Mark 1

THURCHISA

MARK MIZIAK

Baptispu John Thurchi misir

(Mat 3:1-12; Luk 3:1-18; Jon 1:19-28)

¹ Pathian Naipasal Jisu Krista Thurchisa chu mahih ani. ² Deipu Isaiah Lekhabua

“Pathianin, ki tirton no motona tîr ka ta,

Amahan na lampui sin siam ati.

³ Ramchara mi inkhat tanghai han,

‘Pumapa lamlian sin ungla;

A lampui ngei khom mintun roi ati!’” Tia alei misir anghan a phut ani.

⁴ Masikkin John hah Baptist tho leh thurchi rilin ramcharah han a juong ani. Loko ngei kôm, “Nin siatna ngei renga insir ungla, baptisma chang roi,” hanchu, “Pathianin nin siatna ngei nangni ngâidam a ti” tin a misir ngâia. ⁵ Judai ram leh Jerusalem khuopui renga mi tam tak John chongril rangâi rangin an sea. An siatna ngei an phuonga hanchu, aman Jordan dungah a Baptist ngeia zoi.

⁶ Hanchu, John han utmul puon a sila, savun kongkhit a khita, asak chu khaimimsie leh rama khuoilutui ani. ⁷ Hanchu, loko ngei kôm han “ku nuka juong rangpu hi chu keima neka roiinpui uol ok ania, kei chu inkuna akekok rui sut rang lua inhoi mu-ung. ⁸ Keima chu tuiin nangni ka Baptist ngâia, aman chu Rathanthiangin nangni Baptist a ti,” atia.

Jisu Baptist achang leh methem atôngna

(Mat 3:13—4:11; Luk 3:21,22—4:1-13)

⁹ Hanchu, sûnkhat chu Jisu Nazareth khuo, Galilee rama renga a honga, Jordan dungah John kôma Baptist a changa. ¹⁰ Jisu hah tui renga a hong jok lehan chu, invân an onga male Rathanthiang pharvali angati achunga juong chum a mua. ¹¹ Hanchu, invân renga, “Nangma ka Naipasal mulungthung tak nini, nu chunga ka raiasan tatak ani” ti chong a juong tunga.

¹² Masuole chu, harenghan Rathan ramcharah amin se zoia, ¹³ mahan Soitan methemin sûn somminli a oma. Mahan ramsa ngei leh an oma, nikhomrese, vantirton ngeiin an juong san ngâia.

Jisu'n nga luokpu ngei minli akoina

(Mat 4:12-22; Luk 4:14,15; 5:1-11)

¹⁴ Hanchu, John hah intang ina an khum suolechu, Jisu ha Pathian Thurchisa rilin Galili ramah a honga. ¹⁵ “A zora diktak hah a hong tung zoi, Pathian Rengram khom anai zoi! Nin siatna ngei renga insir ungla Thurchisa hi iem taroi!” ati tîra.

¹⁶ Hanchu, Jisu'n Galili dil panga a lôn laiin ngaluokpu inik Simon leh anaipa Andrew len lei vôr ha a mua. ¹⁷ Jisu'n an kôma, “Mijui ungla, miriam sur rangin nangni min châng kiti” a tipe ngeia. ¹⁸ Marenghan an len ngei an makraka an jui kelen zoia.

¹⁹ Hanchu, an se nôk uol viet inchu laibungsa dang Zebedai naipasal, Jacob leh anaipa John a mu nôka. An lenngei sinsiamin rukuong chunga an lei oma. ²⁰ Jisu'n anni ngei hah amu ngei lehan a koi ngeia; hanchu, an Pa Zebedai hah inlo mi ngei kôm rukuonga an mâka, ama anjui kelen zoi

Miriam ramkhori sûr

(Luk 4:31-37)

²¹ Hanchu, Jisu leh a ruaisi ngei hah Capernaum khuopuia an sea, Sabbathni sûn anin chu Jisu Synagogue a lûta, mi aminchu kelen zoia. ²² Aminchu lam a riat loko ngei han ankhêl sabak an tia, Balam minchupu ngei anga niloia rachamnei taka anni ngei aminchu sikin.

