Mark 8

Jisu'n loko isang minli avaina roi

(Mat 15:32-39)

¹ Hanchu chomolte suoleh chu loko dang tamtak an hong intup nôka. Ite an sak rang an dônloi sikin Jisu'n a ruaisi ngei a koia, an kôma, ² “Loko ngei hih ko kôm sunthum an om zoia, Ite sak rang an dôn khailoi sikin lungkham ku mu ngei tataka. ³ Bu ngeiin an inah ki min se ngei lakin lamlaia chamsolinvei an ta, senkhat vang chu an hongna alazan ani sikin” a tia.

⁴ A ruaisi ngeiin akôm, “Hi ramcharah hin tumo hi loko ngei vaina rang sak aman zoi ranga?” an tipea.

⁵ Jisu'n, “Vaipol kodor mo nin dôn?” Ti'n arkela.

Anni han “Vaipol sari” tin an thuona.

⁶ Hanchu loko ngei hah pila insung rangin chong atipe ngeia. Masuole chu vaipol sari hah a laka Pathian kôm satavura, a khoia, loko ngei sem pe rangin a ruaisi ngei kôm a peka, a ruaisi ngeiin an sema. ⁷ Nga chinte atomte an dôn sa a. Jisu'n ha chung khom han satavura chong a pek ngei nôka, sem pe ngei rangin a ruaisi ngei kôm a pek sa a. ⁸ Mi tinin an khop dodorin an saka, an sak miniang arnoi chu tabong sari an rut minsipa. ⁹ An rengin isang minli dor anni, Masuole chu Jisun loko hah amin chin ngei zoi. ¹⁰ Ama chu a ruaisi ngei leh rukuongah a chuong kelena Dalmanutha ramhuola an se zoi.

Pharisai ngeiin minsinna abi an ngen

(Mat 16:1-4)

¹¹ Hanchu, Pharisai senkhat ngei Jisu kôm an honga, an inkhalpuia. Ama an min ok rang an nuom sikin Pathianin ama apom ti riat theina rangin minsinna anni ngei min mu nget rangin an tipea. ¹² Hannirse, Jisu'n a mulungril sunga achap a, “Ithomo atunlai ruol ngei hin minsinna an zong hi? Nangni ki ril! Atunlai mi ngei kôma hin ite riat theina reng pek ni no nih!” a tia.

¹³ Hanchu, anni hah a maka, rukuongah a chuong nôka varal tiang ase zoi a.

Pharisai ngei led Herod chol

(Mat 16:5-12)

¹⁴ Ruaisi ngeiin vaipol chôi rang an mingila, rukuonga han vaipol tap khat vei an dôna. ¹⁵ Jisu'n, “Pharisai ngei leh Herod chola^a hin indin, inreng ungla, indônsui roi” a ati pe ngeia.

¹⁶ Hanchu, anni leh anni han, “Vaipol an dôn viet loi sika, ama hih ai ti ke” ti'n an misir mintuka.

¹⁷ Jisu'n an chong hah a lei riata, an kôma, “Khoitho mo vaipol nin dônloi thurchi te nin misir mintuka? Nin la riat thei tet loi mini? Nin mulung anmol bak zoi mini? ¹⁸ Mit dôn chakin nin mu thei loi mini? Kuor dôn chakin nin riat thei loi mini? Nin riat khailoi mini, ¹⁹ loko isang ranga ngeita ranga vaipol ranga ko khoi hah? An sak miniang vaipol ronoi tabong khodormo nin rut minsip ha?” ti'n a rekel ngeia. Anni han

“Tabong somleinik” ti'n an thuona.

²⁰ Jisu'n an kôma, “Loko isang minli ngeita ranga vaipol sari ko khoi laia hante, an sak miniang vaipol ronoi tabong khodormo nin rut minsip ha?” tin a rekel nôka.

Anni han, “Tabong sari” tin an thuon nôka.

²¹ Hanchu, aman “Ninla riat loi mini?” ti'n arkel nôka.

Jisu'n Bethsaida khuoa mitcho a minvar

²² Hanchu, Bethsaida khua an hong tunga, mahan Jisu kôm mitcho an hong tuonga, ama atôn pe rangin an ngenna. ²³ Jisu'n mitcho kut hah a sura, khuo pêntiang ase puia. A mit amichil pe zoiin chu a chungah kut leh a tôna, a kôma, “Numu thei mo ni zoi?” ti'n arkela.

²⁴ Hanchu, a hong tanga, “Miriam ngei ku mua, nikhomrese, thingkung alôn anghan ke ku mu” a tia.

²⁵ Masuole chu Jisu'n mitchopa mitah han a kut a leh a tôn nôka. Ma zora han chu mitchopa han a en ngita, a mit a hong var zoia, jattin amu minthar thei zoi a. ²⁶ Hanchu, Jisun, “Khuo sungah hin lut khainoroh” tin chong a bea a, in tiang amin se zoi a.

Peterin Jisu chung roi aphuongna

(Mat 16:13-20; Luk 9:18-21)

²⁷ Hanchu, Jisu leh a ruaisi ngei hah an joka, Phillipi Kaisaria kola khuo ngeia an sea. An se malamin ankôm han, “Miril roi, mi ngeiin tumo minti?” ti'n arekela.

²⁸ Hanchu, anni han, “Senkhatin chu Baptistpu Johan ani,” Mi dangin chu Elizah ani, “Senkhat nokin chu Deipu inkhatlam ani” nang an ti, ti'n an rilla.

²⁹ Hanchu, ankôm han, “Nangni ngei inte tumo ani mininti?” ti'n arekela.

Peter'n a kôma, “Messiah^b ni ni” tin a thuona.

³⁰ Hanchu, Jisu'n an kôm han, “Ku chungroi hih tute kôm ril no roi” ti'n chong a bea.

Jisun a tuong rang le athi rang roi amisir

(Mat 16:21-28; Luk 9:22-27)

³¹ Masuole chu Jisu'n a ruaisi ngei aminchu ngeia, an kôma, “Miriam Naipasal hi la tuong ata that a ta, Upa ngei leh Ocheisi ngei leh Balam minchupu ngeiin heng an ti. That an ta, nikhomrese sunthum nin chu inthoi nôk a ti,” a tia. ³² Ha roi hah antharvangin a ril ngeia. Hanchu, Peter ama hah athenin a tuonga, a ngoa. ³³ Hannirese, Jisu'n an heia, a ruaisi ngei tiang a ena, “Soitan, ku nukah om roh, Ni mindôn hih Pathian renga niloin miriam renga ke ani,” ti'n Peter a ngoa.

³⁴ Hanchu, Jisu'n loko ngei leh a ruaisi ngei a koia, an kôma, “Tutu khomin mi zui a nuom inchu a male ama in ipdelin a kros ruputin mizui reseh. ³⁵ Tukhom a ringna minjok a nuom inchu machan a ta, han, tutukhom keima sik leh Thurchisa sika a ringna machan ngei chu zok an ti. ³⁶ Mi'n rammuol hih apumin dôn senla, a ringna chu machan senla, ata rangin khoimo an lapna? Mangmunboi ani! ³⁷ Mi'n a ringna a man nôkna ranga, imo apek rang a dôna. ³⁸ Tutukhomin atunlai ruol thar, Pathian boi leh siatna mi ngei kôma leh keima leh ki minchuna chong injakpui chu, Miriam Naipasal apa roiinpuina insila a Vantirton inthiang ngei leh an juong tika chu ha mi hah injakpui a ti” a tia.