UYeesu mukhome kishila uMusa
3
1 Omwe vahuvililaaji vayangu, muna muli vabaagule, muna mushemeliilwe nu Nguluvi lumo noose, mumuhivililaje mandu uYeesu uMwanandeje wa Nguluvi na Mutambule Mukhome yuna tikimuhuviilila. 2 Uyo uYeesu akhandi muyinatifu kigaha goona gina uNguluvi wámubagulaga kiija agagahe ngaja uMusaa woope shina akhandi muyinatifu kivalongosa avaanu va nanda ya Nguluvi, aVaisilaheli.b 3 Umusengaaji ipeelwa ilishima kishila inanda yina asenjile, shiisho ndeeno uYeesu woope isakulwa kitiilwa mandu kishila uMusa. 4 Kiiva shila nanda yisengwa nu musengaaji yumo, leelo uNguluvi yumwene yuna Muwumbaaji mukhome wa fiinu fyona.5 UMusa akhandi muvanda muyinatifu kwa Nguluvi, kivalongosa avaanu va nanda ya Nguluvi. Insengo yaakwe yikhandi shihwano sha shiyooli, shina uNguluvi ndi wávagubutulilaga avaanu kumwandi. 6 Leelo uKilisitoc muyaminifu ngaja Lusawo, yuna muyimililaaji wa vaanu va nanda ya Nguluvi. Ose tili vaanu va nanda yaakwe, nda tikiyitenekha kiyikhangasa mu numbula na kiyihalila mu gala gina tihuviilila.
Amapavilo aga kilekha kihuviilila
7 Ino puliisi gina uNumbula uMunofu ilogola mu Mayandikhwa aManofu iija,
“Iminsiyaano, pina mupulikha iLiswi lya Nguluvi,
8 musikhagahaji inumbula seenyu kiiva nyuumu
ngaja shina avambuyeenyu vakhandi vikhaana kilongosewa noone
mu luhaavi lula luna vakhandi vikinijela ku lunyikha.
9 Kiiva ku lunyikha ukho kukwene kuna avambuyeenyu vakhandi vikinijela
hata yive navagahilaga amabikha minshi kwa maakha mashumi gana.
10 Kwa kiiva ya ilyo navakhalalilaga avaanu awo naajova,
‘Avaanu ava vanansi nsiku soona,
vasigeene kiyinatila insila sangu.’
11 Ndeeno nakhalalaga na kiyiyiiga, naajova,
‘Nisikhavatawula kaa, avaanu awo,
kiyinjila mu luvala ulwa kituuya,
luna nivayandaliile.’ ”d
12 Omwe vahuvililaaji vayangu muveesaje meeho, baheene asilaave akwali umuunu yoyoona mu omwe yuna ana numbula ya wunansi, yuna asihuviilila, khanji ikhaana kimuyinatila uNguluvi yuna muumi. 13 Leelo khangasaniaji yuumwe kwa yuumwe shila lisiku lina litambulwa “iminsiyaano” baheene musikhajangwaji nu wunansi na kigaha inumbula seenyu kiiva nyuumu. 14 Ose tili lumo nu Kilisito, nda tive tikiyijimfilisa kimuhuviilila uNguluvi ngaja shina tayihuvililaga kihuma pashiyanso, mbakha kuwudugo wa wuumi weesu. 15 Kumbukhaji gina gayandiikhwe mu Mayandikhwa aManofu kiija,
“Iminsiyaano, pina mupulikha iLiswi lya Nguluvi,
musikhagahaji inumbula seenyu kiiva nyuumu
ngaja shina avambuyeenyu vakhandi vikhaana kilongosewa noone.”e
16 Wuli, vaanu vashi pina vapulikhaga iLiswi lya Nguluvi vakhaanaga kilongosewa nu mwene? Wuli, vasili woona vala vina vakhandi vilongosewa nu Musa kihuma mu nyi ya Misili? 17 Khanji wuli, vaanu vashi vina uNguluvi wávakhalalilaga kwa maakha mashumi gana? Wuli, vasili vaveene woona vina vagahaga uwunansi na kiifwa ku lunyikha? 18 Khanji wuli, vaanu vashi vina uNguluvi wáyiyiigaga kiija, asikhavatawula kaa, kiyinjila mu luvala lwakwe ulwa kituuya luna avayandaliile? Wuli, vasili vaveene woona vala vina vakhaanaga kimuyinatila? 19 Ndeeno timeenye kiija, avaanu awo vagombolaga kiyinjila pa luvala apo, kwa kiiva vakhaanaga kimuhuviilila uNguluvi.