Ɛwɛn Nywɛ Yesutɔn xena
Lwiki
Wlan
Oxotaɖiɖe
Mawu we ɛmɛ xeni wlan wema xe, nɔ nyi Lwiki, e bo nyi doto (Kol 4:14), bo wa odan kpodo ɛmɛ dindɔn Pɔlu (2 Tim 4:11; Fil 1:24.) Emyɔ ke wɛ wlan Odanwiwa we wema. Emyɔ ŋutɔ ɔn nyi Jwifu, e ko kpɔn onu xeni jɔ laye kpodo ŋukunsin kpo, mi wɛ dɔn, xena e kan odo se na onu xeye ni jɔ laye nywɛɖe, e wlan wema la ɖodan ɛmɛ ɖaxo Tewofili. Tewofili la can ko nyi Jwifu. Le Ɛwɛn Nywɛ we wema etɔn mɛ, e ɖe Yesu Klisu sɔ xlɛ ɖi Ɛgbɛtɔ we Ovi xeni nyi ɛgbɛtɔ bo mɔ nyi Mawu, e bo mɔ ɖe xlɛ tun e bo sɔn xɔlu Davidi we okunkan mɛ.
Le wema la mɛ, Lwiki lɔ oxo sɔn lena ye ji Yesu ɖo, lena e hwɛn ɖo, lena e bɛ odan etɔn ɖo, onukpaca-ɛmɛ kpodo ŋudandonu xeye na e wasi ye, lena e nɔ kpɔn dɔŋuɖunu na ɛmɛye ɖo, le ota ji, adɔnnɔye, ɛmɛ xeye ni le vivɛsise mɛ ye, ɛmɛ xeye na ɛmɛye nɔ tafu nɔ ye kpodo ɛmɛ xeye na ayi gbado na ye. Le wema xe la mɛ, Lwiki wlan olo xeye na Yesu do ye we susu. Olo dido mɛ laye wɛ Yesu zan bo do kplan onu do Mawu we Xɔluɖuɖu la wu. Ɖeye wɛ nyi, oho xeni bu na ye va yi kpɔn-ɛ (15:8-10 ) kpodo hwanjavi xeni jɛ ogbe bo va gbɔn (15:11-32). Le wema la we vivɔnu, Lwiki lɔ oxo sɔn lena ye wle Yesu ɖo, bo do aya ni-i, bo hu-i, onyihinhɔn atɔngɔ gbe etɔn, e bo fɔn sɔn oku. E mɛ godo, e bo sɔn yi jiŋukunsin. Ɛwɛn Nywɛ we wema xena Lwiki wlan la, ɖo akpa susu xeye ni nyi onu ɖokpo ŋumyɔye kpodo Ɛwɛn Nywɛ we wema xeye na Matye kpodo Maki wlan ye.
Lena wema la ma ɖo xɛn:
1-2. Lwiki lɔ oxo do Jan Mawu we ɛsin lɛ na ɛmɛtɔ kpodo Yesu we jiji wu.
3:1-4:13. E lɔ oxo do Jan we odan wu kpodo lena Jan la lɛ Mawu we ɛsin na Yesu ɖo wu.
4:14-9:50. E lɔ oxo do Yesu we ɛgbɛ xena e zan le Galile, lena e lɔ Mawu we oxo ɖo kpodo adɔn susu xeye na e gɔ na ɛmɛye.
9:51-19:27. E lɔ oxo do lena Yesu zɔn omɔ sɔn Galile gbɔɔn bo do va yi Jeluzalɛmu ɖo wu.
19:28-21:38. E lɔ oxo do odan xeye na Yesu wasi le Jeluzalɛmu wu.
22-23. E lɔ oxo do Yesu we ayaɖuɖu kpodo oku wu.
24. E lɔ oxo do Yesu we finfɔn sɔn oku kpodo lena e va sɔn yi jiŋukunsin ɖo wu.