¹ Koto hao pea bapi yaapo paeyeketa: mo Idiepi kini ipika: upama:ta: ipikita: mo Naili ikali tea:na: hayekeeki handeekeme. ² Kutupa mo ikali pa:ta: yama:ta: loke panka wiki yonkeleke homu piki wataake hata: kaomanu opa:liaota: mo ambumanu nalo haemekeme. ³ Kutupata: pa mandane wataake hata: kaomanu make opa:liaememe. Koto kao manuta: loke dia:ya make pa:ta:liki holiki yapeekeme. Ikita: mo titina: kaomanu haemeke alena: mo ikali tea:na: mandakena: pua haemekeme. ⁴ Kutupa mo loke dia:yeke kao manuma:ta: mo loke panka wiki kaomanu na:ta: paemekeme. Kotoeki handolo hata: mo kinita: paa tiaeyekeme. ⁵ Kutupa ipiki paa polu hola:pa upa ma:nda: dupa piekeme. Kunima: handeke ale widi opeekeeki liki homekena:ta: napeke paeyao wataake hata: wiekeme. Mo napeke manuta: panka wia napea wiekeme. ⁶ Kutupa pa wataake hata: widi napekemanu homeke ekina: ombu opa:liaeyekepate mo napeketa: na pankeekeme. Kota: mo hapupa pa:la: alena: yama: epeeke titipu piki poma:ta: mo napeke pou taeyekeme. ⁷ Kutupa mo na pankeke widi napeke manuma:ta: mo panka wiki napekemanu mea na:ta: paemekeme. Kota: mo kini tiaota: upama: pua:ka:ta:me laa handa: wiekeme. ⁸ Da ka:la:paasota: mo kinima:ta: hone ka:nda:ma: homolo hata: mo Idiepi kenke pa:ta: haemeke ti̱o̱ haliweki make mo hone u lenkene pimiki tapake make wi la: mipi piekeme. Kutupa koto haliweki paeyao pa:ta:ta: ipika: upa yaapo kelepeekepate homeke a:nda:ma: teke ota: la hala:peke na yekeme.

⁹ Koto ekina: mo waini ikali handeteke hayeke you somema: mo kini pa:ta: alota: I̱ma:ta: hoke hau poloma: ame neke pa:ta: keleponoe. ¹⁰ Nakana:ma:ta: mo amba: palaowa yanko haya: some diki pa:ta: mineke pankolo hata: mo dipula handeteke hala: somena: da pa:ta: dipula mea lopaeme. ¹¹ Kota: timba ma:nda:na: diki telipuna:ma: teke ta:ta: wiki upa pu alu pupa:me. ¹² Koto pa:ta:ta: diki ame̱le̱ mo Hibulu weki ma:nda: haya:me. Ipikita: mo naka: da handeteke haena: lele amina: you somena: pa hameke e pokaasa: weki yekeme. Dikana:ma:ta: ipiki pa:ta: dika: upa kelepopeke handaata: mo upa yaapona: teketa: ipikana:ma: diki la kia:me. ¹³ Koto mo somema: lea: tupa: koneta: nakana:ma: I̱ta: yaka e paa kipate mo betedi yanko haya: you someta: lu endiaeme laa la haleekeme.

¹⁴ Koto leeke ekina: mo kinima: Diosepe handa: mealo pupa: leeke handaa koto kone mo dipula da pa:ta: handa: mea epeekeme. Mo weki ipika: yankake itiki mea aka: topo pea paeyeketa: mo kinina: leke popelekena: epeekeme. ¹⁵ Kutupa mo kinima: ipiki pa:ta: alota: I̱ma:ta: upa pua:pate ma:nda:ma: koto upana: teke la kia:peke na ya:la:me. Ma:nda:ma: I̱ pa:ta: alota: Nakana:ma:ta: mo upa tekemanu lapeke ya:la:me laa lea:me leekeme.

¹⁶ Koto leeke Diosepema: hombo peaaso alota: Aneke halio. I̱ma:ta: pea:peke na ya:la:pate pa Koda:ma: homeke epeke tupa: teke la kilieke leekeme.

