6
1 Lino, ose tisenga insengo lumo nu Nguluvi, kwa kiiva ya ilyo tikivalomba kiija, imota ya Nguluvi yina mwaposheelaga, musikhalekhaji yiyaje shiishi. 2 UNguluvi ilogola kiija,“Uluhaavi luna lufwaya, nakupulikhaga,
ilisiku lya wukulukho, nakutangaga.”a
Puliisa, ulu luhaavi luna lufwaya, ili lisiku lya wukulukho!
Ulugugumilo mu wuvanda wa Mutwa
3 Lino tisiigaha lyolyona lina likuvasa avanji kiija, uwuvanda weesu wusikhapikhwagwa. 4 Ila mu goona tiwonensa kiija, tili vavanda va Nguluvi. Tiwonensa ilyo kwa nsila ya kiyijimfilisa mandu mu malemaso na mu malava minshi. 5 Uluhaavi ulunji tiitowa, tidindilwa mu shifungo, tiyovelesewa ni fipuga fya vaanu, tisenga insengo inkhamu, tiigona meeho, tiihwa tisiilya na kigonela. 6 Leelo tiigaha ago goona kwa wugolofu, wumanyi, lugugumilo, lusungu, kwa kilongosewa nu Numbula uMunofu nu lugano luna lungaya wumyansi. 7 Khanji kwa nsila ya kikhoma iliswi lya shiyooli, tiigaha ago goona kwa ngufu sa Nguluvi. Uwugolofu, wuweene malala yeesu, ulubali lwa kundiilo nu lwa kunshiji, uluganulo lwakwe kitovela na kisivila. 8 Ose tiyihumiise, yive avaanu vatutupishe awu vatusale, yive vatujove finofu awu vatujove fivi. Vikitwaga tili vadehi, humbe tiijova ga shiyooli, 9 vikitwaga tisimanyikha, humbe timanyikha wunofu, tiwonekha ngaja tifwile, humbe tili wuumi, titoviilwe mandu, leelo tisifwile. 10 Khanji vikitwaga ngaja tisugumiilwe, leelo uluhaavi loona tina wushendeefu, tiwonekha tili vapiina, leelo vinshi tivapeelile uwusi, tiwonekha tisiina shoshoona, leelo tina fiinu fyona.
11 Omwe Vakolinto, tavayandishila tisivafihile shoshoona, khanji talogolaga kwa lugano lukhome. 12 Ose tisileshile kivagana omwe, leelo omwe, muleshile kitugana ose. 13 Lino nilogola noomwe ngaja nilogola na vanangu, mutuganaje mandu ose, ngaja shina ose tivageene omwe.
Kihansinkhana na vaanu vina vasili vahuvililaaji
14 Musikhahangaji na vaanu vina vasili vahuvililaaji. Wuli, uwugolofu nu wunansi fikwiliile kiiva shipuga shimo? Uwuvalafu ni nshiisi fikwiliile kiiva panu pamo? 15 Khanji uKilisito nu Shetaanib vakwiliile kipulinkhana? Umuhuvililaaji na yuna asili muhuvililaaji, vakwiliile kiiva shipuga shimo? 16 Inanda ya Nguluvi, yikwiliile kiiva shipuga shimo ni sanaamu isa manguluvi? Ose nanda ya Nguluvi, yuna muumi! Ngaja uNguluvi yumwene shina wájovaga,
“Nisiikhale kuveene
na kijenda lumo na veene.
Nikhava Nguluvi waanave,
woope vakhava vaanu vangu.”c
17 Kwa kiiva ya ilyo uMutwa uNguluvi iijova,
“Muwuushe kuveene,
muyibaagule nawo.
Musikhakhataji ishiinu sha mwikho,
baheene na yuune nikhavayanushila.”d
18 “Nikhava nili Wiheenyu,
na yuumwe mukhava vanangu va shigoosi na va shidala.
UMutwa uNguluvi uMunya Ngufu Soona, ilogola!”e