Lɔga Gulsaa Ghurghura
16
1 Na Yesus sɛɛsɛ zuga kɔbhɛa nɔng,
"Bere lɔma hira bo aha mɛra.
Na lɔma hira ku gulsa ibho ahaa gɛnyɛ.
Na koo shigu bhee se ke ngahirronu usuran aha.
2 Na koo eliu ꞉ɛna na ghinu na sɛɛsɛ,
‘Lɔkte yokogonyɛ ꞉zuguye a lɔkte ku nɛnɛng?
Any ahaa ganyu lɔmi.
Dha ɛdɛyiyɔ.
Zinggo garayɛ,
kuchugenyɔ.’
3 Na gulsa seu,
‘Na ngakalda kɔgɔ ori hunde zinggoa ganyu garraye?
Anye nɔng kɔha kimagiyɔ.
Na hunde kogolnɛnde,
amɛany ꞉liya.
4 Ngazinggoya hunde garraye,
damite ale hinɛanyɛ ꞉zuguye nɔng kagga ꞉anyo.
Ga!'
5 Na eleo zuga lɔmɛa ewona komoruny na sɛɛsɛ,
‘Inye ahaa komoruny lɔmi isɔng?’
6 ‘Kɔlɔmi mal junya 100.’
Na sɛɛsɛ ꞉gulsaɔ,
‘No!
Dadaba lɔma ewoa nunu a nganda.
Tɛa bay na tɔgɔdhɛsɛ ge ku 50 na gena kagarayɛ.’
7 Na ghinu kona sɛgɛn,
‘Na inye ahaa komoruny lɔmi isɔng?’
‘Kɔlɔmi liwa ghununya 50.’
‘No!
Dadaba lɔma ewoa nunu a nganda.
Tɔgɔdhɛsɛ ge ku 40 na gena kagarayɛ.’
8 Na shigu ꞉ɛna na iwachiu ngaghurghurtimoa ngagulsaya ku butogite.
Yɔk ngalɔkta mesɛ ꞉zuga Tumu ngayɛbhɛyayo kɛngɔye ko ga ngazukta yɛbhɛ Tumuye ngahɛto.
Yɔk a ghurghuri.
9 Nɔng ngabirinyaa banyde dirr ngaɛlo.
Ali garsɛyɔ.
Ayɛ zugo na kɛtɛhɛndunggɔ.
Na ale wurtɔ ɔra iho dhul kɛtɛhɛnunggo. z
10 Inde kajɛ ahite chinyi na me shɛɛye,
hunde kayɛ ge mɛri,
me shɛɛ.
Kɛ̀yɛbhtɔ.
Inde kajɛ ahite chinyi na usurande,
hunde kayɛ ge mɛri,
usurandɔ.
Ngakɛyɛbho.
11 Na nɔng igge ngaahaya ɛl bayte hunde usuranoye,
ga ku dhere ale ajung nɔni?
12 Na hunde ga zugony shɛɛ ngamesoye,
ale ge guye oro ori?
13 Hiri kalde dhɔnɛ komortɛn ramman ngahino.
Kɛngana dhɔnɛ na kona dhɔtɔ.
a Hira yelo Tumu,
birinya ngayelo."
14 Na zuga Bhɛrɛsi yelɛa birinya shigi ngalɔkta na chɛktɛ Yesus.
15 Na sɛɛsɛ ꞉Yesusi,
"Ige senno messo shɛɛ na zugo bhɛa nu kese anno challi.
Hinisia gu nɔng Tumu gayɔ.
Ahite bhɛa zugony chalde nɔng bhɛa Tumu a ridhing hung.
16 Nɔng damiya bere Muse ko lɔga bere zuga yogɛsɛnɛa zugo lɔga Tumu na kɔdhɛsɛnɛa dadab anna bere kàmatɛsɛa na kàdaktɛa bhɛa Yohanisa churo zugo.
Nɔng kamannaa Tumu ngani chaga ibhɛa zugo na madhɛa,
kɔdhdhanɛ kolea Yohanisi na yɔk hinɛ goore na chɔɔ dhadhaktɛy ganggu.b
17 Nɔng damiya bere Muse hunde ngagarsi na kagar ba ko Tumu,
a bhaseni.
18 Inde dhɔ tɛri na gamana konde a kɔdhɔgay.
Ko nɔng inde gam ngatɛritonuye a kɔdhɔgay."
Lɔga Hira Lɔma Aha Ko Ga Alazari
19 Na Yesus ɛlɛhɛnɛsɛ lɔk gena na sɛɛsɛ,
"Bere lɔma hira bo aha mɛra dhɛynɛna maluko ruminyaa bo dɛldɛla cna aminɛna ke na bo hini hɔla.
20 Na hira ku bhoyogi rɛ amɛa ꞉ngɔdɔrɛnu kènno Alazar ungu rataa ngahirronu.
21 Na chirkan uruta gɛnyɛ.
Na rɔsi hony na ɔgɔchɛ ngɔdɔrɛna.
22 Na kale kona Alazar ere.
Na hunaa rɛsaye,
zuga kèko hoya na ayɛsɛ Awuram tumɔ.
Na hira lɔma aha ko nɔng ere na kojigiyɛ.
23 Na hunaa iho bhɛa chɔllaunyde,
dharɛsɛ Awuram ko Alazar ko rɛna hunde ɛl kariye.
24 Na tolohɛsɛ Awuram na sɛɛsɛ,
‘Baba Awuram,
chirbhiseonyo!
Na sɛɛsɛ Alazar na kɔgɔdha ma halagiyɔ na kɔchɔchɔganɛany kayɔ.
Wa kuwasɛu bhiya gogiye toye.’
25 Na nɔng Awuram sɛɛsɛ,
‘Hoya nanuye,
ga kadha lɔga bere inye dhɛynɛnɛy bay na Alazar uwasinɛnɛa.
Mɛya inye sɛrɛ uwasa bere nɛnɛ,
na nɔng kɛsɛrɛ dhɛynɛna bere hɛta ko na nunu ngaya.
26 Na chɔɔ bhee kasanɛiny inye ninggɛ.
Ganggu lɔ bhɛa bhala kɛngiy na igge ngahonyo.
Agge ngakɛhɛowo.’
27 Na sɛɛsɛ Awuram,
‘Baba Awuram,
hunde a ngangaye,
any kògoliny Alazar na ek ɔra baba
28 na koyogɛsɛ goshonginyaa ganyu bare kɔdhɔyi ku hayna.
Ko yɔk ngakohoya na kɔchɔlayɛ hunde nande.’
29 Na sɛɛsɛ ꞉Awurami,
‘Nɔng damiya Muse ko lɔga bere zuga yogɛsɛnɛa zugo lɔga Tumu sabɔ ɛlɛ.
Àny kishigi yɔk.’
30 Na hira gina sɛɛsɛ Awuram,
‘Baba Awuram,
nganga ngayo.
Hunde kok hira bansana rɛsɛyɔ na koyogɛsɛ lɔgɔ,
ungusɛnɛ na ujukɛ lɔga gɛrsa.’
31 Na Awuram sɛɛsɛ,
‘Hunde damiya Muse ko lɔga bere zuga yogɛsɛnɛa zugo lɔga Tumu sabɔ ngashikɛwoye,
ko hunde hir kona kabana rɛsɛyɔ na kogo,
ngashikɛwochi.'"