Ebaruwa eya
AWAIBRANIA
Kristo ari omukaate okukira enyankoi
1
1 Mu amiire amakulu agaawita, Katonda yagamba-gamba ni waaguukwa wiifu kangi kandi mu engira enyingi ni kuwitra ku *awagambi waae. 2 Ni mu amiire aga entuuko gano, Katonda amiire okugamba-gamba ni ifwe ni kuwitra ku Omuzia waae, owa yalowola okuteera ewintu wiona mu amakono kandi owa ni kuwitako, yaluka igulu ne ekialo alala ni wiona ewirimo. 3 Omuzia owa Katonda ono, nio owunene owua Katonda wumurika ni wuemako kandi nie ekilago ekia Katonda ndiki-ndiki. Kandi ni iye oambiriire alala ewintu wiona ewiri ku igulu ni ku ekialo, na amang'ana gaae agari na amaani.
No Omuzia yamala okuesana engira eya awantu wakaoziziwua amawi, yaikala nyakukono okusaaza okwa Katonda Omukaate ku igulu. 4 Kutio yawa omukaate okukira *enyankoi woona mala kiomo eriina eria yaeewua riona riri ikaate okukira amiina aga enyankoi woona.
5 Kusi ne enyankoi ki eya Katonda yalagako mbwe,
“Ori Omuzia wange,
reero mbeere Swao” ?
Namba mbwe,
“Nyiza okuwa Swae,
kandi oona aaza okuwa Omuzia wange” ?
6 Kandi ni Katonda areeta Omuzia waae owa oluweri ku ekialo, yawoola otino,
“Reka enyankoi awa Katonda woona wamuikirre wamusawe.”
7 Omwene na agamba-gamba ku enyankoi waae, awoola otino,
“Agera enyankoi waae wawa ki omuyaga
kandi *awatumwa waae wawa ki endimi ezia omurro.”
8 Ni na agamba-gamba ku Omuzia waae awoola otino,
“Entewe eya owuami wuao, iwue Katonda, eeza okuweerao amiire goona,
kandi ooza okangatra awantu awa mu owuami wuao no owuigolovu.
9 Iwue omiire okugonzia owuigolovu, na amawi oregere,
kutio, inze Katonda waao miire okukuta angulu okukira awiina waao
ku *okukuwaka amavuta aga ekisangaalo.”
10 Lwona alaga Omuzia waae otino,
“Oo Omwami, mu owutanikro, ni iwue owaomboka owulusa owua ekialo,
kandi igulu riri emirimo egia amakono gaao.
11 Igulu ne ekialo wiiza okuteeka, kandi wiiza okukiriiya ki enguwo,
ni iwue orio amiire goona.
12 Ooza okuwizinga alala ki ekanzu,
kandi wiiza okugaluka ki enguwo.
Ni iwue orio-wuri otio, ngorigaluka,
kandi emiigo giao giwula ne entuuko.”
13 Ne enyankoi ki owa Katonda yalagako mbwe,
“Ikala nyakukono kwange okusaaza
nawuno ntoole awazigu waao
nte ansi ku amagulu gaao otaze?”
14 Kane enyankoi niki? Ngawari mala emioyo egitumrwe okukorra awantu awaaza okutuukra owuinunuzi?