Kivatanga avanji kwa numbula mbalafu
8
1 Lino vahuvililaaji vayeesu, tisakula kivajovela shina uNguluvi wáfipeelaga ifipuga fya vahuvililaaji ava ku nyi ya Makedoniya, ulusungu ulwa kihumya. 2 Avahuvililaaji awo vakhandi vapiina mandu na vajelwagwa mu malava gina gakhandi paayo paayo. Hata ndeeno, vakhandi nu wushendeefu wukhome, wuna wávapinsisaaga inumbula iya kihumya ifiinu fyanave. 3 Nikivajovela omwe kiija, vahumyaga ifiinu finshi mandu, mbakha woope vashepushilwa. Khanji vahumyaga kwa kigana vaveene 4 na kitulomba mandu kiija, woope vapate imwenshe iya kihanga mu nsengo ya kivatanga avahuvililaaji ava ku Yelusalemu.a 5 Vagahaga ndeeno kishila shina tikhandi tihuviliile. Vatalaga kiyihumya aveene kwa Mutwa, baheene khanji vayihumya kunyeesu. Leelo mandu, kwa Mutwa. Vagahaga ndeeno, ngaja shina ageene uNguluvi. 6 Lino kwa kiiva ya ilyo, tamulomba uTito kiija ayinse avatanje kimaliisa insengo iyo, kwa kiiva yumwene yuna wáyiyansaaga kunyeenyu. 7 Muna shila shiinu, ilihuuvi, ishipeelwa isha kikhoma, uwumanyi na kiiva nu ludali mu goona amanofu, lumo nu lugano lwenyu kunyeesu,b ndeeno muve ni numbula inofu mandu iya kivatanga avaanu avanji.8 Pina nilogola aga, nisisakula kivakhamiilisa, leelo nisakula kimanya nda ulugano lwenyu lwa shiyooli kwa kivahwananisa nu ludali lwa vanji. 9 Omwe Vakolinto, mumeenye shina uMutwa weesu uYeesu Kilisito shina wávasungupilaga. Hata nda akhandi muwusi, wáyigahaga kiiva mupiina kwa kiiva yeenyu, baheene mu wupiina waakwe, omwe muve vawusi.
10 Lino ulwa mola iyi, nikivajovela lina lifwaya kunyeenyu. Umwakha guna gwashilaga, omwe mukhandi va wutasi kiwonensa ulugulumilo ulwa kihanga na kitala kigaha ndeeno. 11 Lino, ngaja shina mukhandi mwidobokha mandu kisenga ilyo pina mukhandi mwiyansa, muveesaje nu ludali shiisho ulwa kimala insengo iyo na kihumya kilingana ni fiinu fina munafyo. 12 Nda umuunu itawula kwa lugano lwakwe, uNguluvi ikimuposheela, kwa kiiva uNguluvi iposheela ishiinu shina umuunu akwiliile kitawula, leelo asidaayi ishiinu shina usinasho. 13 Ulugulumilo lwesu, lusili kiija omwe mulafisiwe nu musigo ugwa kivatanga avanji, baheene aveene vatuuye, leelo nisakula woona mulingaane. 14 Uluhaavi ulu pina muna fiinu finshi muvatangaje vina vasiina, baheene woope uluhaavi pina vakhava ni fiinu finshi, vakhavatanga omwe pina mukhashepushilwa. Mu ilyo musiive mulingeene, 15 ngaja shina yiyandiikhwe mu Mayandikhwa aManofu, “Umuunu yuna wákunganiaga finshi, asikhandi ni fya kisigasa, yuna wákunganiaga fisheefu, asikhashepushiilwe.”c
UTito na vayine vifilikhwa ku Kolinto
16 Nikimuhonjesa uNguluvi yuna amupeelile uTito inumbula yina ninayo one, iya kivatanga omwe. 17 Nilogola ndeeno kwa kiiva pina tikhandi tikimulomba kiija ayinse kunyeenyu, akhayitiishe. Khanji, woope akhandi ana lihaahi mandu ilya kiyinsa kivatanga. 18 UTito uyo, tikimufilikha nu muhuvililaaji muyeesu uyunji yuna ifipuga fyona ifya vahuvililaaji va Yeesu, vikimusufya kwa nsengo iya kiyalaalisa iMola iNofu. 19 Khanji ifipuga fya vahuvililaaji fyamuhagulaga umuhuvililaaji muyeesu uyo, kiija ave lumo noose pina titwala umutango ugwa hela ku Yelusalemu. Insengo iyo, yikimusufya uMutwa uYeesu, khanji yiwonensa shina tina ludali ulwa kivatanga avanji.
20 Tisakula kihegukha ulupiikho loloona, ulwa wuyimililaaji uwa kitwala ifiinu fina avaanu vatawiile kwa lusungu lwanave. 21 Ulugulumilo lwesu, tisakula kigaha wunofu pa Mutwa uYeesu na pa vaanu.
22 Tikimufilikha umuhuvililaaji muyeesu uyunji ave lumo nu Tito. Umuhuvililaaji uyo, timumeenye mu minshi, kiija ana ludali kisenga insengo, leelo uludali ulo lukhome kishila ulwamwandi, kwa kiiva ikivahuviilila mandu omwe. 23 Lino nda umuunu isakula kimanya imola sa Tito, uyu musenga nsengo muyangu, kwa nsila ya kivatanga omwe. Nda mwisakula kimanya imola isa vaanu avanji vina viyinsa lumo nu mwene, awo vahuvililaaji vayeesu, vafiliikhwe ni fipuga fya vahuvililaaji va Yeesu, woope vikimusufya uKilisito. 24 Ndeeno, muvawonensaje avaanu awo ulugano lwenyu, baheene ifipuga fya vahuvililaaji fimanye kiija, gina tikiyisufya ulwa omwe, ga shiyooli.