2 Mutuposheele kwa numbula seenyu, kwa kiiva kusiina yuna timunanjiile, kusiina yuna timulemeese mu lujowo loloona, awu yuna timujanjiliise. 3 Nisiijova amaswi aga kwa kivahiga. Leelo ngaja shina nalogolaga ulwamwandi kiija, omwe muli mukhati mu numbula seesu. Ndeeno tili lumo noomwe mu wuumi uwu, hata yive kiifwa. 4 Nilogola noomwe kwa wukhangafu, khanji nikiyisufya mandu kwa kiiva ya omwe. Hata nda tiilava mu minshi, munijimfiliise mandu na mwanigaha nive nu wushendeefu wukhome.

5 Taganaga kifikha ku nyi ya Makedoniya tisikhatuyiile, kwa kiiva tikhandi na malava imbali soona, kunja kukhandi na valugu, mukhati mu numbula seesu tikhandi titungumeele. 6 Leelo uNguluvi yuna ikivavatamya vina vayoolopwe, wátujinia kwa nsila ya kiyinsa uTito. 7 Yisili kiija takhangasiwaagwa kwa nsila ya kiyinsa uTito hela, leelo na shina mwamukhangasaaga umwene. Wátujovelaga na shina muna lihaahi mandu ilya kinyaaga one, na shina musugumilwa na kinilavila one. Ago ganigaha kishendeeva mandu.

8 Hata yive kiija ibalula yina navayandishilaga yikhavagahile musugumilwe, nisikiyipiikha yuune. Hata ndeeno nayipiikhaga padoodo ulwamwandi, kwa kiiva nayaagaga ibalula iyo yavagahaga musugumilwe, leelo kwa luhaavi lufupi hela. 9 Leelo lino nina wushendeefu, yisili kiija nina wushendeefu kwa kiiva mukhandi musugumiilwe, ndaali! Ila nina wushendeefu kwa kiiva kisugumilwa kwenyu, kuvagahile mulambiisile uwunansi weenyu. Kisugumilwa kwenyu kukhandi ngaja shina ageene uNguluvi, mu ilyo tisikhavalemeese kwa nsila yoyoona. 10 Kiiva, kisugumilwa ngaja shina ageene uNguluvi, kwileeta ululambiisilo luna lwileeta uwukulukho. Kisugumilwa ngaja ukho, kusili kwa kiyipiikha. Leelo kisugumilwa kuna kwiyinsa kwa kiiva ya njowo sa nyi, kwileeta imfwa. 11 Loleela! Kisugumilwa ngaja shina ageene uNguluvi, kuvagahile muve nu ludali mandu, kivaleetela ulutono lukhome ulwa kisenga gina gifwaya. Kiyisaajila kiija gina mwisenga ga shiyooli, kiwukhalalila uwunansi, kimutiila uNguluvi, kiiva ni lihaahi ilya kinyaaga na kiiva ni lihaahi ilya kimwaga yuna wánangania, iyanushila ululawo lwakwe. Mu ago goona mwiwonensa kiija, musinanjile lujowo mu mola iyi.

12 Ndeeno, hata nda navayandishilaga ibalula yila, nisikhayandiishe kwa kiiva ya muunu yuna amunanjiile uyunji, awu yuna agahiilwe fivi. Leelo nikhandi nisakula kiija mumanye yuumwe pa Nguluvi, shina mwijimba kiyihumya kwa kiiva yeesu. 13 Mu ilyo mutukhangeese. Lumo na ilyo, tikhandi nu wushendeefu wukhome, uTito wáganaga kitujovela shina mwamukhangasaaga mu numbula, omwe woona. 14 One navasufyaga mandu omwe pamwene, na omwe musanihonjela nsoni. Nda goona gina tikhandi tikivajovela gakhandi ga shiyooli, shiisho ndeeno tavasufyaga omwe kwa Tito, goope gawonekha kiiva ga shiyooli. 15 Ulugano lwa Tito kunyeenyu lupiyonjelela, pina ikumbukha uluyinatilo lwenyu omwe moona, na shina mwamusajisaaga wunofu, kwa shitiilo na kitetema. 16 Nishendeeva mandu kwa kiiva yeenyu, kwa kiiva lino, nikwiliile kivahuviilila mu goona.