Mark 2

Jisu'n phalkhatthi amin dam

(Mat 9:1-8; Luk 5:17-26)

¹ Hanchu sûn tômte suoleh chu Jisu Capernaum a se nôka, inna a om ti roi an thanga. ² Masikin mi tam tak an hong intupa, inkot bula lua khom mun tông khai maka. Jisu'n chong a rila, a ril lai takin ³ phalkhatthi inkhat mi minli'n a kôm an hong rojona. ⁴ Hannirse, loko an tam rei sikin a kôma hong tungpui thei mak ngeia, masikin Jisu omna ridin takah inchung an phena. An phen zoiin chu phalkhat thipu hah a jampher leh an juong musuma. ⁵ Jisu'n an takson lam a mua, phalpkhat thipu kôma han, “Ka naipasal, ni siatna ngei ha ngâidam ani zoi,” a tia.

⁶ Balam minchupu senkhat ha muna insung ngei han an mulung rillin, ⁷ “Hi mi hin khoithomo hi anga a chong ngam hi? Pathian a rilminsiat ani! Pathian vei ke siatna ngâidam thei!” an tia.

⁸ Harenghan, Jisu'n an mindôn ha a riata, an kôma, “Ha anghan ithomo nin mindôna? ⁹ phalkhat thi kôma, ‘Ni siatna ngei ngâidam ani zoi,’ ti leh ‘Inthoi inla, na jampher luok inla lôn taroh,’ ti hih kho hi mo a ti abai uol? ¹⁰ Kho khoi khomnirese, rammuola hin Miriam Naipasalin siatna ngei ngâidam theina racham anei ti nangni lei minmu rong” a ti. Hanchu, phalkhat thi kôm han, ¹¹ “Inthoi inla, na jampher luok inla, ni inah se ta roh!” ti nang ki ril a tia.

¹² An rengin an en chak chungin ama ha an thoia, a jampher a luoka, a se kelen zoia. An rengin an kamam sabaka, Pathian an minpaka, “Hi anga hi chu la mu tet ngâi makme!” an tia.

Jisu'n Levi a koina

(Mat 9:9-13; Luk 5:27-32)

¹³ Hanchu, Jisu Galilee dil pangah ase nôka. Loko ngei a kôm an sea, a lei minchu ngeia. ¹⁴ Ase na sumrusuong ngâi Levi Alphaeus (Alfaia) naipasal, Office a insung a mua. Jisu'n a kôma, “mi hong jui roh,” ati pea. Levi an thoia, a jui zoia.

¹⁵ Mahan Levi inah bukhalai an ota, sumrusuong ngâi mi tamtak leh mi nunsia ngei Jisu an laia mi tam takin Jisu leh a ruaisi ngei bukhalai an ot puia. ¹⁶ Hanchu, Pharisai ngei leh Balam minchupu senkhat ngeiin Jisu mi nunsia ngei leh sumrusuong ngâi ngei leh bu a nek an mun chu a ruaisi ngei kôma, “Khoi tho mo ha anga mi ngei laia te bu ai nek?” tin an rekela.

¹⁷ Jisu'n an chong ha a lei riata, an kôma, “A dam ngeiin doctor nâng ngâi maka, a damloi ngei ke doctor an nâng ngâi. Midik ngei ralam ranga juong ni mu-unga, mi nunsia ngei ralam ranga juong ke ki ni,” tin a thuona.

Bu ngei roia rekelna

(Mat 9:14-17; Luk 5:33-39)

¹⁸ Zora khat chu Baptispu John ruasi ngei leh Pharisai ngeiin bu an ngeia. Mi tu ngei mini Jisu kôm an honga, a kôma, “Khoi tho mo John ruaisi ngei leh Pharisai ruaisi ngei te bu an ngei ngâia, no ruaisi ngeiin te an ngei ngâi loi?” ti'n an rekela.

¹⁹ Jisu'n an kôma, “inneina khuolmi ngei ha bu ngei rangin nin lei sabei mini?” Ni thei no ni! Moi pumapa an kôma a om kar chu bu ngei no ni ngei. ²⁰ Hannirse, an kôm renga moi pumapa an tuong pei nikhua la tung a ta, ha tika chu la ngei an ti.

²¹ “Tute'n puon muruo chetpho nan puon thar relek mang ngâi mak ngei, mang ngan senla khom athar han a murua hah kei set a ta chet uol a ti. ²² Tute'n vain thar khom savun um murua thun ngâi mak ngei, thun ngan senla khom, vain thar han savun um hah mut khoi a ta, vain leh savun um leh mangmunboi chang a ti. Masikin vain thar chu savun um thara thun an ti” ti'n a thuona.

Sabbath ni chung roi rekelna

(Mat 12:1-8; Luk 6:1-5)

²³ Hanchu, Sabbath ni chu Jisu bubil ngeia a lôna. A ruaisi ngeiin an lôn pumin buvui ngei an china. ²⁴ Masika han, Pharisai ngeiin Jisu kôma, “Enta, nu ruaisi ngeiin Sabbath nia an tho hi! Mahih ei Balam in akhap ani,” an tia.

²⁵ Jisu'n an kôma, “David'n sak rang ansam laia ai tho hah nin la pore tet ngâi loi mini? Ama leh ami ngei an von acham sabaka. ²⁶ Hanchu, David han Pathian ina a luta, Pathian kôma, pek sei vaipol hah a saka. Mahah Abiathar Ochei Inlaltak a chang laia han ani. Ei Balam dungjuiin chu ha vaipol hah Ochei ngei vei inke an sak thei ngâi ani, nikhomrese, David in a saka a mi ngei khom a sem ngeisa.”

²⁷ “Sabbath ni chu miriam ngei sana ranga sin ania, miriam chu Sabbath ni ranga sin ni mak. ²⁸ Masikin Miriam Naipasal hih Sabbath ni a Puma khom ani” tin a thuona.