¹⁷ Mo kinima: alota: Yaka upama:ta: I̱ta: mo Naili ikali tea:na: hata: puekeme. ¹⁸ Kutupa mo ikali pa:ta: yama:ta: loke panka wiki yonkeleke homu piki wataake hata: kaomanu opa:liaota: mo ambumanu nalo haememe. ¹⁹ Kutupata: pa wataake hata: kaomanu opa:liaememe. Mo koto kao manuta: loke dia:ya pa:ta:liki holiki yapeekeme. Koto kao manuta: do Idiepi kenke pa:ta:manu I̱ ota: ma:nda: na hando alo ota: hoke kaomanu yekeme. ²⁰ Mo loke na pankeke kao manuma:ta: mo loke panka wiki kaomanu na:ta: paememe. ²¹ Kutu pimipate mo kaomanu nemekeeki ma:nda:ma: handa: wia:peke na ya:me. Pa ekipeke mo kao manuta: mo hande amba: haeme tupa: kone paa haemekeme. Kutupata: I̱ tiaowa:me. ²² Koto timba kone pa upa ma:nda: pua: ekita: mo kunima: handeke ale widi opeekeeki homeke likina:ta: napeke paeyao wataake hata: wiekeme. Mo napeke manuta: panka wia napea wiekeme. ²³ Kutupa pa wataake hata: widi napekemanu homeke ekina: ombu opa:liaeyekepate mo napeketa: na pankeekeme. Kota: mo hapupa pa:la: alena: yama: epeeke titipu piki poma:ta: mo napekemanu pou taeyekeme. ²⁴ Kutupa mo na pankeke widi napeke manuma:ta: mo panka wiki napekemanu na:ta: paememe. I̱ma:ta: do upa yaapota: mo ti̱o̱ haliweki pa:ta: kelepoa:pate pa homeke a:nda:ma: teke ota: la kia:peke na ya:me laa leekeme.

²⁵ Diosepema: mo kini pa:ta: alota: Mo upa yaapona: teketa: homeke konee. Koda:ma:ta: mo ipikana:ma: pulu pa:la:eki neke pa:ta: la ka:la:me. ²⁶ Mo panka wiki wataake hata: kao manuta: wataake hata: bapi manue. Kutupa mo panka ula: wataake hata: kunima: handeke widi napeke make homeke tupa: wataake hata: bapi manue. Mo upa yaapona: teketa: homeke konee. ²⁷ Kutupa mo wetepena: opa:liaeyeke loke na pankeke wataake hata: kaomanu pita: mo na pankeke kunima: handeke widi napeke mo hapupa pa:la: alena: yama: epeeke titipu piki poma: pou taeya: ekina: teketa: bapi wataake hata:na: tea: ki tieke epolo pa:la:ekie. ²⁸ Kotota: mo amba: hande la kua: tupa:e. Koda:ma:ta: mo ipikana:ma: pulu pa:la:eki neke pa:ta: wala:la:me. ²⁹ Kota: mo bapi wataake hata:na:ta: do Idiepi kenke paeyao pa:ta:ta: ne wotu tande pilieke. ³⁰ Kotoeki hoki naneta: bapi wataake hata:na: tea: ki ipilieke. Koto hoke tea: ki ipulu do kenke hoeyaeya:ka:na:ta: kota: ikana:ma: mo hande epeke bapi manuta: hone yonka:lalimikie. ³¹ Mo ne tande pea: bapi manuta: ota: hone yonka:lalimikie. Pa ekipeke mo ipilia: tea: kita: ota: teto pikieki ipilieke. ³² Mo hoto yaapo peao pele upana: teketa: mo Koda:ma: ota: pulueke laa wia kutupa teke pa:ta: kone pina: lelieke.

³³ Koto ekina: nakana:ma: mo hone u lenkene pa:la: hali ma:nda:ma: do kenke handeteke haena: ma̱leke luelena:e. ³⁴ Kutupa make mandane handeteke halo pimiki you halimanu meata: mo ne wopu wita:la: bapi wataake hata:na:ta: koto haliwekima:ta: mo wanda:hali paeyaona: amu pimi ne manuta: yunki hata: lo wina: laata: homeke lo meata: mu mombelena: lapeke. ³⁵ Mo tapakema:ta: mo ipula: epeke bapimanu pa:ta:ta: koto ne paeyaomanu mu mombelena: laata: Kutupa oni daoni pa:ta:manu koto kunima: handeke widi kilikimanu wia:peke damanu a:ena: biki halaata: handeteke haena: lena: lapekee. ³⁶ Mo koto Idiepi kenke pa:ta: epolo pa:la: tea: kita: mo amu pea wilimi nema: do Idiepi wanda:hali paeyao epealieke. Do hau pika:na:ta: wanda:hali paeyao tea:ma: na homilimikie leekeme.

