Pɔlu lɔ oxo sɔn azan kpotwiye wu
3
1 Nyɔ-ɛ tun le ɛgbɛ la we vivɔnu we azan kpotwiye gbe, oganxixo sinsyɛnxuye na va va. 2 Ɖo, ɛgbɛtɔye na yi owan na ye ŋutɔye ɖoɖyo, a bo yi owan na oho, a bo nɔ kɔ yeɖe do yi oji, ye na nɔ nyi go, a bo nɔ zun Mawu nɔ, a bo nɔ fɔn ogu do yetɔye wu, a bo nɔ do alɔgodo we ɛkpɛ na ɛmɛ, ye ko na nɔ ɖo sisi na Mawu, 3 ye ɔn ɖo owan yiyi na ɛmɛ nɔ, ye ko kpɔn dɔŋuɖunu na ɛmɛ nɔ, a bo nɔ lɔ ɛmɛ we oxo nɔ, ye ko ɖu yeɖe ji nɔ, a bo yi owan na vivɛsise dido na ɛmɛ, a bo nyi kɛntɔ na onunywɛwatɔye, 4 ye na nɔ sa yenɔniɔye ɖu, a bo nyi ɛmɛ xeye ni ɔn nɔ bu ota mɛ gbɔxwe a wa onu ye, ye ba gɔ kpodo gonyinyi kpo, a bo yi owan na ɛgbɛ ɖuɖu sɔ hugan Mawu. 5 Ye na nɔ ɖe Mawu sinsɛn sɔ xlɛ le ŋuta, vɔ a bo gbɛ hɔnhlɔn xeni le Mawu sinsɛn adodwe la mɛ. Dɔn ɖiwe tɛ le ɛmɛ mɛye wu. 6 Ɖeye le ye mɛ, bo nɔ do ɛyɛ ɛmɛye a do ɖyɛ oxweye gbe, a bo zin nyɔnusi hɔnhlɔn maɖonɔye ji, xeye ni bɛ onu nyanylaye sɔ kpla ye, ojlo ɖekpekpe ba nɔ dɔn ye nɔ ye, 7 ye nɔ kan nɔ tɛgbɛ tun ye a kplan onu, vɔ, ye ɔn nɔ kpewu nyɔ oxojɔxo la gbeɖe. 8 Ɖi lena Janɛsi kpodo Janblɛsia site kpan ŋukɔn Mɔyizi ɖo saa ha, mɔsinha wɛ ɛmɛ mɛye can nɔ site kpan ŋukɔn oxojɔxo la mɛ. Ɛmɛ mɛye, ayixa yetɔnye bu, xɔse yetɔn ko nɔ ote le ŋukɔn na didokpɔn. 9 Vɔ, ye ɔn mɔ kpewu yi ŋukɔn nɔ, ɖo oha jijɛ yetɔn na jɛ agbaŋugba le ŋumɛ na ɛmɛ zɛtɛye, ɖi lena Janɛsi kpodo Janblɛsi yetɔnye nyi ɖo ha.Pɔlu ɖe aɖaŋu ɖeye na Timɔte
10 Vɔ myɔ, o kpɔn-ɔ nywɛɖe, bo se onukpinkplan tɛye, bo kpɔn afɔ ɖiɖe tɛye, tito tɛyee, xɔse tɛye, agbɔxo dido tɛye, owan yiyi tɛye, vivɛnu dido tɛye. 11 O bo mɔ kpɔn ofun xeye na ye ɖe na-a kpodo aya xeye na ko ɖu le Antyɔcu, Ikoniɔmu kpodo Lisri. Ofun ɖiɖe na ɛmɛ ŋukɔ mɛ lɛ ko ɔn gbɔn? Ganke Xwetɔ la bo hwlɛn-ɔ gan le zɛtɛye mɛ seŋu. 12 Ɛɛn, ɛmɛ zɛtɛye xeni jlo na nɔ ogbeji na Mawu le Klisu Yesu mɛ, ye na ɖe ofun na ye. 13 Vɔ, ɛmɛ danuwatɔye kpodo ɛmɛ blɛɖutɔye, na yi ŋukɔn le onu nyanyla mɛ nɔ tɛgbɛ, a bo bu ɛmɛye nɔ, ɛmɛ buye ba bu yee can. 14 Vɔ myɔ, tɛ do onukpinkplan xena o yi bo kan do e ji wu, o nyɔ ɛmɛ xe kɔn na o yi-i le. 15 Sɔn vikpɛvi mɛ tɔwe gbɔɔn, o nyɔ Winwlan Kinkwɛn laye; ye na kpewu na we onunyinywɛ, o ba do kpɔn hwlɛngan dogbɔn xɔse ɖiɖo do Klisu Yesu ji. 16 Winwlan Kinkwɛn ɖekpekpe sɔn Mawu kɔn, bo jɛ na zinzan a do kplan onu ɛmɛye, a do na na ɛmɛye a nyɔ-ɛ tun onu nyanyla bɛ ye bo wasi, a do jɔ okɔ na ɛmɛ, a bo do kplan onu ɛmɛ na ɛgbɛ jijwɛ zinzan, 17 na Mawu we ɛmɛ a do le ogbe sisɔ titeŋugbetɔn, a bo do sɔ onu nywɛɖe na odan nywɛ ɖekpekpe wiwasi.