1 Petulo 1

Ibalula ya wutasi iya

Petulo

Umulyango	Gina gakwali mu litaafili ili
1:1-2	UPetulo ikivahunjila avahuvililaaji va Yeesu
1:3-12	Ikimuhonjesa uNguluvi kwa wukulukho waanave
1:13–2:10	Ikivajinia kiiva vagolofu kwa kiiva vabagwilwe vave vaanu va Nguluvi
2:11–3:7	Shina visakulwa kivasenjela avayimililaaji na aga kisenga mu noolana
3:8–4:19	Kilafisiwa kwa kiiva ya kimufwata uKilisito
5:1-11	Kishidiima ishipuga sha vahuvililaaji va Yeesu
5:12-14	Inyunjila iya wudugo

UPetulo ikivahunjila avahuvililaaji

1 Ibalula iyi yihumile kunyangu one Simoni Petulo, yuna nili mwanandeje^a wa Yeesu Kilisito.^b Nikivayandishila omwe vina mubagwilwe nu Nguluvi na mupalankheene mu nyi sa wuhensa mu nyi ya Ponto, Galatiya, Kapadokiya, Asiya na mu Bitiniya. 2 Pawukuulu apo, uNguluvi uDaada wávamanyaga na kivahaagula, uNumbula uMunofu^c wávavasaaga muve vagolofu, baheene mumuyinatile uYeesu Kilisito na kivalasiwa ni danda yaakwe.^d UNguluvi avayonjelese imota nu wulindamafu.

Ilihuviililo lya wuumi

3 Timusufyaje uNguluvi, uDaada wa Mutwa weesu uYeesu Kilisito! Kwa lusungu lwakwe lukhome wátugahaga kiija tisawe ulwa wuvili, kwa kiiva wámufyusaaga uYeesu Kilisito kihuma kwa vina vafwile. Wágahaga ndeeno baheene tive nu luhuviililo lwa wuumi kiija, 4 tikhaposheela imota sina uNguluvi avavishiile avaanu vaakwe kushaanya. Ukho kusiina shoshoona shina shinanjikha, awu kiwola awu kisakhala. 5 Imota iso seenyu kwa nsila ya lihuuvi, muyangalilwa ni ngufu sa Nguluvi. Musiyangalilwe mbakha pina musiipate uwukulukho wuna wukhagubutulwa mu lisiku lya wudugo wa nyi.

6 Lino mushendeevaje kwa mota iso sina uNguluvi wávagulumilaga, kiiva uluhaavi ulu mukhava musugumiilwe kwa luhaavi, kwa kiiva ya majelo minshi. 7 Kiyijimfilisa mu majelo aga kiwonensa kiija, ilihuuvi lyenyu lya shiyooli. Liijelwa ngaja shina vikiyijela isahaabu kwa nsila ya kinyaanywa mu mooto. Kimuhuviilila uNguluvi lunofu mandu kishila isahaabu, kwa kiiva isahaabu yinanjikha. Lino, uYeesu Kilisito akhawonekha bahawuvalafu, akhavasufya, akhavatupikha na kivagota. 8 Umwene mukimugana, hata muve musimwajile, khanji mukimuhuviilila hata nda musikimwaga. Ndeeno mushendeeva mandu, uwushendeefu wuna wusitaviililwa, 9 kwa kiiva muposheela uwukulukho wa numbula seenyu. Uwukulukho uwo wuweene lugulumilo lwa lihuuvi lyenyu.

