¹ Pate Leisoloma:ta: Dieikope weki ma:nda: na mendiaaso hata:ta: hakepiki pa:ta: a:nda: tunkulolo hata: Dieikope pa:ta: alota: I̱ homuluekema: wekiwandiki kie leekeme.

² Koto leeke Dieikopeta: Leisolo yaapo mineke pankolo hata: alota: I̱ma:ta: Koda: topo pea:peke na ya:la:pate pa neke weki mendiaapa:na: yeke ipikana:ma: sa:sa: pitolo pia:ka:ta:me leekeme.

³ Koto ekina: mo wanda:ma: alota: Yaka weki mendialo pa:la: tupa: yaka pa hameke e pokaasa: wandiki doma: pelia:peke. Kutu pilia: ekima:ta: ipiki pa:ta: yama: ama: au loluekema: loa:me leekeme. ⁴ Koto ekina: ipika: haliki pa:ta: Biliha haleeke handa loke apa:taepekeme. ⁵ Kutupa Bilihata: weki loke lomba Dieikopena: hali weki mendiaeyekeme. ⁶ Leisoloma: alota: Koda:ma: telipolo hata:ta: I̱ ma̱leke lila:me. Ipikana:ma:ta: yaka pua: yeni opua weki ka:la:me leekeme. Koto ekina:ta: mo wekina: bikita: Da:ni leekeme. ⁷ Kutupa Bilihata: weki loke paa lomba ipikana:ma: Dieikopena: yaapo peao weki mondu wiayekeme. ⁸ Kutu pieke handaa Leisoloma: alota: I̱ma: yaka asi yaapo a:nda: tieke pua:pate I̱ma: bepolalo ekina:ta: kota: mo wekina: bikita: Na:petali leekeme.

⁹ Kutupa Liama:ta: ipiki weki mondulu piekeeki tunkuliekeeki hando haota: ipika: pa hameke e pokaasa: wandiki Silipata: Dieikopema: weteke au laena: haleekeme. ¹⁰ Kutupa Silipama:ta: Dieikopena: hali weki mendiaeyekeme. ¹¹ Kota: Liama: alota: Epekeeki ma:nda: I̱ pa:ta: a:pa:la:me laa mo wekina: bikita: Ka:de leekeme. ¹² Kutupa Silipama: Dieikopena: hali weki ma:nda: mendiaeyeke ekina: ¹³ Liama: alota: I̱ta: ta:na: tieke wopu pa:la:me. Ameta: wanda:wekima: I̱ta: ta:na:ma: homa:la: wanda:e lelimikie laa ipika: bikita: A:sia leekeme.

¹⁴ Mo hande widi kina:ta: Lubenita: oni e pa:ta:manu pua mo ma:nda:teiki leke ti kiliki handa: wia ipika: inkiki Lia pa:ta: a:pa haleekeme. Kutu pieke Leisoloma: Lia pa:ta: alota: Pilisi naka: wekina: ti kiliki I̱ ma:nda: kie leekeme.

¹⁵ Koto leeke Liama: hombo peaaso alota: Nakana:ma: yaka haliki pake nele ekita: ana: na pa:la:pe. Ameta: pa yaka wekina: ti kiliki tonka:na: muluekema: alepe leekeme. Kota: Leisoloma: alota: Naka: wekina: ti kiliki I̱ ma:nda: kika:na:ta: kota: ame timbata: Dieikope yaapo poluelena:e leekeme.

¹⁶ Kutupa welealo nane Dieikopeta: oni e pa:ta:manu hao epeeke handaa Lia hama opolu bao manda:hande pulu pua alota: I̱ma: yaka wekina: ti kilikima: nekena: amba: hamboa:ma: ame timbata: I̱ yaapo pelipikie leekeme. Koto ekina: koto timbata: Dieikopema: mo wanda: yaapo peliekeme.

¹⁷ Koda:ma: Liana: pieke yeni hombo peaasota: weki loke lomba ipikana:ma: Dieikopena: yunki pao weki mendiaeyekeme. ¹⁸ Liama: alota: Yaka pa hameke e pokaasa: wanda: yaka haliki pa:ta: haloeke handaa Koda:ma: yaka yenki ka:la:mee laa mo wekina: bikita: Isaka leekeme. ¹⁹ Kutupa Lia weki loke paa lomba ipikana:ma: Dieikopena: yunki mindiki hata: peao weki mendiaeyekeme. ²⁰ Kutupa Liama: alota: Koda:ma: I̱ pa:ta: ota: epeke pa kita:la: ale ka:la:me. Koto ekina: ameta: yaka halikina: yunki mindiki hata: weki mendiaaso ekina: I̱ pukima: homa handa: milieke laa mo wekina: bikita: Sebuloni leekeme. ²¹ Wetepena:ta: Liama: wandiki mondu wia bikita: Daena leekeme.

²² Kutupa Koda:ma: Leisolo hone u haota: ipika: pieke yeni opua weki mendina: leekeme. ²³ Mo wanda:ta: weki loke lomba hali weki mondu wiekeme. Kutupa alota: Koda:ma: yaka yala: pa:la: ekita: weki kitolo hata: mea baala:me.

²⁴ Koto ekina: mo Tekehalima: I̱ weki ma:nda: paa kina:e alo hata: koto wekina: bikita: Diosepe leekeme.

