Mark 10

Ompui sangram makna roia Jisu in aminchuna

(Mat 19:1-2; Luk 16:18)

¹ Hanchu, Jisu'n ha mun hah a maka, Juda rama a sea, Jordan ral an kana Hanchu loko ngei akôm an hong intup nôka, a tho ngâi lam anghan anni ranga lei minchua.

² Pharisai ngei senkhat an honga, ama min okna rangin, “Mi'n a lomnu ai mak hih Balam phal mo?” tin an rekela.

³ Jisu'n an kôma, “Mosia'n inmo Balam nangni a pek?” ti'n a thuona.

⁴ Hanchu, anni han, “Mosia'n chu inmakna lekha miziekin inmak a phal ngâi ani” ti'n an thuon nôka.

⁵ Jisu'n ankôm, “Nin mulung ngar sika, ril nin intak sika ha Balam nangni miziekpe. ⁶ Nikhomrese, rammuol insiang renga Pathian Lekhabu'n ai ti anghan, ‘Pathianin pasal leh nupang’ ai sin ani. ⁷ ‘Masikin pasalin anu leh apa mak a ta, a lomnu leh inruol an ta, ⁸ Hanchu, an ruonin takpum khat hong ni an ti zoi.’ Masuole chu innik ni khai mak ngeia, inkhat an hong ni kelen zoi ani. ⁹ Pathianin a min zom sei chu miriamin an minsen rang nimak” a tia ¹⁰ Hanchu, in sung an lut lechu a ruaisi ngeiin ha roi hah Jisu an rekela ¹¹ Ama han ankôm, “Tutukhom a lomnu a maka, nupang dang anei inchu a lomnu a inre san ani. ¹² Ha angdenin, nupang khomin a pasal makin pasal dang aneiin chu inre ani” a tia.

Jisu'n Naipangte ngei Satavur

(Mat 19:13-15; Luk 18:15-17)

¹³ Hanchu, Jisu'n an chungah kut a minngama satavur theina rangin mi senkhatin akôma naipangte ngei an hong tuonga, nikhomrese, ruaisi ngeiin an lei ngoa. ¹⁴ Hannirese, Jisu'n mahah a mu inchu a ningthika, a ruasi ngei kôma, “Naipangte ngei ko kôma min hong ungla, khap noroi, Pathian Rengram chu hi anga mi ngei ta ani sikin. ¹⁵ Nangni ki ril tutukhom naipangte anga Pathian ram amodom nonchu Pathian Rengram lut thei noni” a tia. ¹⁶ Masuole chu naipangte ngei a kuoa, an chunga kut abanga satavur zoi.

Ruotharte Neipa thurchi

(Mat. 19:16-30; Luk 18:18-30)

¹⁷ Hanchu, Jisu'n se ranga a kalchôi chakin mi inkhat a hong tana, ama kungah khukinbillin, akôma, “Minchupu sa, ringinlôn ringna ka chang theina rangin khoimo ki sin rang?” ti'n arkela.

¹⁸ Jisu'n akôma, “Khoithomo asa mini ti?” “Pathian penah chu tute misa ommak. ¹⁹ Balam chongpek ngei hachu ni riat hate, ‘Mi that no roh, inre no roh, inru no roh; batu tho no roh; mi huong no roh; nu nu leh na pa merît tho roh ti ngei hih’” a tia.

²⁰ Hanchu, hapa han akôma, “Minminchupu ha Balam chongpek ha chu ka naipangte renga ke lei dôn sei” a tia.

²¹ Jisu'n ha mi hah a en ngita, lungkhamna tak neiin akôma, “Inkhat na lan sam, se inla ne nei murdi zuor inla, a sum hah inriang ngei pek inla hanchu, invânah rochon nei ni ti, masuole chu hong inla, mi hong jui roh” a tipea. ²² Amapa han ha chong hah a riat lechu amai mokpe oka, rangâisiat takin arot zoi, mi neipa ani sikin.

²³ Jisu'n a ruaisi ngei a en vela an kôma “Anei ngei Pathian Rengrama lut na rangin chu i anga antak mo ani!” a tia.

²⁴ Hanchu, ruaisi ngei han a chongril hah an khel sabak an tia, nikhomrese, Jisu'n a thuona nok a ankôma, “A nei ngei Pathian Rengrama lut chu antak sabak ani! ²⁵ Mi Nei ngei, Pathian Rengrama lut nekin chu simphuoi kuora ut lut bei uol ok ati” a tia.

²⁶ Haten hanchu an rangâi an khel tatak zoia, an rengin, “Hanchu, tumo zok thei ranga?” an tia

²⁷ Jisu'n anni ngei a ena, ankôma, “Mahah miriam rangin chu nithei ni maka, Pathian rangin chu nithei ani; Pathian rangin chu jattin nithei ani” an tia.

