Vahebulaniya 12

Kifwata ishihwano sha Yeesu

1 Ino, ose tina shipuga shikhome sha valunjikhaaji vina vatupiliime, ndeeno ose tifwataje ishihwano shaanave na tifiwuuse fyona fina fikitusivila kwa Kilisito na kiwulekha uwunansi wuna wukitugwisa. Khanji tijimbaje kisenga gina uNguluvi agaviishile pamwandi yeesu, ngaja muunu yuna imenana uluvilo kwa lugugumilo. 2 Timuhonekhaje uYeesu, kwa kiiva yumwene yuna wátudindulilaga insila ya kimuhuviilila uNguluvi, khanji yumwene yuna ikitukhangasa inumbula, baheene tiyiteneshe kimuhuviilila uNguluvi mbakha kuwudugo. Umwene wágugumilaga kwa kiiva ya wushendeefu wuna wukhandi wuyinsa. Khanji asikhahiivile insoni iya kiifwa pa musalaaba. Lino akheele ulubali lwa liwokho ilya kundiilo pa shitengo sha shitwa sha Nguluvi, mu luvala ulwa lishima likhome mandu.

3 Hivililaji mandu uYeesu yuna wájimbaga mu gala gina vakhandi vikimukhaana avaanu avanansi, baheene kiija musaali mukhatale na kiyoolopwa. 4 Hata nda mujimba kiwumena uwunansi, hata ndeeno mushaanali musinatovane uwulugu mbakha kikunula idanda yeenyu. 5 Wuli, musamiilwe amaswi aga kivajinia inumbula gina uNguluvi akhandi ikivajovela omwe mu vanaakwe? UNguluvi akhajovile kiija,

“Owe lusawo lwangu, puliisa!

Usikhagasalaga gina uMutwa waakho ikikupavila.

Khanji khangalaga inumbula nda ikikukhajila.

6 Kiiva uMutwa uNguluvi ikimulafya umuunu yoyoona yuna iiganwa nu mwene.

Khanji uMutwa uNguluvi ikimulafya umuunu yoyoona yuna iyiitikhwa kiija lusawo lwakwe.”^a

7 Ino jimbaji pina uNguluvi ikivalafya. Iigaha ndeeno kwa kiiva omwe muli vanaakwe, kiiva kusiina umwana yoyoona yuna asiyoonywa nu wiihe. 8 UNguluvi ikivalafya avanaakwe woona. Ndeeno nda uNguluvi asikivalafya, manyaji kiija omwe muli vayinsa nu mugongo, musili vanaakwe. 9 Nda tikhandi tikivatiila avasafi veesu va mu nyi iyi vina vakhandi vikitulafya, wuli, tisisakulwa kimutiila mandu uNguluvi uWiheesu yuna ali kushaanya, baheene tive nu wuumi wa shiluta na shiluta? 10 Avasafi veesu va mu nyi iyi, vikitulafya kwa luhaavi lufupi kilingana na shina vihiiva kiija lunofu. Leelo uNguluvi ikitulafya kwa kiiva yeesu yuuse, baheene tive lumo nawo mu wuvalafu waakwe. 11 Kusiina umuunu yuna ishendeeva pina ilafisiwa, leelo isugumilwa. Leelo kuunyuma vala vina vayimanyiise kiiva ni ngʼoma nofu kwa nsila ya kilafisiwa, viiva nu wulindamafu na kisenga gina gisakulwa pa Nguluvi.

12 Ndeeno gajiniaji amawokho geenyu gina mawoto na mafugamilo geenyu gina gitetema, baheene muyiime wunofu.^b 13 Jendaji mu nsila sina sigolweshe, baheene shina shilema shisilaave shilemale, leelo shive shiipona.^c

