11
Jisu'n inlaltaka Jerusalem alut roi.
(Mat 21:1-11; Luk 19:28-40; Jon 12:12-19)
1 Hanchu, Jerusalem an hong tung rang totoa Bathphage leh Bethany khuo kola Oliv muol an hong tungin Jisu'n a ruaisi ngei laia mi innik atîra. 2 An kôma, “Nin motonah khuo son se ungla, nin tung leh, sakuordingte inthung, tute la chuongna ngâi loi mu nin ti. Sut ungla, hin hongkei roi. 3 Hanchu, tukhomin, khoitho mo nin kei ti'n nangni an rekel leh khom, Pumapan ai zong ke, hong thak nok kelen a ti ti roi” a tia.
4 Ha anghan an sea lamliana inkhar pêntianga sakuordingte inthung an va mua. An sut lehan 5 Ha taka anding ngeiin, “Khoitho mo sakuordingte hah nin isut?” tin an rekela.
6 Jisu'n a ril ngei lam takin an thuona, masuole chu an min se ngei zoi. 7 Hanchu, sakuordingte hah Jisu kôm an hong keia, a chungah an puon ngei an dap suole chu Jisu a chuonga. 8 Mi tam takin an puon ngei lampuiah an dapa, adangin loilaia sasol an va tuka an dap sa a. 9 Hanchu, moton tianga se ngei leh anuk tianga a zui loko ngei in,
“Hosanna! a
Pumapa riminga zuong chu
Minpakin om rese!;
10 Rengram zuong tung rang ei pa
David Rengram chu, minpakin
Om rese!
An chungtaka khin
Hosana!” ti'n an heta.
11 Jisu'n Jerusalem a tungin chu Biakinah a lut a, neinun nam a ena. Nikhomrese, kholoi a hong ni zoi sikin ruaisi somleinik ngei leh Bethania an se zoia.
Jisu'n theichang kung khomak asam
(Mat 21:18-19)
12 Anangtukah chu Bethani renga an hong kir nôka, Jisu avon a hong cham pea. 13 Hanchu, ralsai renga theichang kung abua ngei hah ava mua, masikin
“Amara tete mo ka man” ti'n ava pana. Hannirse, ava tungin chu a buo tiloi chu khoite dang mu maka, anra zora ani loi sikin. 14 Jisu'n theichang kung kôma, “Tuten na mara sak man khai no rese ngei!” a tia. A ruaisi ngei khomin ama chong ha an riata.
Jisu Jerusalem Biakinah ase thurchi.
(Mat 21:12-17; Luk 19:45-48; Jon 2:12-22)
15 Hanchu, Jerusalem an tungin chu Jisu Biakinah ava luta, Biakina neinun zuor ngei leh rochok ngei hah a rujul pei ngeia. Sum thulngei maicham leh pharvali zuor ngei sukmun khom a nam melet pe ngeia, 16 Mapenah chu Biakinah tuol han tuten neinun chôi rangin phal khai maka. 17 Hanchu, loko ngei kôm han, “‘Ki Biakin chu nam tin ta ranga chubai thona in ti an ti a’ ti'n ansui ni mak mo? Nangni ngei rekin chu inru ngei inthup in ke nin minchang hi!” ti'n aminchu ngei a.
18 Mahah Ochaisi ngei leh Balam minchupu ngeiin an riata, masikin Jisu thatna rang lampui an rok zoia. Loko ngei ha a minchuna hah ankhel sabak an ti sikin ama hah an chia.
19 Hanchu, kholoi a hong ninchu Jisu leh a ruaisi ngei hah khopui renga an suok zoia.
Theichang kung chongmintek
(Mat 21:20-22)
20 A nangtuk jingah chu ha lampuiah an lôn chungin theichang kung hah arjung denin a themin an mua. 21 Peter ahong in riatsuok nôka, akôma, “Miminchupu, enta theichang kung khomak na sam hah a them let zoi!” a tia
22 Jisu'n an kôma, “Pathian taksôn roi. 23 Diktakin nangni ki ril; tutukhomin hi muol hi, “Inthon inla., tuikhanglianah van pei roh” ti senla, a mulungrila okcha loiin ai ti hah tung a ti, a iem inchu ata rangin sinin om a ti. 24 Masikin nangni ki ril, khokhoi nin zongin nin ngen ngei murdi chu a man sei in mindôn ungla, hanchu man nin ti. 25 Hanchu, chubai ranga nin inding rachamin tu chunga khom nourna nin nei leh khom ngâidam roi, invâna nin Pa khomin nin minchaina ngei hah nangni a ngâidam theina rangin.” b
Jisu rachamneina anrekel na chong
(Mat 21:23-27; Luk 20:1-8)
27 Hanchu, Jerusalem an tung nôka; Biakinah a lôn laiin Ocheisi ngei, Balam minchupu ngei leh Upa ngei Jisu kôm an honga, 28 Akôma, “Tu rachamin mo hi ngei hih ni sin? Hi rachamneina hi tu nang pek mo? tin an rekela.
29 Jisu'n ankôma, “Kei khomin, chong baikhat nangni rekel ka ta, mi thuon ungla, hanchu, tu rachamin mo hi ngei hih ki sin nangni ril ki ti. 30 Mi thuon ungla, Johan hi Baptisma tho theina racham hah Pathian renga mo, miriam renga mo?” ti'n arkel ngeia.
31 Hanchu, an then viakin an vankhala, “Khoimo ei ti rang? ‘Pathian renga,’ ei ti lakin teh hanchu khoitho mo ‘Johan hah nin iem loi?’ Mi ti ata. 32 ‘Miriam renga’ ei ti rang mi hi?” an tia. (Nikhomrese, loko ngei rang lak an chia, mitinin Johan hah Deipu tatak in an leibe sikin) 33 Masikin Jisu an thuonna chu riat mak meh an tia.
Jisu'n an kôma, “Kei khomin tu racham mo hi ngei hih ki sin nangni ril uol no ning” a ti pe ngeia.