¹ Hao hao pea nate ma:nda:na:ta: mo Idiepi kinina: waini ikali handeteke hayeke some pita: betedi yanko hayeke some yaapoma:ta: mo Kini somena: puki ka:nda: peaepekeme. ² Koto ekina: mo kinita: mo ipika: e pokaepeke you hali yaapo ame̱le̱ mineke pankolo hata: ³ mo hande Diosepe pitieke ale pa:ta: oni dipula handeteke hayeke somena: da pa:ta: dipula mea pitaeyekeme. ⁴ Hali yaapota: nate wotuna: dipula pita:ta: mo dipula handeteke hayeke somema:ta: Diosepeta: mo hali yaapona: handeteke hala: hali haena: leekeme.

⁵ Timba ma:nda:na:ta: mo dipula da pa:ta: mo kinina: waini ikali handeteke hayeke somema: make mo betedi yanko hayeke somema: make telipuna:ma: upa teketa: ta:ta: pikieki pu alu pipikime. ⁶ Diosepeta: da ka:la:paaso mo hali yaapo pa:ta: epeekepate ipilikita: wenoko homa:niao pitipipikieki handeekeme. ⁷ Ipikana:ma: mo hali yaapo lota: pitolo hata: alota: Ameta: ipilikita: ekipeke wenoko homa:niao pitipipipe leekeme.

⁸ Koto leeke mo hali yaapoma: hombo peaaso alota: Diki telipuna:ma: upa polopa:pate mo upa tekemanu la kulu pa:la: some do pate ma:nda: na hala:me lepekeme.

Koto lepeke Diosepema: alota: Mo upa la:ka:la hala:peke ekina: honkoputa: Koda:ma: kone kitolo pita:la:me. Ipilika: upa yaapo la kipee leekeme.

^9-10 Koto ekina: mo kinina: waini ikali handeteke hayeke somema: alota: Ya upama:ta: mo yaka puki nanema:ta: hopiki tepo hake waini pu hayekeme. Mo katakemanu duta:pa lopa: lopa: pia: dina: koneta: mo momamanu liaata: mo waini kilikimanu make koto kone potea:me. ¹¹ I̱ma:ta: mo kinina: kapo miniki hata: pueke ale mo waini kilikimanu mea oni kapo pa:ta: dekepo pamba mo kini pa:ta: haloa:me laa la haleekeme.

¹² Diosepema: alota: Mo upana: teketa: do ekina: peleme. Mo hopiki tepota: nate tepoe. ¹³ Mo tepo natena:ta: kinima: neketa: dipula mina:pa:lalena: laa naka: hande poko hae e paa pokoelena: la:lieke. Kutupa nakana:ma:ta: mo hande amba: waini ikali handeteke hae tupa: mo kinina: kapo paa halo halipikie. ¹⁴ Koto pa:la:pate mo neke epeke tupa: pua hao pelika:na:ta: I̱ hone wia:peke. Kutupa make pilisi I̱ do dipula mina:pa:lano a:ta:ma: homa tamba: minolo hata:ta: mo kini pa:ta: pua opuapeke leekeme. ¹⁵ Pa ekipeke I̱ta: mo Hibulu tapakena: kenke pa:ta:ta: pake mea a:pa ame do Idiepi kenke pa:ta: maketa: I̱ma: dipula pula: hau ma:nda: na pua:pate kone pelememe laa leekeme.

¹⁶ Kota: mo hande betedi yanko hayeke you somema:ta: mo kinina: waini ikali handeteke hayeke you halina: upa tekemanu la haleeke ekita: epeke tupa: la haleeke handa ipikana:ma: make Diosepe pa:ta: alota: I̱ma: make upa dupa pua:me. I̱ta: betedi wiki kawaso paeyao tepo yaka youna: tuekeme. ¹⁷ Kutupa mo ota: manda tepo peao tueke ekina:ta: mo kinina: anemone ta:ta: ta:ta: piki palaowa kitikimanu yekeme. Kutupa mo ba manuma: mu nememe.

¹⁸ Diosepema: hombo peaaso alota: Teketa: dupae. Mo kawaso tepota: nate tepo la pa:la:me. ¹⁹ Nate tepona:ta: kinima: neketa: dipula mina:pa:lalena: laata: naka: make tunkilieke. Kutupa naka: loketa: ti hokuluna: endialimi alena: mo ba titima: naka: loke nelimikie leekeme.

²⁰ Kota: nate tepo paeyeketa: mo kinima: ipika: mendieke nate mieke handa ipika: you haliweki manuna: ne pambaaso hata: mo hande ipika: waini ikali handeteke hatiki pieke you some make mo betedi yanko hatiki pieke you some make telipuna: dipula da mina:pa:lao mo ipika: you haliweki pitimiki alena: hatuku epeekeme. ²¹ Ipikana:ma:ta: mo waini ikali handeteke hayeke you someta: ipika: amba: hande ena: paa haena: alo hata:ta: ²² mo palaowa yanko hatiki pieke you someta: lia endiayekeme. Do hau paeyaota: mo hande Diosepema: leeke tupa: siki kone piekeme. ²³ Pate mo kinina: waini ikali handeteke hawayeke somema:ta: Diosepe ota: hone na wiki hone yonka:la kilipayekeme.