Mark 7

Pipu chongmâk

(Mat 14:34-36)

¹ Hanchu, Jerusalem renga hong pharisai ngei leh Balam minchupu ngei, Jisu kola an hong intupa ² Ha ngei han Jisu ruaisi senkhat ngeiin kut innima sak an sak an mua, mahah Pharisai ngei tipe lamtaka an rusûk loi sika ani.

( ³ Pharisai ngei leh Juda ngei murdin chu an pipu ngei chongmak an jui ani, an kut, balam takkin an rusûk noa anin chu ite sak ngâi mak ngei; ⁴ bazâr renga neinun an juong chôi ngei murdi khom an rusûk baka, tui an inbuol nonchu sak sak ngâi mak ngei. Chongmak dang tamtak ansur mindet tit khom a om sa; ha ngei hah kilat ngei, bêl ngei, sumsen bêl ngei, zalmun ngei min sai rang ti ngei ha ani.)

⁵ Masikin pharisai ngei leh Balam minchupu ngei han Jisu kôm, “Koithomo nu ruaisi ngeiin pipu chongmak dôn loin kut innim pumin sak an sak hi?” ti'n an rekela.

⁶ Jisu'n an kôma, “Isaiah'n nin chungroi a lei misir hah a dik ani! Mitikiri ngei ninni:

‘Hi mi ngei hin an baiin min minpaka,

nikhomrese, an mulungrilin chu minla zan.

⁷ An minchuna hin Miriam chongpek

An minchu sikin min savana

hih a korong ani, Pathianin a ti,’

Ti a lei inziek ang han!.

⁸ “Pathian chongpek nin henga, miriam minchuna nin dôn uol ani hi” a tia.

⁹ Hanchu, ama nanakin an kôma, “Nin balam muruo ngei nin dôn theina ranga Pathian chongpek ngei nin heng hi chu buti nin dôn ani hi. ¹⁰ Mosia'n, ‘Nu nu leh na Pa merit pek roh Tutukhom anu mo apa mo khomaksam chu that ning ati’ ti'n chong a lei peka, ¹¹ nangni rekin chu hi anghin nin ti ngâi, mi'n anu mo, apa mo a kôma; san rang anang inchu ‘Korban ani’ (Pathian kôm pek ani zoi tina ani), ¹² anu mo a pa ngei rangin mo khoite sintho rangin jot khai ngâi mak choi a. ¹³ Hi anga balam muruo nin minchu banga hin Pathian chong amin mang ngâia. Hi anga sin nin tho a dang khom tamtak ala om sa” a tia.

Miriam minnim ngâi neinun ngei

(Mat 15:10-20)

¹⁴ Hanchu, Jisu'n loko ngei hah a koi nôka, an kôma, “Nin rengin ko chong rangâi ungla, riat thei roi. ^15-16 ^a Pêntiang renga Miriam sunga luta ama minnim thei ite omak, Miriam sung renga hong suok ngei hi ke miriam minnim ngâi ani.”

¹⁷ Hanchu, loko ngei hah makin in sungah a luta, ha chong hah rilminthar rangin a ruaisi ngeiin an ngenna. ¹⁸ Jisu'n an kôma, “Mi dang ngei nekin la var uol mak choi.” “Khoite pêntiang renga miriam sunga lutin chu a minnim thei om maka, ¹⁹ a mulungrila lut loin, an phungpuia a luta, nôm sena tiang a jok ngâi sikin ti hih nin riat loi mo?” a tia. (Mahah Jisu'n sakrua murdi chu anthieng let a tina ani)

²⁰ Hanchu, ama'n, “Miriam sung renga hong suok lele ha ke mi minnim ngâi. ²¹ Sung tiang renga miriam mulungril renga keng mindônna saloi a hong suok ngâi, ha mindônna saloi han, inditna, inruna, mi thatna, ²² inrena, oina, saloi murdi tho nuomna, huongna, hurna, narsana, erona, inpakna leh inmol na ngei a minsuok ngâi; ²³ ha saloi ngei murdi hah sung tiang renga a hong suoka, miriam hah a minnim ngâi ani” a tia.

Nupangnu taksôn

(Mat 15:21-28)

²⁴ Hanchu, Jisu'n Galilee ram makin Tura ram huola a sea. In inkhat hah a luta, tuten an riat rang khom jot maka, nikhomreseh, inthup thei maka. ²⁵ Hanchu, nupang inkhat, anai nupang ramkhori'n a surpe, anu in Jisu thurchi a riat lehan harenghan a honga akea an boka. ²⁶ Ha nupangnu hah Jentil mi ania, Suria rama Phoenikia sunga a suok ania. Amanu han anai nupang sunga ramkhori rujul pe rangin Jisu kôm a ngenna. ²⁷ Hannirse, Jisu'n a kôma, “Nai ngei khop bak rese ngei. Nai ngei bu lakpea ui ngei kôma pek chu dik mak” ti'n a thuona.

²⁸ Nupangnu'n, a kôma, “Opu ani chu ani, hannirse, maicham nuoia ui ngeiin chu nai ngei bu ramal an mathak ha an sak ngâi nimak mo!” ti'n a thuona.

²⁹ Masikin Jisu'n a kôma, “Hanu thuona chongbai sika han, ni inah se nôk inla, na nainupang chu ramkhori makin vamu niti zoi!” a tipea.

³⁰ Hanchu, nupangnu hah a inah a sea, anai nupang chu ramkhori makin zalmuna zalin a vamu zoia.

Kuarset chongloi Jisu'n amindam

³¹ Hanchu, Tura ram renga Jisu a zok nôka, Sidôn khuopui sir in Khuopui som palin Galilee dil a tunga.

³² Mi senkhat in kuorset leh chongloi a kôma an hong tuonga. Hapa chunga a kut leh tôn rangin Jisu an ngenna. ³³ Ha anghan, hapa hah Jisu'n loko ngei lai renga athen vei in a tuonga, a kutruol leh a kuor sung a tônpea, a michilpea, a melei khom a tônpea. ³⁴ Masuole chu Jisu'n invân tiang enin a phukasana anhui a, a kôma, “Ephatha”^b a tia, mahah “In ongroh!” tina.

³⁵ Harenghan, a kuor ngei a hong vara, a melei inkhit na ngei a hong insuta, anthar vangin a chong thei zoia. ³⁶ Hanchu, Jisu'n loko ngei kôm tute ril tet loi rangin chong a peka, hannirse a khaplia an ril minlum lilia a. ³⁷ A riat murdi han ankhêl sabak an tia, “A sin murdi hih ankhêl sabak ani Kuorset ngei khom amin varpea, chongloi ngei khom amin chong thei hi!” an tia.