²³ Masuolehan, ramkhori sûr mi inkhat an inkhom ina han ahonga an ieka raka, ²⁴ Ha mi han, “Nazareth Jisu, keini leh nangma khoimo ei inkeina a oma? Mi minmang ranga hong mo ni ni? Nang ki riat Pathian itîr mi inthiang nini!” atia.

²⁵ Hanchu, Jisu'n a ngoa, “Dairek inla, mapa sûng renga hah hong jôk roh!” ati pea.

²⁶ Hanchu ramkhori han ama hah anikbit zoiin chu inring takin a hêta a sung renga a hong jok zoia. ²⁷ Masuole chu, loko ngei han ankhêl sabak an tia, “Ama hih khoimo aini hi? Mahi minchuna thar mo ani? Ramkhori ngei khom rachamnei takin chong a peka, a chong an jôm kelen hi?” inkakhat inkakhat an in rekela.

²⁸ Hanchu, Galilee ram pumpuiah Jisu thurchi anthang zit zoia.

Jisu'n mitamtak amindam

(Mat 8:14-17; Luk 4:38-41)

²⁹ Hanchu, Jisu hah Synagogue renga Jacob, John leh aruaisi ngei leh an joka, Simon leh Andrew inah an lûta. ³⁰ Simon tarpi hah ritun damloiin a lei jal a; Jisu avatung lehan ha nu damloi roi hah an lei rila. ³¹ Hanchu, Jisu'n a kuta amutu a, a keithoia. Harenghan a mintun hah a dama, an sin a tho pe ngei zoi.

³² Hanchu, kholoi ahong nia nisa a hong takin chu, loko ngeiin Jisu kôm damloi murdi le ramkhori sûr ngei an hong tuonga. ³³ Akhuo pum rengin inkot kola an hong inbukzit a. ³⁴ Jisu'n damloi jât tamtak a mindam a, ramkhori tamtak a not peia. Ramkhori ngei han ama an riat sikin an chong rang phal maka.

Jisu'n Galilee rama chong a ril

(Luk 4:42-44)

³⁵ Anangtuk zingah chu avar man rengin Jisu an thoia, in renga hah a suoka. Khuopui renga ha mun inthimna a sea, mahan chubai thona a va neia. ³⁶ Hannirse, Simon leh a champui ngeiin Jisu an hong roka, ³⁷ an vamu tena chu a kôma, “Mitinin nang an rok,” an ti pea.

³⁸ Hannirse, Jisu'n an kôm a, “Hi revela khuo dang ngei kôma khom hin ei se nget rang ani, hi ngei kôma hin chong ki ril rang anang ani, maha ku juongna bi ani sikin,” a tia.

³⁹ Ha anghan, synagogues ngeia chong rilin leh ramkhori ngei rujûl tirin Galili ram pumpuia a cheia amimsua zoia.

Jisu'n mi amin dam

(Mat 8:1-4; Luk 5:12-16)

⁴⁰ Hanchu, Jisu kôm mi inkhat pangphâr a honga, khukinbilin san rang a ngenna, “Nu nuôm anin chu mini minthiang thei,” a tia.

⁴¹ Jisu'n asan lungkham a lei mua, a kut ahong dunga, a tôna, “Kunuôm hong inthiang taroh!” a tia. ⁴² Hanchu, voikhat rengin a pangrang ha a hong boi kelena, anthiang zoi. ⁴³ Jisu'n chong napangin atipea, a tîr kelen, ⁴⁴ a kôma, “Hi roi hih tute ril tet no roh. Hannirse, Ochei ngei kôm thengpat inla vamin mu roh; masuole chu, mi tinin nen thiang nok zoi ti an riat minthar na rangin Moses inbolna pek ranga ai ti hah pek roh” a tipe a.

⁴⁵ Hannirese, ama hah a suoka, ha thurchi ha mun tina tanghaiin a Puông min zarra. A ril minlum rei sikin Jisu chu anlangin khua lut thei khai maka. Mun inthim na ava oma, muntin renga a kôm mi an hong ngâia.