¹ Dieikopema:ta: mo Leibenina: eiyeke tonuma: lemekeeki opieke ekita: dupae. Dieikopema:ta: mo nika: apa:ma: wia haya: ale paeyao ma:la:me laa Ipika: hamoko hala: ekita: mo nika: apa:na:eki ma:la: ekima: pa:la:mee lemekeeki opiekeme. ² Kutupa make ipikana:ma: mo Leibenita: amba:ta: homu piekepate ameta: leke tankema: handeekeeki handeekeme. ³ Koto ekina: mo Tekehalima: ipiki pa:ta: alota: Mo naka: apa:na: kenke nane make naka: tapake pa:ta: make paa pue. Kutupa I̱ta: neke yaapo halueke leekeme.

⁴ Koto leeke Dieikopema:ta: Leisolo pita: Lia yaapo pa:ta: mo ipika: ma:na:manu hayeke alena: ipiki a:pa manda:hande pia:pa:peke laa pi tapaeyekeme ⁵ Kutupa ipikana:ma: mo wanda: yaapo pa:ta: alota: Ipilika: apa:ma:ta: I̱ pa:ta: amba: pia: tupa: homu na piki pa leke tankema: handa:la:eki I̱ma: handolome. Kutu pa:la:pate yaka apa:na: Koda:ma:ta: I̱ yaapo hala:me. ⁶ Yaka welema: ipilika: apa:na: e pokalo ekita: hone wilipime. ⁷ Kutu pua:pate ipikana:ma:ta: I̱ makeao make yaka yenki manuta: hoto kiki yaapo natena: honditi pa:la:mee. Koto pina: kone Koda:ma:ta: ipikana:ma: I̱ na hoeyaena: lea:me. ⁸ Pa mo ipilika: apa:ma: alota: Mo au au lelie nanikosi manuta: naka: yenkie laa la:tiki pieketa: kota: mo ma:na: paeyaoma:ta: au au lekeeki mondu pamba:tiki piekeme. Kutupa paa alota: mo wape wape pilia: nanikosita: naka: yenkie pa la:tiki pia: dina:ta: kota: mo ma:na: paeyaoma:ta: wape wape pikieki homeke mondu pamba:tiki pia:me. ⁹ Kota: Koda:ma:ta: mo naka: apa:na: ma:na: manuta: pao mea I̱ pa:ta: ka:la:me.

¹⁰ Mo ma:na:manu tita:la: kina:ta: I̱ma: dupiki upa pua:me. Mo tia:tiki pimi nanikosi halieki manuta: au au laa make wape wape pikieki homeke handoa:me. ¹¹ Kutupa mo Koda:na: enisoloma: upama: I̱ pa:ta: alota: Dieikopeo leeke I̱ma: Wae loa:me. ¹² Koto loeke alota: Handa:e. Mo tita:la: nanikosi halieki manuta: mo au au leke make wape wape piki ekimanu homekee. Dupita:la: ekita: mo Leibenima: neke pa:ta: pita:la:eki handolo hata: I̱ma: dupiki hau pina: alome. ¹³  I̱ta: nakana:ma: mo hande toopita: hone u tiaasa: ale wina: la olipi oeta hola keke pi la: wi ale Bedele hama pa:ta: peneme yao epoa: Koda:e. Koto ekina: ameta: mo neke mendia: kenke nane polena: tikitiki yae laa lea:me leekeme.

¹⁴ Koto leeke Leisolo pita: Lia yaapoma: Dieikopena: pi hombo peaaso alota: Mo dikana:ma: dika: apa: pa:ta: mea:peke ale ma:nda: dia:me. ¹⁵ Ipikana:ma: dikita: da ma:nda: wanda:ma: handaala:me. Ipikana:ma:ta: diki tapao mia: manita: na:ta: pa:la:me. ¹⁶ Mo Koda:ma: dika: apa:na: alemanu paeyao ma:la: ekita: dika:eki make diki wekiwandikina:eki konee. Koto ekina: mo Koda:ma: neke la ka:la:eki kone pie lepekeme.

^17-18 Koto ekina: Dieikopeta: mo ateke hayeke alena: Keinani nane poluekema: tikitiki yaeyekeme. Ipika: wekiwandiki make weteke tonu make mo kemelomanu manda pitaeyekeme. Kutupa ipika: ma:na:manu paeyao make mo ipika: Mesopoteimia hata: mieke alemanu paeyao mea pulu haena: leekeme. ¹⁹ Leibenita: ipika: sipisipi manuna: itiki tunkulu pu moneayeke hoki nane haena: Leisoloma:ta: atekena: da pa:ta: pa wepia wieke koda:manu pake miekeme. ²⁰ Dieikopema:ta: ipiki mina:pa:laasome laa Leibeni na opuaeyeke ekima:ta: Leibeni makeaeyekeme. ²¹ Ipikana:ma:ta: ipika: alemanu paeyao mea ipupulo mina:pa:laeyekeme. Kutupa mo Yupoteitisi ikali yuma pua mo yu elimanu wiki Kilia:de kenke nane polueke alo pemekeme.

