Avalongosaaji ava ku Yelusalemu viyiitikha amamanyiso ga Pawulo
2
1 Gaganaga kishila maakha ishumi na gana, naaluta khanji ku Yelusalemu lumo nu Balinaaba, na mu lushuulo ulu namutoola uTito naaluta nawo. 2 Nalutaga ku Yelusalemu kwa kiiva uNguluvi wánigubutulilaga kiija, nilute. Pina tikheele pashipata na valongosaaji va shipuga sha vahuvililaaji, navataviilila iMola iNofu yina nikhandi nikivakhoma avaanu vina vasili Vayahuudi. Nagahaga ndeeno, kwa kiiva nikhandi nisakula kiija avalongosaaji ava vaniyiitishe, kiija insengo yangu yisikhaveesaga ya bule. 3 Vapulinkhana noone, hata mbakha vasikhamukhamiliise uTito yuna asili Muyahuudi kisiyinatila indaji sa Musa,a kwa nsila ya kiyinjila ijando,b 4 hata nda vakhandi vakwali avahuvililaaji avanji va wudehi vina visakulaga kiija, ayinjisiwe ijando. Avaanu awo vayiyinjisaaga kwa wusugu, kiwuseesa uwuyeeshelo weesu wuna tapelwagwa nu Kilisito Yeesu, baheene vatuviishe mu wuvanda wa ndaji sa Musa. 5 Leelo tisikhapulinkheene nawo hata padoodo kiija, vasikhashisetulaga ishiyooli sha Mola iNofu, leelo shisigale noomwe.6 Leelo avalongosaaji va shipuga sha vahuvililaaji, vina vakhandi vitiilwa na vaanu, vakhandi vangaya njowo imya isa kinijovela. Shiyooli vatilwagwa mandu, leelo kunyangu one ilyo nisikilituna, kwa kiiva uNguluvi asikiwutuna uwukhome wa muunu. 7 Avalongosaaji vala vamanyaga kiija, uNguluvi wánifilikhaga kivakhoma iMola iNofu iya Yeesu, avaanu vina vasili Vayahuudi, ngaja shina wámufilikhaga uPetulo kivakhoma aVayahuudi. 8 UNguluvi yuna wámugahaga uPetulo ave mwanandeje waakwe kwa Vayahuudi, yuuyo yuna wánigahaga na yuune nive mwanandeje waakwe kwa vaanu vina vasili Vayahuudi. 9 Ino uYaakobo, uPetulo nu Yohana vina vakhandi valongosaaji vakhome, vaamanya kiija uNguluvi kwa mota yaakwe, wánipeelaga insengo iyi. Ndeeno vatukhata amawokho one nu Balinaaba, baheene yive shimanyilo sha kihanga. Tapulinkhanaga kiija, ose tisakulwa kisenga insengo kwa vaanu vina vasili Vayahuudi, aveene vasenje insengo kwa Vayahuudi. 10 Vatulombaga shiinu shimo, tiyitenekhaje kivakumbukha avapiina mu vahuvililaaji ava ku Yelusalemu ukho, ishiinu shina niiva nijimba kishisenga.
UPawulo ikimukhajila uPetulo
11 Paanyuma uPetulo wáyinsile ku lijumbi lya Antiyokiya kitujendela, ilisiku limonga namukhaniaga bahawuvalafu kiiva wápunganiaga. 12 UPetulo wáganaga kifikha, akhandi iilya ishakiilya lumo na vahuvililaaji vina vasili Vayahuudi. Leelo uluhaavi lumonga, vaganile kifikha avaanu vamonga kihuma kwa Yaakobo, wáyibaagula kwa vahuvililaaji vina vasili Vayahuudi, wáalekha kiilya nawo ishakiilya khanji. Wágahaga ndeeno, kwa kiiva wátiilaga avaanu vina vakhandi vikuviilisa kiija, avahuvililaaji woona vave viyinjisiwa ijando. 13 Baheene aVayahuudi avamonga vayansa kigaha ngaja shina akhandi iigaha uPetulo, hata nda vameenye kiija wumyansi. Hata uBalinaaba woope wáhonsiwaagwa, wáava mumyansi. 14 Ino naganaga kimanya kiija vasiigaha kifwatana ni shiyooli sha Mola iNofu, namujovela uPetulo bahawuvalafu pa vaanu woona kiija, “Owe uli Muyahuudi, leelo uwiikhasi wáakho wuli ngaja muunu yuna asili Muyahuudi! Lino, kwashi ukivakhamiilisa avaanu vina vasili Vayahuudi kiyinatila ingʼoma sa Vayahuudi?”
Avaanu woona vikulusiwa kwa kimuhuviilila uKilisito hela
15 Shiyooli ose tili Vayahuudi kwa kisawa, ndeeno tisili ngaja avaanu vina vasili Vayahuudi, vina tikivajova “vanansi.” 16 Ose timeenye kiija, avaanu vivasiwa nu Nguluvi kiiva vagolofu, kwa kimuhuviilila uYeesu Kilisito hela, leelo yisili kwa kisiyinatila indaji sa Musa. Ndeeno na yuuse tikimuhuviilila uKilisito Yeesu, baheene tivasiwa kiiva vagolofu kwa kiiva ya gina wágahaga uYeesu, yisili kwa kisiyinatila indaji sa Musa. Shiyooli kwa kisiyinatila indaji sa Musa, kusiina yuna akhavasiwa kiiva mugolofu.c
17 Ino, nda tisakula kivasiwa kiiva vagolofu kwa kilungana nu Kilisito, avanji vasiijove kiija tiveele vanansi, kwa kiiva tisiyinatila indaji sa Musa. Wuli, aga giwonensa kiija uKilisito ikitugaha kiiva vanansi? Ndaali, hata padoodo! 18 Leelo nda nitine khanji kihuviilila ulugoto ulwa pawukuulu ulwa kiyinatila indaji, luna nakhaanaga, apo shiyooli nili munansi. 19 One pina nikhandi nikisiyinatila indaji sa Musa, indaji iso sikhandi sikinihiga. Leelo uluhaavi ulu, nisiijela khanji kikhala kwa kisiyinatila indaji iso, baheene uwiikhasi wangu wuve ngaja shina isakula uNguluvi. 20 Uwiikhasi wangu uwa pawukuulu wakhomelelwagwa lumo nu Kilisito pa musalaaba, leelo uluhaavi ulu nili muumi, leelo nisili muumi one, ila yu Kilisito yuna muumi mukhati yangu. Uwuumi wuna ninawo uluhaavi ulu, ninawo kwa kimuhuviilila uLusawo lwa Nguluvi. Umwene wániganaga, wáwuhumyaga uwuumi waakwe baheene anikuluse. 21 Shiyooli, yisili kiija nikhaana imota ya Nguluvi. Nda umuunu akwiliile kiiva mugolofu kwa kisiyinatila indaji sa Musa, ino uKilisito wáfwisaga bule!