Vahebulaniya 4

Kituuya kwa vaanu va Nguluvi

1 Ulutaahiso lwa Nguluvi ulwa kiyinjila mu luvala lwakwe ulwa kituuya, lushaanali lukwali. Ndeeno tiyivavalaje, baheene asikhaveesaga akwali umuunu yoyoona uwa kigombola kiyinjila mu luvala ulo. 2 Na yuuse tipuliishe iMola iNofu isa luvala ulo ulwa kituuya, ngaja shina avambuyeesu woope vapulikhaga. Leelo imola sina vasipulikhaga, sisikhavatanjile shoshoona kwa kiiva vasikhasihuviliile pina vasipulikhaga.^a 3 Ose vina tikimuhuviilila uNguluvi, tiyinjila pa luvala ulo ulwa kituuya. Leelo kwa awo vina vasikimuhuviilila uNguluvi, iijova,

“Ndeeno nakhalalaga na kiyiyiiga, naajova,

‘Nisikhavatawula kaa, avaanu awo,

kiyinjila mu luvala ulwa kituuya,

luna nivayandaliile.’ ”^b

UNguluvi wálogolaga ndeeno, hata nda akhandi akwisiise insengo saakwe soona kihuma kiwumbwa inyi. 4 Kiiva, mu luvala lumonga mu Mayandikhwa aManofu, yiyandiikhwe ulwa lijuva lya fungati kiija, mu lijuva lya fungati uNguluvi wátuuyaga kisenga insengo saakwe soona isa kiwumba. 5 Imola isa kituuya siyandiikhwe khanji panu, ngaja shina sijoviilwe kunyuma kiija,

“Nisikhavatawula kaa, avaanu awo,

kiyinjila mu luvala ulwa kituuya,

luna nivayandaliile.”^c

6 Hata nda avambuyeesu vakhandi va wutasi kikhomwa iMola iNofu iso, hata ndeeno vagombolaga kiyinjila mu luvala ulo, kwa kiiva vakhandi vasihuviilila gala gina uNguluvi akhandi iijova. Kwa kiiva ya ilyo, avaanu avanji vakhayinjila mu luvala ulo ulwa kituuya. 7 UNguluvi wágulumilaga ilisiku ilinji, wájovaga, “Iminsiyaano.” Timeenye ndeeno kwa kiiva saganile kishila nsiku nyinshi, uNguluvi wálogolaga khanji, ulwa luvala ulo. Wálogolaga kishilila kwa mutwa uDawudi^d ngaja shina yiyandiikhwe mu Mayandikhwa aManofu kiija,

“Iminsiyaano, pina mupulikha iLiswi lya Nguluvi,

musikhagahaji inumbula seenyu kiiva nyuumu.”^e

8 Nda uYoshuwa^f wáali ave akwiliile kivapeela avaanu ilisiku lya kituuya, uNguluvi ndi asaava akwiliile kilogola khanji ulwa nsiku isinji isa kituuya. 9 Ndeeno, lushaanali lukwali uluhaavi ulwa kituuya luna uNguluvi aluviishile kwa vaanu vaakwe, ngaja ilisiku lila ilya Sabaato.^g 10 Umuunu yoyoona yuna asiyinjile mu luvala lwakwe ulo ulwa kituuya, akhatuuya kisenga insengo saakwe soona, ngaja shina uNguluvi wátuuyaga pina wámalaga kiwumba inyi. 11 Ino, tijimbaje kiyinjila mu luvala ulo ulwa kituuya. Tive tiigaha ndeeno, baheene asilaave akwali umuunu yoyoona uwa kigombola kiyinjila kwa kiiva ya kilekha kihuviilila, ngaja shina avambuyeesu vakhandi viigaha.

12 ILiswi lya Nguluvi lyumi khanji lina ngufu, khanji likhali kishila umumaaji umukhali koona na koona. Ngaja umumaaji guna gukwiliile kihoma umuunu mbakha mu mafupa gaakwe, shiisho ndeeno iLiswi lya Nguluvi likwiliile kihoma mbakha mukhati mandu mu numbula ya muunu na kifumbulania uwupafu waakwe na kimanya gina ihiiva. 13 Khanji kusiina ishiwumbwa shoshoona shina shityejile pa Nguluvi. Leelo ifiinu fyona fili bahawuvalafu pamwene. Na yuuse tikhataviilila pamwene insengo seesu soona sina tikhandi tisenga.

UYeesu Mutambule Mukhome

14 Ino, tina Mutambule uMukhome uYeesu Kilisito, uLusawo lwa Nguluvi, yuna wálutile kushaanya kwa Nguluvi. Kwa kiiva ya ilyo, tiyinatilaje gina tihuviilila. 15 UMutambule uMukhome uyo, yumwene yuna awumeenye uwuwoto weesu. Kiiva woope wájelwagwa nu Shetaani kwa majelo gina gali paayo paayo ngaja yuuse, leelo umwene asikhagahile uwunansi. 16 Ndeeno, tisikhatiilaga kihejeela pa shitengo sha Wutwa wa Nguluvi umunya lusungu, baheene atutune na kitusungupila uluhaavi luna tili mu malava.