Amapavilo kwa vahuvililaaji

14 Omwe vahuvililaaji vayangu, jimbaji kikhala kwa wulindamafu na vaanu woona. Khanji jimbaji kiiva vagolofu mu wiikhasi weenyu, kwa kiiva kusiina umuunu yuna akwiliile kimwaga uMutwa uNguluvi, nda asili mugolofu. 15 Muveesaje meeho, baheene asikhaveesaga akwali umuunu uwa kigombola kipata ulusungu lwa Nguluvi. Asikhaveesaga akwali umuunu yuna ali ngaja ludela lukhali. Umuunu ngaja uyo, ikivalafya na kisishafula inumbula sa vaanu vinshi. 16 Muveesaje meeho, baheene asikhaveesaga akwali munyeenyu umuunu yuna mushemi awu asikimutiila uNguluvi, ngaja uEsawu. Umwene wágusaaga uwukhome waakwe uwa kiiva mwana wa wutasi kisawa, kwa kiiva ya shakiilya sha gwalimo hela.^d 17 Omwe mumeenye kiija, uEsawu akhandi isakula uwiihe amuyimiilile, leelo uwiihe wákhaanaga. Hata nda uEsawu wákhoolaga mandu, hata ndeeno uwiihe asikhamuyimiliile, kwa kiiva uEsawu wádiilaga kilambiisila.

18 Omwe musifishile mu shidunda ngaja isha Sinayi, shina aVaisilaheli vaali vakwiliile kishipyasa. Ishidunda isho shikhandi shiveekha umooto, shikhandi ni nshiisi nkhome nu gupepo guna gukutukha mandu. 19 Khanji musifishile uluvala luna aVaisilaheli vapulikhaga pina imbeeta sikhoola ni shawuti nkhome ya Nguluvi. Pina vapulikhaga ishawuti yila, aVaisilaheli vatiilaga mandu, vamulomba mandu uMusa kiija, uNguluvi asikhalogolaga nawo khanji. 20 Vatiilaga mandu kwa kiiva uNguluvi wálajisaaga kiija, “Hata nda inkhanu awu umuunu ikishiyambaasa ishidunda ishi, isakulwa kihudwa na mangʼanga mbakha kiifwa.”^e 21 Goona gina gawonekhaga mu shidunda, gavatisaaga mandu avaanu hata uMusa wáajova kiija, “Nitetema mandu kwa kiiva ya kitungumala.”^f

22 Leelo omwe mwafikha pa shidunda ishinji, ishidunda sha Sayuni,^g shisheene lijumbi lya ku Yelusalemu ilya kushaanya. Ilijumbi ilyo, lijumbi lya Nguluvi yuna muumi. Ukho avamalayikha vinshi mandu vakungaanile viishima kwa wushendeefu. 23 Omwe mwafikha mu shipuga ishikhome isha vahuvililaaji woona, vina uNguluvi ikivatambula kiija vanaakwe va wutasi kisawa. Avahuvililaaji awo amataawa gaanave gayandiikhwe kushaanya. Mwafikha pa Nguluvi yuna Muhigaaji wa vaanu woona na pa vaanu avagolofu, vina vavalasiiwe nu Nguluvi. 24 Omwe mwafikha kwa Yeesu yuna ikivalingaania avaanu nu Nguluvi mu Lufingo uLupya. Khanji mwafikha pa danda yaakwe yina yakunukhaga pa musalaaba kwa kiiva ya kisaajila uwunansi weesu, yisili ya kihombesa ngaja idanda ya Abeli.^h

25 Ndeeno, mumupulisaaje yuna ikivapavila. UNguluvi wávapeelaga ululawo lukhome avambuyeesu, kwa kiiva vakhandi vikhaana kimupuliisa uMusa, pina akhandi ikivapavila. Ose tisikulushe wuli, nda tisikimupuliisa uNguluvi, pina ikitupavila kihuma kushaanya? 26 Uluhaavi lula pina uNguluvi ilogola mu shidunda sha Sinayi, inyi yoona yadegenkhaga. Leelo lino atahiise iija, “Nisiyidegense inyi, khanji nisiyidegensa nyi nyeene duguli, ila nawu wulanga.”ⁱ 27 Iliswi ilyo lina liijova “khanji,” liwonensa bahawuvalafu kiija, ifiinu fyona fina uNguluvi wáfiwumbaga mu nyi iyi, fikhadegenkha na kiwuusiwa, baheene fisigale ifiinu fila fina fisikwiliile kidegenkha. 28 Ndeeno, tive tikimuhonjesa uNguluvi kwa kiiva atuyitiishe kiija, tive pa Wutwa waakwe wuna wusidegenkha. Tive tikimufuunya uNguluvi kwa nsila yina yikimushendeefya, kwa kiyiyiisa na kwa lishima. 29 Nilogola ndeeno, kwa kiiva uNguluvi weesu, ali ngaja mooto umukhali guna gulalisa khabisa.