²² Nate tepo paeyeketa: Dieikopeta: pindipa pa:la:me laa ma:nda:ma: Leibeni la haleekeme. ²³ Kutu pieke handaa ipika: haliweki hatuku hoto wataake hata: natena: Dieikope telia: mea pua mo yu eli hapeleke Kilia:de kenke pa:ta: pua teliminimikime. ²⁴ Koto timbata: Koda:ma: Leibeni pa:ta: upama: alota: Nakana:ma: Dieikopena: ala:ta: ma:nda: mulueke alo hata: paala: tiaapeke hau ma:nda: ota: na pea:peke laa leekeme. ²⁵ Dieikopema:ta: ipika: palai da manuta: mo pote pa:ta: a:eyekeme. Kutupa make Leibeni ipika: palai data: ipika: da haliweki ame̱le̱ mo pote eli wiki Kilia:de kenke pa:ta: a:eyekeme.

²⁶ Leibenima: Dieikope pa:ta: alota: Nakana:ma: I̱ta: ekipeke makeao mo yaka wandiki yaapota: mo a:nda: pa:ta: dipula mina:la: wanda:wekima: handeke tupa: hatuku mea a:pa pelepe. ²⁷ I̱ta: ekipeke makeao I̱ na opuake yopusiki doda:pikima: a:pa pelepe. Nakana:ma: I̱ lekena: yoluta: mo neke tapaaso hata: pota:na: ta:na:ma: homolo kida make tapekema: handeke ale make litolo hata: emelimanu lo tapaalo pua:me. ²⁸ Nakana:ma:ta: yaka wandiki yaapona: wekiwandiki make yaka wandiki yaapo make a:taloe pi alo hata: nunu na piono lemee. Koto hauta: ota: ti na piki hau peleme. ²⁹ I̱ma:ta: neke hoeyalo polo honkoputa: ula:pate naka: apa:na: Koda:ma:ta: ambaneke timba I̱ kinki pitolo alota: Neke paala: tiaapeke hau ma:nda: ota: na pea:peke lea:me. ³⁰ I̱ma: hone witolota: neketa: da a̱i̱ a:pawema: ta:na:ma: homolo hata: pelepate ekipeke ya da pa:ta: ua: koda: alemanu pake naa a:pa pelepe leekeme.

³¹ Koto leeke Dieikopema: hombo peaaso alota: Yaka honema:ta: nakana:ma: naka: wandiki yaapo pao milipipatema: I̱ma: paala:ma: homoa:me. ³² Pate ma:nda: epima: naka: wepia wiki koda:manu wia haemeka:na:ta: kota: koto someta: lu homaena:e. Do dika: haliwekima: wekitisi haaso haena:ta: pa naka: alemanu weiya naka: ekita: mia:peke laa leekeme. Koto leekeeki Dieikopema:ta: mo Leisoloma: Leibenina: wepia wieke koda:manu pake neekeeki na handeekeme.

³³ Koto leeke Leibenima:ta: Dieikopena: palai da pa:ta: pua weiya kutupa Liana: palai da pa:ta: make mo pa hameke e pokaasa: wanda: yaapona: palai da pa:ta: make pua weiyekepate ipika: wepia wieke koda:manu na handa: wiekeme. Kutupa Leisolona: palai da pa:ta: peekeme. ³⁴ Leisoloma:ta: mo hande da pa:ta: wieke wepia wieke koda: manuta: mo kemelo ma:na:na: hoki manda yama pita:la: seama: handeke alena: u hayeke nu pa:ta: mendia ipikita: manda pua pitiekeme. Leibenima:ta: mo palai da pa:ta: weiyekepate na handa: wiekeme. ³⁵ Leisoloma: ateke pa:ta: alota: Apa:o. I̱ yaapo mineke na panka:peke. Mo naka: leke popelekena: I̱ na tiao halo ekita: I̱ta: kaisepo da handolome laa leekeme. Kota: Leibenima:ta: weiyekepate ipika: wepia wieke koda:manu ota: na handa: wiekeme.

