¹ Koto kenke pa:ta:ta: mo hande amba: titina: Eipoloha:ma: hayeke dina: epeeke tea: kima: handekeeki paa epeekeme. Kota: Aisa:keta: mo Kita daoni nane mo Pilisidaini wanda:halina: kini Abimeleke hayeke nane peekeme. A̱i̱ na peeke haena:ta: ² mo Tekehalima: Aisa:ke pa:ta: peneme yao hata: alota: Idiepi kenke nane na peke do I̱ma: hae alo kenkena: kone hapeke. ³ I̱ma: neke yaapo hata: neke epealuekema: do pate hapeke. I̱ma:ta: do kenke paeyaota: neke pa:ta: make kia naka: monduma: monduma: pilipi wekiwandikina: wekiwandiki pa:ta: make halueke. Kutupa I̱ma:ta: naka: apa: Eipoloha:ma: yaapo la: upa: pita: paa wilieke. ⁴ I̱ma:ta: naka: monduma: monduma: pilipi wekiwandikina: wekiwandikita: oli yana: hala: hombulanka:manu hala: tupa: haena: kulueke. Kutupa iki pa:ta:ta: do kenke paeyao halueke. I̱ma: naka: monduma: monduma: pilipi wekiwandikina: wekiwandiki pa:ta: yama:ta: mo tutu paeyao sikita: epeaasa:eki mina: lolueke. ⁵ Kota: Eipoloha:ma:ma:ta: yaka pi make yaka lo pimanu make opua miniki haya: ekina:ta: I̱ma:ta: neke epealueke laa leekeme.

⁶ Koto ekina: Aisa:keta: Kita daoni pa:ta: hao hayekeme. ⁷ Kutupa koto pa:ta: haemeke haliwekima: alota: Mo wanda:ta: epi yaka:ta:pe lemeke handaata: ipika: ana:e leekeme. Ipikana:ma: ipika: wanda:e pi na leeke ekita: Lepekata: wanda: seliapo yalo hata: koto pate haemeke haliwekima: Lepeka muluekema: ipiki liaama:na: laa paala:ma: homolo hata: leekeme. ⁸ Kutupa Aisa:ke koto kenke pa:ta: natemanu hosiki haena: laa mo kini hali Abimeleketa: ipika: winido pa:ta: handa:niayekepate Aisa:kema:ta: Lepeka telepo la:tiaaso pitipekeeki handeekeme. ⁹ Kutupa Abimelekema: Aisa:ke handa: mulu pena: la alota: Kota: naka: wanda: ya:ka:ta:me. Pa ekipeke naka: ana:e la pelepe leekeme. Aisa:kema: hombo peaaso alota: Yaka honema:ta: Yaka wanda:e loa:ka:na:ta: kota: I̱ limikie hone ua:me leekeme.

¹⁰ Abimelekema: alota: Nakana:ma: niki pa:ta: eki hau pea pelepe. Mo yaka hali ma:nda:ma: naka: wanda: yaapo ana:na: polu pia:me. Nikana:ma: koto hoke hau puma:ka:na: yoluta: kota: teketa: neke kone yolo pia:me leekeme. ¹¹ Kutupa Abimelekema: ipika: wanda:hali paeyao pa:ta: pi la: witolo alota: Ma:nda: epima: do hali o ipika: wanda: hoke tupa: handeteke haya:ka:na:ta: kota: koto someta: lu homaena:e leekeme.

¹² Kutupa Koda:ma: Aisa:ke epeayeke ekiyalo hata: ipikana:ma: koto kenke pa:ta: wae alemanu nokopeeketa: mo nokopeeke bapina:ta: ota: anekema: haka:ta:pake napeke tieke mia:tiki piekeme. ¹³ Kutupa ala:ta: ala:ta: wopu mutia pea:eki yalo hata: ota: hamoko hali hayekeme. ¹⁴ Aisa:keta: sipisipi wopu make kaomanu wopu make e pokaasa: haliweki wopu make yalo hata: mo Pilisidaini tapakema:ta: we pambemekeme. ¹⁵ Koto ekina: Ikana:ma:ta: mo hande ipika: ateke Eipoloha:ma: pa hata: ipika: e pokaemeke haliwekima: awemeke naku ikalimanu pa kenke ao tumbaemekeme.

¹⁶ Kutupa Abimelekema: Aisa:ke pa:ta: alota: Neketa: niki ankulake wele ula:ma: nika: kenke mina:pa:lae leekeme. ¹⁷ Koto ekina: Aisa:kema:ta: mina:pa:lao mo Kita hadipina: palai da pua a:eyekeme. Koto pa:ta:ta: nate mandane ekina: ¹⁸ Koto pateta: mo hande Eipoloha:ma: hayeke natena: naku ikalimanu aweekepate Eipoloha:ma: homeeke dina:ta: mo Pilisidaini tapakema:ta: ao tumbaemekeme. Koto naku ikali manuta: Aisa:kema: pa aweekeme. Ipikana:ma: mo naku ikali biki manuta: atekema: leekeeki kone paa leekeme.