²⁸ Hanchu, Peter in akôma, “Enta, kei nin chu jattin reng kin maka, nang kin jui ani hi” a tia

²⁹ Jisu'n ankôma, “Nangni ki ril, tukhom keima sika Thurchisa sika, in mo, sungsuok ngei mo, sarnu ngei mo, nu mo, pa mo, naingei mo ram mo amak ngei chu, ³⁰ Hi damsung rengahin in ngei mo, sungsuok ngei mo, sarnu ngei mo, nu mo, pa mo, naingei mo, ram mo, abakraza'n man a ta, mi nuomlo khom tông sa a ta, zora la hong nok ranga ringinlôn ringna man sa a ti. ³¹ Nikhomrese, moton taka om mi tam ngei chu nuktaka la om an ta, nuktaka om mi tam ngei chu moton taka la om an ti,” a tia.

Jisu'n Athi rang amisir a Voithumna

(Mat 20:17-19; Luk 18:31-34)

³² Hanchu, Jisu leh a ruaisi ngei Jerusalema se rangin lampuiah an oma, Jisu moton ansa a, ruaisi ngei han an kamam sabak a, loko a jui ngei han an chia. Hanchu, Jisu'n, ruaisi ngei hah an thenviakin a tuong ngei nôka, a chungah atông rang hong tung rang ngei amisir pe ngei nôka, ankôma. ³³ “Rangâi hi roi, Jerusalema, ei se rang ania, mahan Miriam Naipasal hi Ocheisi ngei leh Balam minchupu ngei kuta min surin om a ti. Thi rangin hengpai an ta masuole chu Jentil ngei kutah pek an ta. ³⁴ Anni ngeiin innuinan mang an ta, michil an ta, zem an ta, that an ti; nikhomrese, sunthum suolehchu inthoinok a ti” a tia.

Jacob leh Johan an ngenna

(Mat 20:20-28)

³⁵ Hanchu, Zebedee nai ngei Jacob leh Johan, Jisu an hong naia, akôma, “Miminchupu, sin mini tho pe ranga kin nuom a om,” an tia.

³⁶ Jisu'n ankôm, “Khoimo ninta rangin nangni tho pe rangin nin nuom?” ti'n arekela

³⁷ Anni han, akôma, “No roiinpuina Rama ne reng sukmunah na changtiang inkhat voitiang inkhat mini min sung rangin kin nuom ani” ti'n an thuona.

³⁸ Jisu'n ankôma, “Nin ngen hi nin riat loi ani. Duk tuongna kilat ke nek rang hi nin nek thei rang mini? ka baptisma chang rang khom nin chang thei rang mini?” a tia.

³⁹ Anni han, “Kin thei” tin an thuona.

Jisu'n ankôma, “Ki kilat nek rang chu nek nin ta, ka baptisma chang khom chang thei nin ti. ⁴⁰ Nikhomrese, ka changtiang mo, ko voitiang mo an sung rang chu keima thang rang nimaka. Ha mun ngei hah chu Pathianin a minsûk pe ngei sei rang pek ati,” ti'n ati pe ngeia.

⁴¹ Ha chong hah ruaisi dang som ngeiin an lei riata Jacob leh Johan chungah an lei nuar zoia. ⁴² Masikin Jisu'n an rengin a koi ngei a, ankôma, “Jentil ngei chunga roizekpu an phun ngei chu an chungah an inlal sabak ngâia, an ruaipu ngei khom an chungah racham an nei tatak ngâi ti khom nin riat. ⁴³ Nikhomrese, nin laiah chu ha anghan nimak. Nin laiah tutukhomin a lian rang a nuom inchu nin suak ani bak nget rang ani. ⁴⁴ Mapenah, nin laiah tukhomin a motontak ani nuomin chu mi murdi suak ani bak nget rang ani. ⁴⁵ Miriam Naipasal luo mana min a sin an thope rangin zuong maka, mi sintho pe rangin ke mi tamtak ratan ranga a ringna pek rangin ke a zuong ani” atia.

Jisu'n Bartimaius Mitcho Amin varpe

(Mat 20:29-34; Luk 18:35-43)

⁴⁶ Hanchu, Jeriko an hong tunga, Jeriko renga Jisu leh aruaisi ngei leh loko tamtak an suok lai'n kutdo Timaius nai Bartimaius lampui kola a lei insunga. ⁴⁷ Nazareth Jisu ani ti a riat lehchu a heta, “Jisu! David Naipasal, inriang mi mu roh ba!” a tia

⁴⁸ Mi tamtakin dairek rangin an ngoa, nikhomrese, aman'n, “David Naipasal, inriang mimu roh!” ti'n a het min ring uola.

⁴⁹ Jisu an ngama, “Ama hong koi roi” atia.

Hanchu mitcho hah an va koia, a kôma, “Phukdai takin om inla, inthoi roh, nang a koi!” an ti pea.

⁵⁰ Hanchu, a puon a lika, inrangtakin an thoia, Jisu kôm a sea zoia.

⁵¹ Jisu'n akôma, “Khoimo nang ko tho pe rangin nu nuom?” ti'n arkela. Mithcho ha a kôma.

“Miminchupu, mu nok thei hih ku nuom” ti in a thuona.

⁵² Jisu'n akôma, “Se ta roh, na taksôn na hi na dampui ani” a tipea.

Masuole chu amu thei kelena, lampuiah han Jisu a jui zoia.