UYeesu yumwene shadanda sha shiluta
10
1 Indaji sa Musa shihwano sha njowo inofu sina sikhayinsa, leelo gasili gageene amanofu ago. Lulwene fyope ifyadanda fina avaanu viihumya shila mwakha kilingana ni ndaji iso, fisikwiliile kaa, kivavalasa avaanu vina vikimufuunya uNguluvi. 2 Nda indaji saali sive sikwiliile kivavalasa avaanu uwunansi waanave, ifyadanda ifyo ndi fyalekhwa kihumisiwa. Kiiva vina vikimufuunya uNguluvi ndi vavalasiwa gwalimo hela, ndeeno ndi vaava vasikiyiwona mu numbula saanave kiija, vanansi. 3 Leelo ifyadanda ifyo, fina viiva viihumya shila mwakha, fikivakumbusa uwunansi waanave. 4 Kiiva idanda ya gida ingoyo ni mene, yisikwiliile kiwuusa uwunansi wa vaanu. 5 Lulwene pina uKilisito iyinsa mu nyi iyi, wámujovelaga uNguluvi wáaja,“Owe usisakula ishadanda
wala isadaakha sa fiinu ifinji,
leelo ukhaniyandaliile umuvili guve shadanda.
6 Owe usikhanojeelwe ni fyadanda ifya kinyaanya
awu ifyadanda ifya kiwuusa uwunansi.
7 Ndeeno, nalogolaga naaja,
‘Wee Nguluvi wangu! One nili panu,
baheene nive niigaha shina ugeene owe,
ngaja shina yiyandiikhwe mu Mayandikhwa aManofu ulwa one.’”a
8 Ulwa wutasi, uYeesu wátalaga kilogola wáaja, “Owe usisakula wala usinojelwa ni fyadanda, isadaakha sa fiinu ifinji, ifyadanda ifya kinyaanya wala ifyadanda ifya kiwuusa uwunansi,” hata nda isadaakha soona iso vakhandi viihumya kilingana ni ndaji sa Musa. 9 Baheene wálogolaga wáaja, “Wee Nguluvi wangu! One nili panu, baheene nive niigaha shina ugeene.” Ino uNguluvi, wáfiwusaaga ifyadanda ifyo ifya wutasi, wápyanisa ishadanda sha Yeesu. 10 UYeesu akhandi iigaha shina ageene uNguluvi, kwa kiiva ya ilyo, uNguluvi ikitugaha tive vabaagule vaakwe, kwa nsila ya Yeesu Kilisito iya kiyihumya gwalimo hela, kiiva shadanda.
11 Kilingana nu Lufingo uLukuulu, shila lisiku avatambule va Vayahuudi, vapikimusenjela uNguluvi na kihumya ifyadanda fifila wiila wiila, fina fisikwiliile kiwuusa uwunansi kaa. 12 Leelo uKilisito wáyihumyaga gwalimo hela kwa luhaavi loona, ave shadanda, baheene atuvalase uwunansi weesu. Lino akheele ku liwokho ilya kundiilo ilya Nguluvi, mu luvala lwa lishima mandu. 13 Kihuma uluhaavi ulo mbakha uluhaavi ulu, umwene apiyiteneeshe kiheepa mbakha pina uNguluvi akhavaviikha avalugu vaakwe, pansi ya magulu gaakwe. 14 Kwa nsila ya Yeesu iya kiyihumya kiiva shadanda gwalimo hela, avavaleese na kivaviikha kiiva vaanu vaakwe shiluta na shiluta.
15 Woope uNumbula uMunofu, ibedela imola isi kunyeesu kiija sa shiyooli iijova,
16 “UMutwa uNguluvi wálogolaga wáaja,
ulu lulwene lufingo lupya
luna nikhalufinga na Vaisilaheli insiku sina siyinsa.
Nikhasiviikha indaji sangu mu numbula saanave,
nikhasiyandikha mu luhala lwanave.”b
17 Khanji ilogola kiija, “Nisikhawukumbukha khanji uwunansi waanave, wala insengo saanave imbi.”c 18 Ino, uNguluvi avasajiile avaanu uwunansi, ndeeno kusisakulwa khanji kihumya ishadanda.
