¹ Aisa:keta: ameta: koke yaa leke holu piekeme. Ipikana:ma: ipika: mupeke weki Iso wi la: mea alota: Yaka wekio leekeme. Mo wekima: hombo peaaso alota: Wae leekeme. ² Koto leeke Aisa:kema: alota: Ameta: I̱ koke ya homolo poloeki teke pa:ta: ya:la: ekita: do handele handa:e. ³ Koto ekina: naka: semoko a:ndeli mea oni hapekena: pua hoteke ma:nda: lia a:pa:peke. ⁴ Kutupa mo yaka hone pa:la: tendepiki ne yankao I̱ pa:ta: mea a:pa:peke. Kutupa naa pita:ta: mo I̱ homuluekema: pita: yaka paeyaaso epeaasa:eki neke kuluekema: loa:me leekeme.

⁵ Kutupa Aisa:kema: Iso pa:ta: pi la haleeketa: Lepekama: opu hayekeme. ⁶ Kutupa ipikana:ma: Dieikope pa:ta: alota: Naka: apa:ma: Iso pa:ta: lea:eki I̱ma: dupa opolome. ⁷ Hoteke ma:nda: mea a:pa yaka hone pa:la: tendepiki ne yankapeke. Kutupa naa pita:ta: I̱ homuluekema: pita: Tekehalina: leke popelekena: neke pa:ta: yaka epeaasa:eki kuluekema: loa:me lea:me leekeme. ⁸ Kutupa Lepekama: ombu alota: Yaka wekio. Ameta: I̱ma: alo pi opua pie. ⁹ Oni ma:na:manu hala: pa:ta: pua panka wiki nanikosi ikiki yaapo mea epoe. Koto ekima:ta: mo naka: apa:na: ta:na:ma: homo hala: ne yankaluekema: loa:me. ¹⁰ Kutupa ipikana:ma: nena: nakana:ma: mea pekena:ta: kota: ipiki homuluekema: pita: ipika: epeaasa: ekita: neke kina: loa:me leekeme.

¹¹ Pate Dieikopema: ipika: ama: pa:ta: alota: Isota: itiki pelipa pa:la:pate yaka loketa: homu pa:la:me laa hone wilime. ¹² Ma:nda:ta: yaka apa:ma: I̱ watao I̱ma: ipiki makeaasoma: laa I̱ handa: wiaapa:na:e. Dupua:ka:na:ta: kota: mo epeaasa:eki mina:la: tupa: paa yaka kone I̱ pa:ta: esihou pi mea epena: lapeke yeke loa:me leekeme.

¹³ Koto leeke ipika: ama:ma: hombo peaaso alota: Yaka wekio. Koto ipilia: esihou pi manuta: I̱ pa:ta: epena:ma: pa mo I̱ma: aloeki pua pie. Mo nanikosi yaapo pua meawae leekeme. ¹⁴ Koto leeke Dieikopema: mo nanikosi yaapo mulu pua inkiki pa:ta: mea epeekeme. Kutupa mo wanda:ma:ta: mo wekina: atekema: ta:na:ma: homeeke nema: handekeeki yankaeyekeme. ¹⁵ Kutupa mo wanda:ma: oni da pa:ta: Isona: amu pea wiayeke dau manuta: mea Dieikopena: pambawaeyekeme. ¹⁶ Mo nanikosi yaapona: yonkeleke manuta: mo wekina: kiki yaapona: pambawaeyeke make kutupa ipika: itiki na pelieke alena: tonka:na: pambawaeyekeme. ¹⁷ Mo wanda:ma:ta: mo weki pa:ta: mo tendepiki ne make mo yankeeke betedi make haleekeme.

¹⁸ Kutupa Dieikope ipika: apa: pa:ta: pua alota: Apa:o leekeme. Atekema: hombo peaaso alota: Wae. Neketa: weki epi yaka:ta:pe leekeme.

¹⁹ Dieikopema: hombo peaaso alota: I̱ta: naka: mupeke weki Isoe. I̱ma:ta: naka: hande pea:pekee le hau pealome. Koto ekina: mo epeaasa: ekimanu I̱ pa:ta: kuelena:ma: pilisi tiao pita: mo I̱ma: mea a:palo hoteke nae leekeme.

²⁰ Koto leeke Aisa:kema: alota: Yaka wekio. Ekipa a̱i̱ handa: wia pelepe leekeme. Dieikopema: hombo peaaso alota: Mo Tekehali naka: Koda:ma: handa: wiono I̱ tamba: mia:me leekeme.

²¹ Aisa:kema: Dieikope pa:ta: alota: Pilisio. I̱ma: neke wataalo polo tupa: teke pa:ta: epoe. Neketa: ota: Iso ka:ta:pe leekeme. ²² Dieikopeta: ipika: apa: pitia: alena: paa teke pa:ta: pua pitiekeme. Kutu pieke atekema: watao alota: Naka: pi ho̱la̱:maketa: Dieikopena: ekima: handa:la:pate pa naka: kikita: Isona: kiki wataake nono pa:la:me leekeme. ²³ Ipikana:ma: Dieikopee laa na handa: wieke ekita: mo ipika: kiki manuta: Isona: ekima: handa itiki pelipa peeke ekima: piekeme. Ipikana:ma: ipika: epeaasa: ekimanu teke pa:ta: haluekema: pitiekepate kone ²⁴ paa lota: pitolo alota: Neketa: ota: Iso ka:ta:pe leekeme. Mo wekima: hombo peaaso alota: Aowe I̱e leekeme.

