Lɔga Mɛdɛra Garsa
15
1 Na zuga mukɛa gharata ko ga lɔma ridhing muktiya na kichirara nɔng.
2 Na zuga Bhɛrɛsi ko ga madhɛsɛnɛa zugo damiya Tumu mɛzi girɔngichine na se,
"Nɔng lamana zuga lɔma ridhing na aminɛ kari kɛ ɔng?"
3 Na ɛlɛhɛnɛsɛ ꞉Yesusi lɔgɔ
4 na sɛɛsɛ,
"Mɛya bhɛa nu hunde kona kiwo mɛdɛrne ku zugo hayna na kona kagar,
anda inde ngadhɔto ngagiya mɛrte mogiyɔ na lamio nganda wa garase ko bhee jɔanɛye a nɛng?
5 Na hunde jɔanaye,
dɛl na boono na kunɛ
6 chɔɔ ɔr.
Na senɛsɛn zuga gɛnyɛ,
‘Hoya kɛdɛlɛyɛni!
Mɛdɛra bare garsa wa kɔjɔyau.’
7 Ko nɔng hira lɔma ridhing hunde kun bhɛa Tumu na ujuk lɔga gɛrsaye,
zuga ɛla tumɔ dɛlɛ gore.
Nɔng bhɛa ngazukta ku 99 ridhing ninggɛye goore dɛlɛ nganda ujuk lɔga gɛrsaye."
Lɔga Gala Garsa
8 Wo hunde tɛri kona kɔtɔlɔ galyokte ku tɔmmɔn na kona kagarɛ x dori toye,
anda ngalamiwo dirr ko bhee jɔanɛ na terinyo chɔɔ go na dirono dori.
9 Na hunde jɔanaye,
senɛsɛno zuga gɛnyɛ,
‘Hoya kɛdɛlɛyɛni!
Gala bare garsa wa kɔjɔyau.’
10 Ngamɛa hira lɔma ridhing ko nɔng hunde kun bhɛa Tumu na ujuk lɔga gɛrsaye,
zuga ɛla tumɔ dɛlɛyɔ.
Lɔga Eriya Kàjɛa Birinya Na Dheshana Na Garsa Na Wokono
11 Na sɛɛsɛ,
"Hir kona bere lɔma erroye ku ramman.
12 Na na chinyo sɛɛsɛ shɔgɔnɛ,
‘Baba,
ngɛragany ahaye anda ale ganyde na kɛ̀zɛktɔ.’
Na shɔgɔnɛ iwa aha na ngɛru na aynɛ.
13 Na tɛa bhee chinyi na iwa ahaa kajɛa na zɛgu ɔr konnɔ rɛna na koo usuranu na garayɛ.
14 Na hunaa usurana na gartaye,
ba ɔra ihɛa te hozzo na nɔng chɔllayɛ.
15 Na assa ngazuktonu bhakkɛ ngaɔrronuye kona na ogolu zinggo.
Na hira ginani igomɛsɛ na kirogiyɛsɛ chɔwachin.
16 Na nɔng chirkanu hukoay amɛa ꞉chɔwachinu na hirre ajɛ garu.
17 Na lama hini na ɛsɛdhu lɔga bere ɛdɛya na seu,
‘Mɛya zuga mesinɛna doraa Babaa nanu aminɛ na chɔɔ tilɛn churanɛyɔ.
Na anye hozzo kɛrɛsɛ ore?
18 Ga kòk na kèsɛɛsɛ babaa nanu,
‘Dha bere kemesi gɛrɛng bhɛa nunu ko Tumu kari.
19 Ngamɛa ale ko eriya nunu dhere ngani ngakaniyo.
Mɛya kɔ anye any kete bariy hunde ngazukta mesinɛ bhɛa nunuye.’’
20 Na bana na ogu.
Na hunde koo dok ɔr jaye,
dharɛsɛ ꞉shɔgɔnɛ na towonyɛsɛ.
Na dɛɛbu na ngeu na iwu hoynɛ na chomu.
21 Na eri seu,
‘Baba,
bɔrɔ kemesa gɛrɛng bhɛa nunu ko Tumu.
Ngamɛa ale ko eriya nunu dhere ngani ngakaniyo.’
22 Na nɔng shɔgɔnɛ sɛɛsɛ barinyaa gɛnyɛ,
‘Ago hoyay ruminyaye bu chalde ko chaha ko worginya mɛyarɛ na bhurutɛsɛ na kamaluktɔ.
23 Na ago bɛrta arre bu chal idhibende na kìndi na kùsigi na kùduritɔ.
24 Nɔng eriya nanu bere gara na mɛya wa jɔyiya.
Te challi.
Anye bere keni ere na dha ngani i baseyɔ.’
Na tɔkta bi na indi na usigi na duriyɔ.
25 Na nɔng gɔynɛa bo i guyɔ.
Na hunde kun na se kadak dori jaye,
shigu kidhong hunde bu rɔk na zugo durɛye.
26 Na eleo bariy kon na sɛɛsɛ,
‘Durɛ zukte ku nɛnɛng?’
27 Na sɛɛsɛ ꞉bariyɔ,
‘Goonu wa kowa na inɛsɛa ꞉shɔgɔnu ari ke ngaya kunɛ shɛɛ,
ahi konnɔ ngani kusɛwoye.
Na aynde zugo durɛye.’
28 Na nɔng dɛbu na ɔr toye ngani ngakɔyo.
Na shigu ꞉shɔgɔnɛ na mɔya na koo tolohɛsɛ.
29 Na tamaru na sɛɛsɛ shɔgɔnɛ,
‘Kalde dhɔnɛ ngani kiranenyo.
Eriginya bere kinginye kemesinɛn hɔlɔng huna bariuny.
Na anye mɛnde chinyi ngani inogonyo na ko bɛkanyaa ganyu kusoyo.
30 Nɔng hunde eriya nunu bere ajɛyi aha na usuranɛa ko lolo kunde,
inye nisɛn ari.’