Kimuhejeela uNguluvi
19 Omwe vahuvililaaji vayangu, kwa kishilila idanda ya Yeesu pina wáfwisaga pa musalaaba, ose tikwiliile kiyinjila aPanofu pa Panofu, bila kitiila. 20 Kwa nsila ya mfwa yaakwe, umwene wátudindulilaga insila imya yina yikitulongosa ku wuumi, baheene tive tiyinjila pa Nguluvi, bila kisivilwa nu mwenda ugo, uluganulo lwakwe kiija umuvili gwakwe. 21 Ose tinawo uMutambule uMukhome yuna muyimililaaji wa vaanu va nanda ya Nguluvi. 22 Ndeeno tive tiiluta pa Nguluvi ni numbula imbalafu yina yikimuhuviilila shiyooli, kwa kiiva uNguluvi atuvaleese inumbula seesu imbi, kwa nsila ya danda ya Yeesu na kigayoosa amavili geesu na malenga amanofu. 23 Jimbaji mandu kiyinatila khabisa uluhuviililo ulwa kiija uNguluvi akhatukulusa, kwa kiiva uNguluvi yuna wátahisaaga, muyinatifu. 24 Khanji tisakulwa kikhangasania inumbula, baheene tigananaje na kisenjelana amanofu yuuse kwa yuuse. 25 Tisikhalekhaga ingʼoma yeesu iya kitangaana lumo, ngaja shina avaanu avanji vasitangaana. Leelo tiyitenekhaje kikhangasania inumbula yuuse kwa yuuse, kwa kiiva timeenye kiija, ilisiku lya kitina uMutwa, lili nkholeela.
26 Nda tikiyitenekha kigaha uwunansi kwa kigulumila, kuno tishimeenye ishiyooli sha Nguluvi, ino kusiina ishadanda hata shimo shina shikwiliile kiwuusa uwunansi. 27 Leelo kwisigala hela kiheepa uwuhigo wa Nguluvi, wuna wutiisa nu mooto guna gusivabude avaanu woona vina valugu va Nguluvi. 28 Umuunu yuna akhandi ikhaana kisiyinatila indaji sa Musa, akhandi iibudwa bila lusungu, nda kuve kuna valunjikhaaji vavili awu vatatu vabedeele kiija, shiyooli wáagaha ndeeno. 29 Hiivaji! Ululawo lukhava wuli kwa muunu yuna ikimusala uLusawo lwa Nguluvi ni danda yina yiijinia ulufingo lwakwe, yina yikivagaha kiiva vabaagule va Nguluvi? Khanji, ululawo lukhava wuli kwa muunu yuna ikimutofola uNumbula uMunofu umunya lusungu? Shiyooli, ululawo lukhava lukhome khanji lukhali mandu, 30 kwa kiiva timeenye kiija, uNguluvi wájovile kiija, “Kihombesa uwunansi wuna wagahilwa, iyo nsengo yangu one yuune yuna nihombesa.” Khanji wájovile kiija, “UMutwa uNguluvi akhavahiga avaanu vaakwe.”d 31 Shiyooli, kiviikhwa mu wuhigo wa Nguluvi yuna muumi, kwitiisa mandu.
32 Leelo kumbukhaji uluhaavi lula ulwa lwamwandi, luna mwayansaaga kimuhuviilila uKilisito. Hata muve mukhandi mwipata amalava makhome, mukhandi mupikiyitenekha kijimba mu malava ago. 33 Uluhaavi lumonga mukhandi mulafisiwa na kiligwa pa vaanu. Uluhaavi ulunji, mukhandi mukivatuna na kivatanga vala vina vakhandi vikigapata amalava ngaja gaago. 34 Mukhandi mukivasungupila avayeenyu vina vafunjiilwe ku shifungo. Khanji uluhaavi vikivapokha uwusi weenyu, mukhagugumiile na kiyitenekha kishendeeva kwa kiiva mwamanyaga kiija, munafyo ifiinu finofu mandu fina fisiisila kaa.
35 Ndeeno, jimbaji kwa kiiva mukhaposheela ulutono lukhome mandu kihuma kwa Nguluvi. 36 Mwisakulwa kijimba, baheene muve mwigaha gina isakula uNguluvi. Ndeeno, mukhaposheela gala gina uNguluvi wátahisaaga kivapeela. 37 Ngaja shina yiyandiikhwe mu Mayandikhwa aManofu kiija,
“Lusigeele luhaavi lufupi mandu,
uyo yuna timuhuviliile kiyinsa, asiyinse, khanji asidiila.
38 Umuunu wangu umugolofu kwa nsila ya lihuuvi, uyo asiive nu wuumi.
Leelo nda umuunu uyo iilekha kinifwata one,
nisishendefesewa nawo kaa.”e
39 Ose tisili ngaja avaanu awo vina viilekha kimufwata uNguluvi, vina vayajile. Leelo tili lumo na vala vina vikimuhuviilila uNguluvi na kikulusiwa.