²⁵ Kota: Aisa:kema: alota: Mo mandane hoteke mea a:pae. Naa pita:ta: yaka epeaasa:eki neke pa:ta: kulueke leekeme. Koto leeke Dieikopema:ta: ne mea a:pao make nolo pieke waini ikali make mea a:paeyekeme. ²⁶ Kutupa mo weki pa:ta: ipika: apa:ma: alota: Yaka wekio. I̱ teke pa:ta: a:pa I̱ nunu pie leekeme. ²⁷ Ipikana:ma: ateke nunu pulueke alo hata: teke pa:ta: epea: dina:ta: Aisa:kema: mo yameeke aka:manu totopo mu hao ipika: epeaasa: ekimanu haleekeme. Ipikana:ma: alota:

³⁰ Aisa:kema: ipika: epeaasa:eki halaa Dieikope pulu haena:ta: ipika: hameke eiya:na: hao honda: pambolo epeekeme. ³¹ Ipikana:ma: make tendepiki ne yankao ateke pa:ta: mea pua alota: Pilisi apa:o. Mo naka: epeaasa:eki I̱ pa:ta: kuelena:yeke I̱ma: do mea a:palo hoteke ma:nda: noelena: tiao pitie leekeme.

³² Aisa:kema: hombo peaaso alota: Neketa: epi ya:ka:ta:pe leekeme. Ipikana:ma: hombo peaaso alota: Naka: mupeke weki Isoe leekeme.

³³ Aisa:keta: tola:tia pominolo hata: pututu liaaso alota: Mo hoteke lia I̱ pa:ta: mea epea:ta: epi ya:ka:ta:pe. Neke amba: do honda: pambolo ipuluekema: halena: kone noa:me. Yaka paeyaaso epeaaso ekita: ipiki pa:ta: haloa:ma: ameta: ota: ipika:eki homeke u halieke leekeme.

³⁴ Isoma: doeki opu haota: ka:pa:puki yoka anekema: e̱ wi tieke alo hata: alota: Apa:o. I̱ make naka: epeaasa:eki kie laa honke leekeme.

³⁵ Aisa:kema: hombo peaaso alota: Naka: kamema: I̱ a:pa makeaaso naka: epeaasa:eki mea pu moneala:me leekeme.

³⁶ Isoma: alota: Dota: ipika: hoto yaapo peao I̱ makeala:me. Koto ekina: ipika: biki Dieikopeta: ota: ana:piki tupa: laa pimika:ta:me. Ipikana:ma:ta: yaka mupeke wekina: anke teke mulu poloeki make mea ameta: yaka epeaasa:eki make mea pua pika:ta:me. Koto ekina: I̱ta: epeaasa:eki ma:nda: na panka: wialepe leekeme.

³⁷  Aisa:kema: hombo peaaso alota: I̱ma:ta: ipikana:ma: neke ankulao you haena: laa ipika: tapakemanu maketa: ipika: pa hameke e pokaasa: tapake haena: loa:me. I̱ma:ta: widi make waini ikali make haloa:me. Ota: yaka wekio. Neke pa:ta: pulu polo ekita: ma:nda: dia:me leekeme.

³⁸ Koto leekepate kone Isoma:ta: ateke pa:ta: honke ombu alo hata: alota: Apa:o. Mo epeaasa:eki homeke siki make ota: ma:nda: na wilipe. Apa:o. I̱ make epeae alo hata: e̱ leekeme.

³⁹ Kota: Aisa:kema: ipiki pa:ta: alota:

⁴¹ Atekema: mo hande epeaasa:eki hameke pa:ta: haleeke handaa Isoma:ta: Dieikope honditi piekeme. Ipika: honema: alota: Yaka apa:ta: teke pa:ta: homolo pa:la: ekina: ipika: homa: da pitulu polo ekita: teke pa:ta: ya:la:ma: Dieikope homena: lulueke hone wiekeme.

⁴² Pate Lepekama: Isona: pulueke leeke ekimanu amba: opu hao Dieikope epoa: la alota: Opie. Naka: kame Isoma:ta: hombo peaaso hata: neke lu homalueke ala:me. ⁴³ Koto ala:ma: yaka wekio. I̱ma: pie aloeki pia:peke. Mo yaka ana: Leibeni hala: alena: Hatani nane ame do kone pue. ⁴⁴ Kutupa ipiki yaapo hosiki haota: mo naka: kamena: mineke panka:la:eki uniao ⁴⁵ ipiki pa:ta: peleeki hone yonka:laena: loa:me. Kutupa neke handa: mulu epena:ta: ma:nda: tapaalueke. I̱ma:ta: pa ekipeke yaka weki yaapo homeke natena: alupalua:pe leekeme.

⁴⁶ Lepekama: Aisa:ke pa:ta: alota: Do Isona: da ma:nda: wanda: yaapo handa:peketa: I̱ta: ota: ki tieke pea soka:la: pita:la:me. Dieikopema: make do Hidi wandiki tonu ma:nda: mia:ka:na:ta: kota: I̱ta: homa:peke make ya:la:me leekeme.