²⁵ Mo Diosepe mendia hoki naneta: Dieikopema: Leibeni pa:ta: alota: I̱ yaka da ponoma: I̱ tapae laa alota: ²⁶ Mo I̱ma: naka: e pokao molo wekiwanda: mea hatuku mina:pa:lao pono lae. Pa ekipeke I̱ma: naka: e epeke tupa: pokalo ekita: naka: hone wilimee leekeme.

²⁷ Koto leeke Leibenima: ipiki pa:ta: alota: I̱ma: doeki lono lae. Mo ale paeyao molo ekita: I̱ma: handeau opao handa: witolo Koda:ma: I̱ epeala: ekita: neke pa:ta: yama: pa:la:me laa hone ulume. ²⁸ Koto ekina: I̱ma: neke hambuluekema: naka: yenki dupae laa lae leekeme.

²⁹ Dieikopema: hombo peaaso alota: I̱ma: naka: e pokaaloeki make yaka kiki tukiki pa:ta: naka: sipisipi ma:na:manu sa:mba:lala:eki make naka: handeleme. ³⁰ Mo I̱ a̱i̱ na epeke hano hosiki siki wia hae ekita: ameta: tieke kiake sa:mba:la:pa ula:me. Kutupa mo Tekehalima:ta: I̱na: yeke neke epeaala:me. Koto ekina: ameta: I̱ma: yaka ekimanu handeteke halo polo natee leekeme.

³¹ Koto leeke Leibenima: alota: I̱ma:ta: neketa: ekipuma: hambonope leekeme. Dieikopema: hombo peaaso alota: I̱ta: yenki kipa:la:me. Nakana:ma: I̱ma: do alo ekina: a:pa:la:me leka:na:ta: kota: naka: sipisipi ma:na:manu paa handeteke hawalueke. ³² Koto ekina: ameta: naka: sipisipi polu pa:ta: puata: mo punu pa:la: sipisipi ikikimanu make wape wape piki o au au la:la: nanikosi ikikimanu make yata:pa meono lae. Kotoeki homeketa: mo yaka hone pa:la: yenkie. ³³ Koto ekina:ta: wetepe nina:ta: I̱ma: neke na makealomee laa ana:na: handilipikie. Pa ekipeke nakana:ma: yaka molo yenki handulueke alo epeka:na:ta: mo I̱ma: au au na la:la: o wape wape na piki nanikosi o punu na piki sipisipi ma:nda: wia haowa:ka:na:ta: kota: pake na:la:me laa handa: wilipikie leekeme.

³⁴ Leibenima: hombo peaaso alota: A:pa:la:me. Mo nakana:ma: aleeki ota: pupana:e leekeme. ³⁵ Pate koto natena: kone Leibenima:ta: mo wape da:peda:pe piki o au au leke nanikosi hali ekimanu make mo au au leke wanda: ma:na: paeyao siki make kutupa mo punu piki sipisipi paeyao make yata:po miekeme. Kutupa ipika: weki tonu paeyaoma: handeteke haena: laata: ³⁶ Dieikope mina:pa:lao koto au au leke ma:na:manu mea nate tepona: polo pieke tupa: papate mea pemekeme. Kutupa Dieikopema:ta: mo hande mina:pa:laeyeke au au na leke ma:na:manu handeteke hayekeme.

³⁷ Dieikopema:ta: mo ta:ta: ta:ta: piki ti palekemanu mea hake pu lopa lopa pina:ta: mandane yonkelekemanu loka:la: mepi piekeme. ³⁸ Kutupa ipikana:ma:ta: do ti paleke manuta: mo ma:na: manuna: ikali no haemeke kawaso wieke alena: pua nokopeekeme. Ipikana:ma: koto pate wieke ekita: mo ma:na: manuma:ta: ikali nolo a:pa koto pate tia:tiki pieke piekeme. ³⁹ Kutupa mo nanikosi manuma: mo ti palekemanu nokopeeke alena: tia:tiki pimikita: kota: mo panake mendia:tiki pimiki ikiki sunuta: au au la make wape wape piki ekimanu mondu wia:tiki pimikime.

⁴⁰ Koto ekina: Dieikopema:ta: mo sipisipita: nanikosi yaapo na apa:take ta:ta: haena: laata: mo koto sipisipi paeyaota: mo Leibenina: au au leke make punu piki sipisipimanu haya: nanema: leke popeleke yao haena: leekeme. Dupieke ekima:ta: ipika: ma:na:manu aneke hapu sa:mba:la:pa witolo hata: mo Leibenina: ma:na:manu ta:ta: putupa haena: leekeme. ⁴¹ Kutupa mo hande panka wiki wanda: ma:na: manuna: puteke pambiekeeki handolota: Dieikopema:ta: mo ma:na: manuma: ikali no haemeke kawaso wieke alena: tia:tiki pina: yeketa: mo ti paleke manuta: koto pate noka:pa:tiki piekeme. ⁴² Pate mo honkopu na hake ma:na:manu haemeke alena:ta: mo ti palekemanu na wia:tiki piekeme. Kutu pieketa: Leibenita: mo honkopu na hake ma:na:manu minolo hata: Dieikopeta: mo panka wiki ma:na:manu wia hayekeme. ⁴³ Kutu pieke ekima:ta: Dieikopeta: hamoko tieke hayekeme. Ipikita: sipisipi pita: nanikosimanu make pa hameke e pokaasa: tapake make kemelomanu make donkimanu make ota: wopu wia hayekeme.