Yesu do olo do onujikpɔntɔ ogbejimanɔtɔ xeni bizo wu
16
1 Mi wɛ Yesu lɔ na onukplanvi etɔnye tun mɔ: «Dahwe dɔkunnɔ ɖe le, bo ɖo onujikpɔntɔ ɖe. Ɛmɛye bo va jɛ ɛhwɛ ni-i tun onujikpɔntɔ la bo zan onu etɔnye nɔ ɖejan-ɖejan. 2 E bo yɔ-ɛ, bo lɔ ni-i tun mɔ: “Oxo ŋukɔ lɛ nyi e mɛ na ko se do wu we nɔ? Va jo kɔnŋuta na-a do lena o zan onu laye ɖo, ɖo, o ɔn mɔ kpewu na nyi onujikpɔntɔ tɛye.” 3 Onujikpɔntɔ la bo lɔ le eɖe mɛ tun mɔ: “Xwetɔ tɛye ɔn mɔ jlo tun ma nɔ onu etɔnye nu, naɖe ko na hɛn ɖo fifi? Ogle dan wɛ ko na waa? Ko ɔn ɖo hɔnhlɔn etɔn. Onu byɔɖutɔ wɛ ko na trɔ zun? Ŋunya na wa-a. 4 E nyɔ, ko nyɔ onu xena ko na wa, e mɛ, na xwetɔ tɛye nya-a le odan mɛ, ɛmɛ ɖeye ba le, a bo yi-u do oxwe yetɔnye gbe.” 5 Mi wɛ, e yɔ ɛmɛ xeye ni ɖu axɔ do xwetɔ etɔn la, ɖe kplɔ ɖe do, bo lɔ na ɛmɛ tantyantɔn tun mɔ: “Axɔ nɛmu lɛ o ɖu do xwetɔ tɛye?” 6 Dahwe la bo ɖo e wu ni-i tun mɔ: “Ami kplinkpana kanweko wɛ ko ɖu do-e.” Onujikpɔntɔ la bo lɔ ni-i tun mɔ: “Yi wema tɔwe, xlɔn onyi bleŋu, a bo wlan kplinkpan kanɖewo.” 7 E bo mɔ lɔ na ɛmɛ bu tun mɔ: “Myɔ ɖe, axɔ nɛmu lɛ o ɖu?” Dahwe xe la bo ɖo e wu ni-i tun mɔ: “Ɛjinukun ati kanweko wɛ ko ɖu.” E bo lɔ ni-i tun mɔ: “Yi wema tɔwe, a bo wlan ati kanwe.” 8 Xwetɔ la bo kanfu onujikpɔntɔ ogbejimanɔtɔ la do lena e ɖe bibi we afɔ ɖo. Ɖo, ɛgbɛ xe mɛ we vikpɛye, ye nɔ bi le onuwiwa yetɔnye mɛ do kpan ŋukɔn yenɔniɔye, sɔ hugan kinklɛn mɛ vikpɛye.»Yesu lɔ oxo sɔn ogbeji ninɔ le dɔkunnu zinzan mɔ nu
9 Yesu bo tun mɔ: «Mi wɛ, mɔ ko lɔ na mi nɔ tun mɔ, mi zan dɔkunnu xeye na mi ɖo dogbɔn ɛmɛ biblɛɖu mɛ ye, a do ɖo hadweye, e mɛ, na dɔkunnu mɛ laye va vɔ, Mawu bo na yi mi do nɔtyɔn xeni na nɔ ote gbɔɔn do yi mavɔmavɔ mɛ. 10 Ɛmɛ xeni nɔ nɔ ogbeji le onuvi mɛ, e mɔ nɔ nɔ ogbeji le onu ɖaxo mɛ. Mɔsinha ke, ɛmɛ xeni nyi ɛmɛ blɛɖutɔ le onuvi mɛ, e mɔ nɔ blɛ ɛmɛ ɖu le onu ɖaxo mɛ. 11 E nyi tun mɔ, mi ɔn kpewu nɔ ogbeji le dɔkunnu xena mi ɖo dogbɔn ɛmɛ biblɛɖu mɛ, onu lɛ na ɖe oji do mia wu a do sɔ dɔkun jɔ dɔkun sɔ na mi? 12 Na mi ɔn kpewu nɔ ogbeji le ɛmɛ bu we onuye mɛ, onu lɛ na sɔ onu xena ye sɔ ɖo onyi na mi, a sɔ na mi?
13 Ɛmɛ ti ɔn kpewu na nyi odansɔvi na xwetɔ owe o. Ɖo, e na gbɛ owan na ɛmɛ ɖokpo, a bo yi owan na ɛmɛ owegɔ la, alo e na tɛ do ɛmɛ ɖokpo wu, a bo ɖe eɖe ɖo ovo le ɛmɛ owegɔ la wu. Mi ɔn kpewu na sɛn Mawu nɔ, a bo mɔ sɛn oho can nɔ.»
