Ɛwɛn Nywɛ Yesutɔn xena
Jan
Wlan
Oxotaɖiɖe
Ɛwɛn Nywɛ wema xe, Jan wɛ wlan-ɛ, e bo nyi ɛmɛ ɖokpo le Yesu we ɛmɛ dindɔnye mɛ (Mat 10:2). E wlan-ɛ na xɔsetɔ xeye ni le Sili kpo Azi we kansinmɛ ye. Wema la lɔ odan xena Yesu va wasi le nyixɔ la ji, onu xena e kplan ɛmɛye, oku etɔn kpodo finfɔn sɔn oku etɔn. Onu xeni dɔn na e do wlan wema la wɛ nyi tun, e jlo na ɖe xlɛ tun Yesu bɛ bo nyi Klisu la, bo nyi Mawu we ovi, ɛmɛye ba do kan do e ji, a bo do kpɔn Ɛgbɛ Mavɔmavɔ (20:31). Mi wɛ dɔn, bɛ sɔn oxotaɖiɖe etɔn mɛ, e ɖe ɛmɛ xena Yesu nyi sɔ xlɛ. E lɔ tun emyɔ bɛ bo nyi «Oxo la» xeni bo o le sɔn ɛgbɛ la we titɔ e ji gbɔɔn (1:1), bo va trɔ zun ɛgbɛtɔ, bo va nɔ ɛgbɛtɔye mɛ (1:14).
Le omɔ susu nu, wema xe la gbɔn ovo na Ɛwɛn Nywɛ we wema xeye na Matye, Maki kpodo Lwiki wlan ye. Le winwlan etɔn mɛ, Jan mɔ ɖe xlɛ tun Ɛgbɛ Mavɔmavɔ bo nyi ɛmɛ xeye ni kan do Yesu Klisu Mawu we ovi la ji ye tɔn. Mɔ bɔ do e wu Jan wlan josi ɖeye xena Yesu ɖe sɔ xlɛ dogbɔn ŋudandonu wiwasi mɛ, ye ko le winwlan le Ɛwɛn Nywɛ gbokpweye mɛ. Kpɔndewu yetɔn wɛ nyi ɛsin xena e sɔ do trɔ zun vɛn le Kana (2:1-12), dahwe xena ye ji ŋuvanɔ, Yesu bo hun ŋukunsin ni-i (9:1-7), kpodo Lazaa xena e fɔn sɔn oku (11:1-44).
Lena wema la ma ɖo xɛn: Jan lɔ lena Oxo la nɔ na kinklɛn kpo ɛgbɛ ɛmɛ ɖo.
1:19-34. E lɔ oxo xeye na Jan Mawu we ɛsin lɛ na ɛmɛtɔ, lɔ ye.
1:35-51. E lɔ lena Yesu can onukplanvi etɔn tantyantɔnye ɖo.
2-12. E lɔ josi acowe xeye na Yesu ɖe xlɛ dogbɔn ŋudandonu wiwasi mɛ ye.
13-17. E lɔ onu xena Yesu mɔ kplan onukplanvi etɔnye.
18-19. E lɔ lena ye wle Yesu ɖo kpodo lena e ku ɖo.
20-21. E lɔ lena Yesu ze do ŋumɛ na onukplanvi etɔnye ɖo.