³⁶ Kutu pieke handaa Dieikopeta: mineke tunkulu mea nalo hata: alota: I̱ma:ta: ekipiki ata:ka: peaasa:eki polope laa mineke pankolo hata: lota: pitolo alota: Mo I̱ telia: mea epele ekita: I̱ma: hando tombo ula: pi yambololo ekima: pie leeke pelepe. ³⁷ Ameta: nakana:ma: yaka ala:ta: ala:ta: paeyao koto talo pelema: mo naka: da pa:ta: ula: ale manuta: hando ekimanu handa: wilipe. Naka: haliwekima: make yaka haliwekima: make handolota: epima:ta: ota: hau pa:la:mee lena:ma: do hamekena: mea wie. ³⁸ I̱ma:ta: 20 bapina: neke yaapo haowa:me. Naka: sipisipi manuma: make nanikosi manuma: make ikiki pa epeke ombu mendiolo haememe. Kutupa make I̱ma:ta: naka: sipisipi hali ekimanu homeke ma:nda: ota: na lu noa:me. ³⁹ Mo tikene ma:na: yeti sayalema: naka: sipisipi ma:nda: lu neeketa: kota: I̱ma:ta: ota: yaka kone epeatiki pua:me. I̱ma:ta: yaka pu hoeyaasoeki dia:me laa loluekema:ta: neke na a:pa wala:tiki pua:me. Kutupa nakana:ma:ta: mo timba o natena: pake na:tiki pia: ekita: I̱ pa:ta: ota: a̱i̱ koto kone epeae laa la:tiki pime. ⁴⁰ Hoto anekema: mo natena:ta: nate titipuma: homa:la:eki mea:tiki pea timbata: kosa:ma: homa:tiki pitolo u pelia:peke na ya:tiki pia:me. ⁴¹ Koto hauta: mo hande neke yaapo hatia pu haowa: 20 bapi tukiki pa:ta: pia:ekie. I̱ma:ta: 14 bapita: naka: wandiki yaapo muluekema: naka: e pokaoka:na: mo yunki mindiki hata: bapina:ta: naka: ma:na:manu ma:nda: muluekema: handeteke haowa:me. Kutu piono kone nakana:ma:ta: yaka yenkita: hoto kiki yaapona: topo pime. ⁴² Mo yaka apa:tonu Eipoloha:ma: Aisa:ke yaapona: Koda: I̱ yaapo na hata: yoluta: nakana:ma: I̱ta: amba: kone kiki hameke pono tapaalo pime. Pate Koda:ma:ta: yaka ka:nda: make I̱ma: pokoa: e make hando haota: ambaneke timbata: ipiki paeyaaso hata: I̱ ma̱leke lia pia:me leekeme

⁴³ Leibenima: Dieikope pa:ta: hombo peaaso alota: Do wandiki yaapota: yaka wandiki yaapoe. Ipilika: wekiwandikita: yaka ekie. Kutupa do ma:na:manu paeyaota: yaka ekie. Handa:taa. Do ale paeyaota: yakaeki ya:la:me. Pate I̱ma:ta: do yaka wandiki yaapo make ipilika: wekiwandiki make pao muluekema:ta: hau ma:nda: pea:peke na ya:la: ekina:ta: ⁴⁴ kota: neke yaapo a:pa:la:me laa pi tonkaluekema:ta: I̱ta: tikitiki yao halome. Ameta: mo dika: pi tonkao witolopa:eki niminao haluekema:ta: toopimanu mu momba:la hombuta: hapana:e leekeme.

⁴⁵ Koto leeke Dieikopema:ta: niminao halo pieke toopi mea haena: laata: ⁴⁶ ipika: haliweki pa:ta: alota: Mandane toopimanu mu hombuta: hape leekeme. Kutupa koto toopimanu mea hombuta: hayeke ale tea: naneta: iki paeyao pita: ne nemekeme. ⁴⁷ Koto pateta: Leibenima:ta: Dieka Sahaduda leekeme. Kutupa Dieikopema:ta: Ka:lidi leekeme. ⁴⁸ Leibenima: Dieikope pa:ta: alota: Do mu mombololopa: toopi manuma:ta: diki telipuna: hone u tialieke leekeme. Koto ekina: yeke koto pateta: Ka:lidi leekeme. ⁴⁹ Leibenima: ombu alota: Diki ta:ta: pualu pupa:ka:na: maketa: Tekehalima: diki handeteke haena:e laa mo alena:ta: biki ma:nda: Misipa make leekeme. ⁵⁰  Leibenima: pi paa alo alota: Nakana:ma: yaka wandiki yaapo epeke tupa: na handeteke hake o wanda: ma:nda: mu pika:na:ta: I̱ma:ta: na opulu polopate Koda:ma:ta: diki handa:la:me laa hone wia:peke. ⁵¹ Dota: neke diki tukikina: I̱ma: mu mombololo toopi manue. Kutupa do toopita: niminapeke toopie. ⁵² Do mombololopa: toopimanu make do niminapeke ekina: toopi maketa: diki hone u tialo pa:la:ekie. Koto ekina: I̱ma:ta: neke hoeyaluekema:ta: do mombololopa: toopimanu ankulao na ipulueke. Kutupa nakana:ma: I̱ hoeyaluekema:ta: do toopimanu o do niminapeke toopi ula:eki ankulao na a:pa:peke. ⁵³ Mo Eipoloha:ma: pita: Neiho yaapona: Koda:ma: dika: haumanu telipaena:e leekeme. Koto leeke ekina: Dieikopema:ta: mo ipika: apa: Aisa:kema: yeiya: lao yeni pu hayeke Koda:na: bikina: mo pi la: wipikieki opulueke laa keke pi la: wiekeme. ⁵⁴ Kutupa ipikana:ma: ma:na: ma:nda: liata: mo potena: Koda: pa:ta: yeni hau pea ipika: haliweki wi la: meata: ne nemekeme. Ne no paeyaota: koto timbata: mo pote pa:ta: pelimikime. ⁵⁵ Da kelepeeketa: Leibenima: ipika: wandiki yaapona: wekiwandiki make waneke yaapo make nunu peata: paa da poluekema: la:ka:la peekeme.