Yesu kplan onu ɛmɛye do onu hamɛ-hamɛye wu
14 Falizitɔye, bo se oxo mɛ laye nɔ, bo lo ko Yesu nɔ, ɖo, ye yi owan na oho. 15 E bo lɔ na ye tun mɔ: «Miye, mi nɔ kpɔn miaɖe ɖi ɛmɛ jijwɛye ha le ɛgbɛtɔye we ŋukɔn, vɔ, Mawu nyɔ oji miatɔnye; onu xena ɛmɛye nɔ ɖo sisi na, wɛ nɔ nyi onu xyɔ ɛwu le ŋumɛ na Mawu.
16 Gbɔxwe na Jan xeni nɔ lɛ Mawu we ɛsin na ɛmɛ do va va, Mɔyizi we Osɛn la kpodo winwlan oxolɔɖonyitɔyetɔn wɛ ye nɔ kplan ɛmɛye nɔ. Vɔ, bɛ sɔn Jan la ji, ye nɔ jla Mawu we Xɔluɖuɖu la we Ɛwɛn Nywɛ nɔ, ɛmɛ ɖekpekpe bo nɔ jɛ gbagba nɔ taŋu, a do ɖyɛ e mɛ. 17 E na fa na jiŋukunsin kpodo nyixɔ kpo na do ɖo vivɔnu sɔ hugan tun wemakun ɖokpo tete a tutu le Osɛn la mɛ.
18 Ɛmɛ ɖekpekpe xeni gbɛ osyɛ, bo va yi ɖe nyɔnu bu, e do afɔ ogbe. Mɔsinha ke, na ŋusunglo ɖe va yi ɖe nyɔnu xena oswa gbɛ, e do afɔ ogbe.»
Yesu do olo do dɔkunnɔ ɖe kpodo Lazaa wu
19 «Dahwe dɔkunnɔ ɖe le, bo nɔ do awu nywɛ-nywɛ xeye ni vɛ oho taŋu, onyihinhɔngbe-onyihinhɔngbe, e nɔ le jijwɛ mɛ, a bo ɖu agɔ nɔ. 20 Ayanɔ ɖe, xena ye nɔ yɔ tun Lazaa, bo hlɔn onyi le agbo mɔnu ni-i. Abi kɛɖɛ bo le goto ni-i. 21 E nɔ jlo-e tun ni a can onuɖukwin xeni nɔ flɛ le dɔkunnɔ la we tavo nu, a bo ɖu. Vɔ, hugan mɔsinha, ovunye wɛ nɔ va ɖiɖɔ abi etɔnye. 22 Gbeɖokpo ayanɔ la ku, Mawu we ɛwɛndotɔye bo kɔ-ɛ sɔ va yi ɖo aha na Ablaxamu. Dɔkunnɔ la can va ku, ye bo ɖi-i. 23 Le okuto mɛ, xena e lo se vivɛ nɔ taŋu, e kɔ ŋukunsin, bo kpɔn Ablaxamu daan, Lazaa bo le aha ni-i. 24 E bo do axwa, bo tun mɔ: “Didaye Ablaxamu, kpɔn dɔŋuɖunu na-a, dɔn Lazaa ɖodan ni a do alɔvi ɛsin mɛ, a bo ja do ɛɖɛ ji na-a, a do fa kɔmyɔ na-a. Ɖo, ko se ɛwu vyɔ nɔ le ozo xe mɛ nɔ diin.” 25 Ablaxamu bo ɖo e wu tun mɔ: “Ovi tɛye, ɖoŋudo e wu tun mɔ, o yi nyɔna tɔweye le ɛgbɛ tɔwe hwenu, vɔ, Lazaa emyɔ, bo ɖu aya. Fifi, e kpɔn akɔnfifa nɔ le bwɛ, myɔ bo le vivɛsise mɛ. 26 Mɔ bɔ do e mɛ wu, ogun ɖaxo ɖe le miye kpodo míye we dodomɛ, e mɛ, ɛmɛ ti ɔn kpewu na lɛ le mía kɔn a do va yi mia de o, mɔsinha ke, ɛmɛ ti ko na mɔ kpewu sɔn mia kɔn a do va mía de.” 27 Dɔkunnɔ la bo lɔ tun mɔ: “Ko ɖe kuku, bo dɔn Lazaa ɖodan didaye we oxwegbe, 28 ɖo, ko ɖo nɔvi ŋusunglo atun, ni va yi xo okpa na ye, na yee can ko mɔ do va tɔn le vivɛsise we nɔtyɔn xe nɔ.” 29 Ablaxamu bo ɖo e wu tun mɔ: “Ye ɖo Mɔyizi we Osɛn la kpodo winwlan oxolɔɖonyitɔyetɔn, ye ɖo na zɔn do ye ji!” 30 Dɔkunnɔ la bo tun mɔ: “O o, didaye Ablaxamu, na ɛmɛ ɖe sɔn okutomɛ bo va yi lɔ na ye, ye na ɖɔli jijɔ.” 31 Vɔ, Ablaxamu bo lɔ tun mɔ: “Na ye ɔn zɔn do Mɔyizi we Osɛn la kpodo winwlan oxolɔɖonyitɔyetɔn ji, na ɛmɛ ɖe mɔ do fɔn sɔn okutomɛ bo va yi lɔ na ye can, ye ɔn kan do e ji nɔ.”»