1 Ngalɔkta kɔgɔdhan anyo Bhaulosi hira ibhananyɛa Tumu ko hoynɛ Yesus Kiristosi na keknyɛsɛ Yesus Kirirstos. Nɔng gaoyɔ Tumu anna bere ibayseiy agge, Yesus nɔng a nganda kere dhunggurɔ na ale wokonoye.2 Na kɔgɔdhaginy inye Timotiyos eriya nanu kiritoninyi yɛbhayɔ. Na kogologiny baba na Tumu ko komoruya na Yesus Kiristos na kishirbhiseiny, na kɔdhɔtaginy shaldina iho dhul ko yelaa ngauturonoo.3 Na damiya bere kɔgɔyɛy Mɛkdoniyagiye na kimadhagaynyi lɔgɔ, mɛa te Ebhesonɔ ngonu na ibay ngazuktonu na zugo lɔkte hologun ningge dirr ngamadhe.4 Na maya inye ibay yɔk na kɔdhɔyɔ ngaya uwasɛ kolea nɛ ngalɔkta hologun ninge bere uturonɛ bɛrgua kokonginya gɛye. Yɔk ngalɔkta ku ngangaye honynyɛ ɛkɛnyan, bhɛɛ kɔjɔnɛ lɔkte challi na kemesɛ lɔga Tumu challa na kɛyɛbhayɔ ningge.5 Na bhee kajɛyny ngalɔkta na keni madhɛ zugoye, keni kɛtɛhɛnɛ lɔga challa, ko kemesigi lɔga hinno Tumu sɔng, na kɛyɛbhɛ lɔga ku dhere. Nɔng yɛbhaa ku dhere kɔjanɛ yela.6 Na yɔk zukte ku dhɔnɛ dhɔnɛ dha bɔɔ kɛngga rɛhi ngalɔkta ku dhereye, na ago gɔra ngaɛkɛnyanda hologun ninggɛye.7 Yɔk bhee mesɛ ngangaye, a ngaya hinnɛ bhɛa seno kamatɛ zugo lɔga kerunyde. Na kako hunde kete nganga, yɔk lɔkte yokkɛye ko gee yɛbhɛ na senɛ a dhereye kumulɔng imagɛyɔ.8 Nɔng hunde zugo kɛbhɛgɛ ker na kemesɛy damiya bere hinɛsɛna Tumu na ajɛa chɛɛ, anda hunde achliye kaggaoyɔ.9 Ker nɔng zuga ɛlla hurr nganikemesɛsɛo, kemesɛsɛn zuga ɛdɛyɛa ba ko ga kɔdhɛa zugo ko ga Tumu ngaɛngɛrsɛayo kɛyɛa na mesɛa lɔga gɛrsa ko ga kɔdhɛa shoynygɛ ko jugɛ. Ko ga Tumu diram ngaajɛayo na lɔga hino nɛa ngamesɛayo,10 ko ga mesɛa lolumo ko zuga maya na ungusɛa ko ga maya, ga ngaha na ungusɛa ko ga ngaha, ko zuga talnɛnɛa zugo oo ga talɛa, ga aliyɛa butomo, ko ga bhikɛa lɔga ku butomo ko ga marɛa lɔga ku dhere na madhɛa zugo lɔga ku butomo kumulɔng.11 Nɔng ngamadhaa anna ku dhere ganɛna ko kamanaa chala dhɔngayny na dhugunogonyi Tumua tuhinɛna na ajanyi.12 Na kutuhi Yesus kiristos na bɔɔ irishonyi zinggoa ganyu ke ngaya yɛbhɛany na ajɛany buyn na katagayte.13 Chɔɔ anye bere kani na kɔdhɔmi Tumu na kahangi ko zuga yɛbhɛa nɔng, na ko hunde kete nganga, nɔng anganda chirbhisiony ke ngaya bere nɔng ngani katageo na kɛyɛbhɛoye.14 Na yɔk lɔga kɔjɔana hɔlɔng bhɛa Komoruya na Yesus Kirisosi te mɛri, na kɔjɔyau yela ko yɛbha.15 Na yɔk ngalɔkta sennɛ, "Yesus kirsos ko ba ngaya na kibaysi zuga lɔmɛa ridhing.” agga ku dhere ko ga maya yɛbhɛa zugu kumulɔng. Na bhɛa zuga lɔmɛa ridhing kumulɔng, inde kɛdɛy lɔga gɛrsa gooreye, kani anye.16 Na nɔng ujugu lɔga ganyu na seagany any kagaraye, na anye bhɛa zuga mesɛa lɔga gɛrsa kanɛy sabba nɔng dhɔla hini buyna nɛnɛ na zuggena kataga hunde hini abuye, na chirbhiseonyɔ.17 Na mɛa diram ko tuha tii anye kete na Komoruya kɛnginyana iho kalikali buyna nɛnɛ ngauturonɛayo, na ngakoroo, Amen.18 Na eriya nanu Timotiyose! mɛa anye koyokoginy ngalɔkta damiya bere yokogɛynyi hira yogɛsɛna zugo lɔga Tumu konɔ sabbɔ. Na hunde chigu ngalɔkta chɛɛye, kɔnɛno ko ngazukta mɛzɛɛ butomoye, huna bholisa ɔnɛna bɛrɔ.19 Na inye tɔlɔ bhɛa ɛsɛdhɛy lɔga chala ko yɛbha. Zukte ku dhɔnɛ dhɔnɛ dha bere bhɛa ɛsɛdhɛa lɔga chala garu na yɛbhaa nɛ garu tɛhɛyɛ ko gonggula igariseo ngɔ ma toye.20 Yɔk ngazuktonu ge ku raman a Haymanes ko Iskidiros, yɔk ale kajɛ gidhinga satani na anyde ale gayɛ dhɔtɛ bhɛa marɛa Tumuye.