10 Injowo isa wukulukho weenyu uwo, avakuwamalago vawusesaaga mandu kiija vawumanye. Vakuwaagwa amalago imola sa mota ya Nguluvi, yuna wágulumilaga kivapeela omwe. 11 UNumbula wa Kilisito akhandi mukhati yaanave, wákuwaagwa amalago kiija, uKilisito akhalava, pina wáalava akhava nu wutupikho. Avakuwamalago awo vasakulaga mandu kiija, vamanye imola isi sikhava yooli na sikhamwaga wuli. 12 UNguluvi wávagubutulilaga avakuwamalago awo kiija, imola sina vakhandi viikuwa sisikhavatanjiliise aveene ila omwe. Ago gageene mwakhomwagwa na vala vina vavakhomelaga iMola iNofu iya Yeesu Kilisito. Woope vavakhomaga kwa ngufu ya Numbula uMunofu, yuna uNguluvi wámufilikhaga kihuma kushaanya. Imola iyo, yiyeene woope avamalayikha^e vidobokha mandu kiyimanya.

Muveesaje ni njendo inofu

13 Ndeeno, muveesaje tayaali na kiyivavala, muviishe uluhuviililo lwenyu mu mota yina musiposheele uluhaavi luna uYeesu Kilisito akhawonekha. 14 Muveesaje vaana va Nguluvi vanya shitiilo. Musikhayitikhaji khanji kiwufwata uwupafu weenyu wuna mukhandi nawo, pina mukhandi mushaanali kimanya ishiyooli sha Nguluvi. 15 Leelo, ngaja shina uNguluvi mugolofu yuna avashemeelile, na yuumwe muveesaje vagolofu kwa lyolyona lina mwisenga. 16 Mu Mayandikhwa aManofu uNguluvi ilogola, “Muveesaje vagolofu, kwa kiiva one nili mugolofu.”^f

17 UNguluvi mukimushemeela “Daada” mu mafuunyo geenyu, yumwene iihiga avaanu woona kilingana ni nsengo yaanave, asibaniilila. Lino, mumutiilaje mandu kwa luhaavi ulu luna mwikhala mu nyi muno ngaja vahensa. 18 Nilogola ndeeno kwa kiiva mumeenye kiija uNguluvi wávakulusaaga, baheene musikhaveesaga ni njendo sina sisifwaya sina mwaposheelaga kwa vambuyeenyu. Asikhavakulwise kwa fiinu fina finanjikha ngaja ihela ni sahaabu, 19 leelo kwa kishilila idanda ya lifungu ilikhome iya Kilisito. Umwene akhandi ngaja nyana nkholo yina yisipiikhwa.^g 20 UNguluvi wámuhagulaga uKilisito uyo ave mukulusaaji wa vaanu kwa kiiva ya lugoto lwakwe, kihuma inyi yisinawumbwe. Leelo wáhepelesa mbakha uluhaavi ulu lwa wudugo, baheene wámuleeta kimuwonensa bahawuvalafu kwa vaanu woona mu nyi. Aga wágahaga kwa kiiva yeenyu. 21 Kwa kishilila uKilisito, mukimuhuviilila uNguluvi. Umwene wámufyusaaga uYeesu na kimupeela uwutupikho, baheene ilihuuvi lyenyu live kwa Nguluvi.

22 Lino, kwa kiiva mwikhala kwa kiyinatila amamanyiso ga shiyooli aga Yeesu Kilisito, inumbula seenyu sivalasiiwe, baheene mukwiliile kivagana shiyooli avahuvililaaji vayeenyu. Lino mugananaje kwa numbula yoona, 23 kwa kiiva musaviilwe ulwa wuvili. Kisawa kuno kusili kwa vasafi va muvili, kwa kiiva uwiikhasi wa muvili, kuwudugo waakwe kiifwa. Leelo musaviilwe, baheene muveesaje nu wuumi wa shiluta wuna wuhumiliile mu Liswi lya Nguluvi. ILiswi ilyo lina wuumi, khanji likhava lya shiluta. 24 AMayandikhwa aManofu giijova,

“Avaanu woona vali ngaja masole,

uwunofu waanave wuli ngaja wuluva wa mu lihakha.

Amasole nu wuluva wiyuuma,

25 leelo iLiswi lya Mutwa^h likhava lya shiluta.”ⁱ

ILiswi ilyo lilyene Mola Nofu yina mwakhomelwagwa ulwa Yeesu Kilisito.