1 Na hira nyagasa maya madh huna baba nunu, ngawologi, koyɔk ngaya ngani chilanɛ mayte gɔny huna goshonginyany. 2 Na ga nyagasa ngaha madh huna mamaa nunu, ngagiya nganichilanɛ ngase koyɔk gɔny huna ngonuguny.3 Na koyɔk tɛroa dha bere zuga ge erta, dhunggɔ. 4 Na chɔ hund kɔtɔlɔ tɛrte ku bhoyogi na lɔ erroye oo ashaye, any kɛdhɛmisi bhɛa ɛanɛa zuga gɛ ko bhɛa sɛrɛyɛa lɔga bere jugɛyny ko shoynygɛyny na kɛyɛbhɛ Tumu na kemesigi nganga kumulɔng. Ngalɔkta bhoy yɔk bhɛa Tumu achalli.5 Nɔng chɔɔ teriya ku bhoyogi dha bere hiri rɛsa na bhaka bichang, anganda kedhana hini na ogol Tumu bar ko kali na kɛaye. 6 Nɔng tɛriya ku bhoyogi dha bere hiri rɛssa na hinno hini hɔldina ngabaya na ko chɔɔ rɛhɔ hunde kete basi, tana kuloya Tumu nɔng a rɛssi.7 Na tɔrɛ, na yogɛsɛ zugo ngalɔkta sɛgɛn na kabhaga na kɛngɔ ngawologinɛ ninggɛn. 8 Na inde nɔng bhɛnɛna gɛnyɛ oo goore zuga dora nɛnɛ ngakashoye ngangaye nɔng dha kɛnga rɛ bhɛa yɛbhɛa Tumu. Na nɔng ngaya marɛ bhɛa yɛbhɛa Tumuye, jorono hira chɔɔ Tumu ngani kɛyɛbhao. 9-10 Na hunde tɛri oynya zugo sizzi ngani kidhiyeo na hiri rɛse ayɛ dadaba tɛroa ku bhoyoga zugo rɛsɛa ngakɔgɔdhɛsɛni. Nɔng maya anna dha bere gamma hira dhɔnɛnna, maya anna dha bere meso ngalɔkta, irogito ɛroa gɛnyɛ chɛɛ, na lamana kɔmɔn, na onyo zuga kashɛa Tumu jagarɛ, na ɛana zuga chɔllanɛna, ko na maa titi kaggaa lɔga challa kumulɔng.11 Tɛroa ngani shisho ku bhoyoga dha bere zuga gɛ erta dadaba tɛroa ku bhoyoga ngakɔdho, ke ngaya ale dhɔyɛ Yesus na hinɛ bhɛa senno kagambe zuggene goore sɛgɛnde.12 Yɔk chɔɔ hunde lɔggena kɛrtiyaa, ale kujukana lɔga gɛ gɛrsa mesɛ ke ngya kɛnganɛ lɔga bere bhiigɛsɛnɛa Kirisose.13 Na oronɛ gɔnggamo, na woɛ chɔɔ doriyoa zugony na kedhɛ lalugɛ, na agga jalbhanɛa lɔga zugony.14 Na kamadhung, na tɛroa ku bhoyoga ngani shisho dha bere zugo erta kagamma gene, na kuhudhukto erro, na kete ga ibhɛa doriyoa gɛ chɛɛ, na hunde te ngangaye, bhee mɛnɛngi kunɛ na dhɔmɛiy ninggɛ.15 Nɔng bere sabbɔ tɛroa ku bhoyoga margiyɛa mɛnɛngu na dhɔtta bhɛa yɛbhɛa Tumu, na kɔbta mɛnɛngi.16 Na hunde lɔ terrte oo hire yɛbh Tumu na kesea bhakɛ ko tɛroa ku bhoyoga kariye, ngaajɛ kushur dora Tumu any kɛa nɛa hung. Na hunde a ngangaye, nɔng doraa Tumu ɛana gee ku bhoyoga dhoogoni dha bere zuga gɛ rɛsɛ na bhɛnɛn ninggɛ dhulde.17 Na Gulsashina doraa Tumu hunde mesɛ zinggo chɛɛye, maya kɔtɔrɛ na kagadhi goore ke ngaya yogɛsɛnɛ zugo kamanaa challa ko nagaya ɛdhɛmisɛɛye.18 Nɔng dadaba lɔga Tumu anganda se, "Ole hunde kɔ shurote, tugɔ ngashibi," ko "Nɔng hira messo zinggo maya kagadhiyɔ.”19 Na hunde lɔgena bansanɛ bhɛa gulsashina doraa Tumu na zukte ku raman oo sizzi ngani koyoktooye, ngaujukani.20 Na hunde lɔ gee mesɛ lɔga gɛrsaye, dhugunu bhɛa bo zugo mɛra na kargi gene na nganga ngamessɛ.21 Na koyokoginy ngalɔkta muma Tumu ko Yesus kirisosi ko bhɛa zuga eko Tumu na ngalɔkta kajinyde kumulɔng ɔggɛ na me chɛɛ na ba ngalɛli, bhɛnɛn ngabɛri. Zugo kumulɔng gɔny ke dhɔnɛ. 22 Na hundɛ sɛni tadhɛ kona sɛnɔ na aynɛ buynde ngangosumi, bhɛk rɛa nunu na ko gena lɔga gɛrsa ngatɔrnɛno.23 Na hundɛ ilagasi kɛngɔyɛ ir shutaya woynuny bheshinyi na kilaliny kɛngɔ, ma sɔngng ngamay.24 Nɔng ridhingge zukte mushugi i tok, hunde chɔɔ lɔga gɛ ngani kegedhigitoye, na yɔk ga zukgenuny ngakorro dhull kobhe ale Tumu kunɛ na kedhɛ lɔga gɛ. 25 Yɔk lɔga challa kumulɔng ɛl tok ngadamita. Na yɔk gee el dariye ngadɔyneo dhul ale dhuguninyayayɔ.