanji yu Nguluvi yuna ikituyishilisa mu goona. 4 Umwene ikituyishilisa mu malava goona, baheene na yuuse tikwiliile kivayishilisa avanji vina vali mu malava gina gali paayo paayo. Tikivayishilisa ngaja uNguluvi shina ikituyishilisa ose. 5 Kiiva, tiishila mandu kilava ngaja uKilisito shina wálavaga, shiisho ndeeno uNguluvi akhashila kituyishilisa. 6 Hata nda tiilava, tiilava kwa kiiva ya luvatamyo nu wukulukho weenyu. Khanji, ose pina tikhayishilisiwa, baheene na yuumwe mukhayishilisiwa na kiyijimfilisa mu malava gina na yuuse tiilava. 7 Uluhuviililo lwesu kunyeenyu lukhome, kwa kiiva taamanya kiija nda mulave ngaja ose, shiisho ndeeno shina mukhayishilisiwa ngaja ose.

8 Vahuvililaaji vayeesu, tisakula mumanye shina talavaga mu nyi ya Asiya. Amalava gina gatupataga gatulafyaga mandu, mbakha tikhandi tihiiva kiija tisiifwe. 9 Shiyooli tikhandi ngaja vaanu vina vahijiilwe kibudwa. Ilyo lyasenjekhaga ndeeno, kiija tileshe kihuviilila ingufu seesu, ila timuhuviilile uNguluvi, yuna ifyusa vina vafwile. 10 Uyo yumwene yuna wátukulusaaga pina tikhandi mu hataali ya kiifwa, khanji akhatukulusa. Ose tikimuhuviilila umwene kiija akhava iigaha shiisho shila luhaavi. 11 Hata na yuumwe, mukitutanga mu mafuunyo geenyu kwa Nguluvi. Umwene ipulikha amafuunyo geenyu na kituyimiila ose, baheene avaanu vinshi vasimuhonjese uNguluvi.

12 Lino ose tikiyisufya kiiva, tikiyiwona mu numbula seesu kiija, tikheele kwa wugolofu na kwa shiyooli kihuma kwa Nguluvi pa nyi apa, mandu mu omwe. Tisikhakheele kunyeenyu, kwa kilongosewa nu wumanyi weesu yuuse, leelo kwa mota ya Nguluvi. 13-14 Mu ilyo, tikivayandishila amaswi gina mukwiliile kiyimba na kigamanya wunofu. Hata yive uluhaavi ulu mutumeenye padoodo, nihuviilila kiija, mukhatumanya khabisa. Ndeeno, mukhayihala ulwa ose mu lisiku lina akhatina uMutwa uYeesu, ngaja ose shina tikiyihala ulwa omwe.

15 Kiiva nikhandi nihuviliile kiija, ilyo mwalimanya khabisa, naviikhaga ulugoto ulwa kitala kiyinsa kunyeenyu. Mu ilyo, ndi mwayimililwagwa mandu, kwa kiyinsa one kunyeenyu mala khavili. 16 Nagulumilaga kishilila kunyeenyu uluhaavi luna niiluta ku nyi ya Makedoniya, baheene pina nikhava naahuma ku Makedoniya nikhatine khanji kunyeenyu. Apo baheene mukhanipeele umutango ugwa kiluta ku Yudeya. 17 Lino naseetula ulugoto lwangu ulwa kiyinsa kunyeenyu. Wuli, muhiiva lino kiija nina shibindubindu kwa kiiva nalamula kiseetula ulugoto lwangu? Pamonga muhiiva kiija, one nilamula kwa lugano lwangu, kiija, “Eena” baheene khanji nijove, “Ndaali!”

18 Leelo lino, uNguluvi muyinatifu, khanji umwene ameenye gina tavajovelaga omwe gasikhandi ga kijova, “Eena” baheene khanji, “Ndaali.” 19 Niijova ndeeno, kwa kiiva uYeesu Kilisito uLusawo lwa Nguluvi,^d yuna one Pawulo, uSilwano nu Timoteo, tamukhomaga kunyeenyu, asikhandi muunu wa kihansa amaswi kiija, “Eena” baheene khanji, “Ndaali.” Leelo, kwa mwene nsiku soona iija, “Eena, kwa naahiso soona isa Nguluvi.” 20 Uluganulo lwakwe, goona gina uNguluvi wátahisaaga giwonekha ga shiyooli, kwa nsila ya Yeesu Kilisito. Khanji kwa kiiva ya mwene uYeesu Kilisito tiijova, “Amina,” kimutupikha uNguluvi, lulwene kiija, gina ilogola ga shiyooli. 21 UNguluvi yumwene yuna ikitukhangasa ose na omwe, khanji atubagwile kiiva vahuvililaaji va Kilisito 22 na kituviikha ishimanyilo isha kiiva vaanu vaakwe, kwa kitupeela uNumbula uMunofu.^e

23 UNguluvi ameenye kiija gina nilogola ga shiyooli, one nisikhayinsile khanji ukho ku Kolinto, kwa kiiva nisikhandi nisakula kivalemasa mu numbula seenyu. 24 Yisili kiija ose tisakula kivajovela gina mwisakulwa kiyinatila mu lihuuvi, kwa kiiva omwe mukhangeele mu lihuuvi. Ishiinu shina shisakulwa kunyeesu, kisenga insengo lumo noomwe, baheene mushendeeve.