³⁷ Mo kini hali pita: ipika: you haliwekima: make do Diosepema: leeke pina: a:pa:la:me laa ³⁸ mo kini halima: ipika: haliweki pa:ta: alota: Nikana:ma:ta: mo Diosepe ankulake Koda:na: Sipitidi pila: hali ma:nda: ota: na handa: ulumeke leekeme. ³⁹ Kutupa mo kinima: Diosepe pa:ta: alota: Koda:ma: do hau paeyao neke pa:ta: wala:la:ma: mo nakana:ma: aneke tupa: hone u lenkene pitele ekita: paeyao ota: ankulaleeki handoloma:me. ⁴⁰  I̱ma: neketa: yaka kenke paeyao handeteke halena: laata: mo yaka wanda:hali paeyaoma:ta: nakana:ma: pipa: lelipieki opua pina: lolueke. Naka: handeteke hale ekita: ya handeteke halo ekina: yaapo peao wina:e. ⁴¹ Koto ekina: I̱ma: neketa: do Idiepi kenke paeyaona: kapomanina: handeteke hala: you hali pituelena: ame ma̱leke litolome leekeme. ⁴² Mo kinima:ta: mo kapomanina: handeteke pila: ekina: pi tonkao u hala: linita: ipika: kikina: hola: mea Diosepena: kikina: pitaeyekeme. Kutupa ipika: lokena: mo epeke dau seliapo ma:nda: pambawaota: koloma: wepiki senipu ipika: make pa:ta: mokaeyekeme. ⁴³ Kutupa pomu lopena:ta: mo kinima: ipika: yaapo peao hosima: yola pula: ale mo Diosepe pa:ta: halaata: mo ipika: handeteke haemeke haliwekita: Diosepe titina: amba:la pulu hata: e̱ wi la: moneaaso alota: Pota: pilae. Pota: pilae laa lena: leekeme. Koto ekina:ta: Diosepeta: Idiepi kenke paeyao pa:ta: kapomanina: handeteke hala: hali pitiekeme. ⁴⁴ Mo kinima: ipiki pa:ta: alota: I̱ta: kini ya:la: ekina: do Idiepi kenke paeyao pa:ta: hala: some homeke ma:nda: sikima: nakana:ma: a:pa:la:ma: aleeki na miki hata:ta: kiki anke kone na mea mina:liaena:e leekeme. ^45-46 Kutupa Diosepeta: mo Idiepi biki ma:nda: Sa:pena:de Pania halaata: mo Heliopolisi daoni pa:ta: hayeke yeni peao hayeke hali Podipitana: waneke A:sena:de mina: haleekeme.

Diosepeta: 30 bapina: mo Idiepina: kinina: e kini pea pokaeyekeme. Ipikita: mo kinina: da mina:pa:lao mo Idiepi kenke honiki paeyao pa:ta: pomu lopeekeme. ⁴⁷ Mo ne tandepeeke bapi wataake hata: pa:ta:ta: ota: ne tieke opeeketa: ⁴⁸ Diosepema: meata: mo daoni pa:ta:manu da a:eya mu mombeleekeme. Daoni homeke homeke pa:ta:ta: koto daoni tea:na: hao yapeeke e pa:ta:manu ne meata: da a:eya mu momba:la wia:tiki piekeme. ⁴⁹ Kunima: handeke widita: ota: tieke wieke ekiyalo Diosepema:ta: tombo mieke ekita: mina:pa:laeyekeme. Mo widita: dawalana: houma: handeekeme.

⁵⁰ Mo tea: ki epolo pia: bapimanu a̱i̱ na epeke haena:ta: A:sena:dema: Diosepena: weki yaapo mendiaeyekeme. ⁵¹ Diosepema: alota: Mo Tekehalima:ta: mo I̱ma: mua: ka:nda:manu make yaka tapake make hone yonka:lano la:la:me laata: Mo mupeke wekina: bikita: Ma:na:sa: leekeme. ⁵² Kutupa make alota: Koda:ma:ta: mo yaka ka:nda: molo kenke pa:ta: wekiwandiki ka:la:me laa mo yaapo peao mendieke wekina: bikita: Ipoteimi leekeme.

⁵³ Kutupa mo hande Idiepi tapakena: ne tande peeke ta:na:ma: homemeke wataake hata: bapita: paelo epeekeme. ⁵⁴ Kutupa mo hande Diosepema: leeke tupa: kone mo tea: kina: wataake hata: bapi kini piekeme. Kenke ma:nda: ma:nda: pa:ta:ta: tea: ki tieke epeekepate Idiepi kenke pa:ta: homeketa: ne pa wiekeme. ⁵⁵ Mo Idiepi wanda: hali tea:ma: homolota: mo kini pa:ta: nena: honke loloendi pimikime. Koto ekina: mo kinima: ikita: Diosepe pa:ta: pena: laata: mo ipikana:ma: pipe lelia:eki pia:pa:peke laa leekeme. ⁵⁶ Mo tea: kita: mo Idiepi kenke paeyao pa:ta: putupolo hata: ota: hoeya:tia peeke handa Diosepema:ta: mo ne damanu lumba mo Idiepi wanda:hali pa:ta: widimanu tapatiki piekeme. ⁵⁷ Mo tea: kita: kenke ta:ta: ta:ta: paeyao pa:ta: ota: hoke tupa: putupieke handaa mo kenke ta:ta: ta:ta: pa:ta: haemeke wanda:halita: oni Idiepi da pa:ta: widi hambuluekema: Diosepe pa:ta: epemekeme.