¹⁹ Aisa:kena: e pokaemeke haliwekima:ta: mo hadipina: panake naku ikali awa ikali handa: wimikime. ²⁰ Kutupa mo Kita kenke pa:ta: sipisipi handeteke haemeke haliwekima: mo Aisa:kena: sipisipi handeteke haemeke haliweki ame̱le̱ hankiliki yololo hata: alota: Do ikalita: nika: ekie lemeke handaa Aisa:kema: mo naku ikalina: bikita: Hankilikie leekeme.

²¹ Kutupa Aisa:kena: e pokaemeke haliwekima: naku ikali ma:nda: awemekepate koto ekina: make ape hankiliki ombu yolemeke handaa mo naku ikalina: bikita: A:nda: Pita:la:ekie leekeme. ²² Kutupa Aisa:kema:ta: koto pate mina:pa:lao pua naku ikali ma:nda: aweekeme. Koto ekina:ta: hankiliki na yolemeke handaa ipika: bikita: Lihobodi (nika: da pita: Ka:la:pa: Tapaala:me) leekeme. Kutupa ipikana:ma: alota: Niki do kenkena: hamono Tekehalima: niki ka:la:pa: tapaala:me. Koto ekina: ameta: do pateta: ala:ta: ala:ta:manu ana:na: kone wia halumeke leekeme.

²³ Kotoeki hoki naneta: Aisa:keta: pao mo Biasiba nane peekeme. ²⁴ Koto timba Tekehalima: ipiki pa:ta: peneme yao alota: I̱ta: naka: apa: Eipoloha:ma:na: Koda:e. Koto ekina: paala:ma: na homa:pee. I̱ta: neke yaapo halome. Kutupa I̱ma: mo yaka e pokaeya: hali Eipoloha:ma: pa:ta: pi la: ua: ekina:ta: neke epeaaso hata: naka: monduma: monduma: pilipi wekiwandikina: wekiwandikita: tieke kulueke leekeme. ²⁵ Koto pateta: Aisa:kema: *oloda wepia Tekehali pa:ta: yeni hau piekeme. Kutupa ipikana:ma: ipika: palai da koto pate a:eyeketa: ipika: e pokaemeke haliwekima:ta: koto pate naku ikali ma:nda: awemekeme.

²⁶ Abimeleketa: ipika: hone u tiao hayeke hali Ahusa:de make ipika: amina: you hali Pikolo ame̱le̱ Aisa:ke handulueke alo Kita nanema: epemekeme. ²⁷ Koto ekina: Aisa:kema: lota: pitolo alota: Amba:ta: I̱ pa:ta: a:nda: lia naka: kenke mina:pa:lao pue le ale pa ameta: ekipeke I̱ handolo a:pa pelemepe leekeme.

²⁸ Ikana:ma: hombo peaaso alota: Ameta: Tekehalita: neke ame̱le̱ hala:eki handolo hata: nika: honema:ta: neke niki ame̱le̱ pi tonkao umana:e. Nika: honema:ta: niki pa:ta: pi dupa la: uelena:e. ²⁹ Mo nikana:ma: neke na hoeyaoma: tupa: nakana:ma: niki make na hoeyalena: pi la: uelena: loa:me. Nikana:ma:ta: neke pa:ta: a:ta:ma: homolo hata: yopu kone mina:pa:lao poelena: loma:me. Koto ekina: ameta: mo Koda:ma: neke epeala: ekita: peneme yala:me lemekeme. ³⁰ Kutupa Aisa:kema:ta: ika: ne pambaeyeke handaa ne ikali nemekeme. ³¹ Da kelepeeketa: hali homeke homekema: ika: la wimiki pita: keke pima: tonkao wimikime. Kutupa Aisa:kema: mo haliweki pa:ta: a:taloe leeketa: yankeke tonu au laa pemekeme.

³² Koto natena: kone Aisa:kena: e pokaemeke haliwekima: naku ikali ma:nda: awemekeeki a:pa la halolo hata: alota: Ikali handa: uluma:me lemekeme. ³³ Ipikana:ma: koto naku ikalina: bikita: Pi La: Wita:la: Ekie leekeme. Kotota: mo hande Biasiba daoni ipika: biki mieke tupa:e.

³⁴ Iso ipiki 40 bapi mieketa: Hidi wanda: yaapo miekeme. Ipilikita: Bitina: waneke Diudi make Elonina: waneke Basema:de yekeme. Mo wanda: yaapoma:ta: Aisa:ke pita: Lepeka yaapo ka:nda:ma: homaepekeme.