¹ Naa mendadi kini si Isukristu, kinii gesalanen. Sala tawan ginepuˈay ni Isukristu, iin si David, sapuˈ pa dema ni Abraham dengantu.

² Naa mendadi, kinii gesalan ni Isukristu genat dini Abraham sampay dini Adiˈ David. Si Abraham, kaliˈ pegbataˈ, iinig bataˈen, si Isaac. Si Isaac, iinig bataˈen, si Jacob. Si Jacob, iinig bataˈen, si Juda sampay su nga pateden. ³ Si Juda, iinig bataˈen, si Fares mukaˈ si Sara. (Iini ginaˈ nilan, si Tamar.) Si Fares, iinig bataˈen, si Esrom. Si Esrom, iinig bataˈen, si Aram. ⁴ Si Aram, iinig bataˈen, si Aminadab. Si Aminadab, iinig bataˈen, si Naason. Si Naason, iinig bataˈen, si Salmon. ⁵ Si Salmon, iinig bataˈen, si Boos. (Iini ginaˈ ni Boos, si Rahab.) Si Boos, iinig bataˈen, si Obed. (Iini ginaˈ ni Obed, si Ruth.) Si Obed, iinig bataˈen, si Isai. ⁶ Mendadi si Isai, iin pelumig bataˈen, si Adiˈ David.

Naa kini pelumi gesalan ni Isukristu genat dini David sampay di kenguit tug bansa Israel ditug benwa Babilonia. Mendadi, kaliˈ pegbataˈ si David, iin pelum si Salomon. (Iini ginaˈen, su sawa sia ni Urias dengantu.) ⁷ Si Salomon, iinig bataˈen, si Roboam. Si Roboam, iinig bataˈen, si Abias. Si Abias, iinig bataˈen, si Asa. ⁸ Si Asa, iinig bataˈen, si Josafat. Si Josafat, iinig bataˈen, si Joram. Si Joram, iinig bataˈen, si Usias. ⁹ Si Usias, iinig bataˈen, si Jotam. Si Jotam, iinig bataˈen, si Acas. Si Acas, iinig bataˈen, si Ezequias. ¹⁰ Si Ezequias, iinig bataˈen, si Manases. Si Manases, iinig bataˈen, si Amon. Si Amon, iinig bataˈen, si Josias. ¹¹ Si Josias, iinig bataˈen, si Jeconias sampay su nga pateden, mitaang su kegigetaw nilan tu kenguit tug bansa Israel ditug Babilonia.

¹² Naa kini pelumi gesalan ni Isukristu genat tu kenguit tu getaw Israel ditug Babilonia sampay di kegigetaw na ni Isukristu. Mendadi si Jeconias kia, kaliˈ pegbataˈ, iinig bataˈen, si Salatiel. Si Salatiel, iinig bataˈen, si Sorobabel. ¹³ Si Sorobabel, iinig bataˈen, si Abiud. Si Abiud, iinig bataˈen, si Eliaquim. Si Eliaquim, iinig bataˈen, si Asor. ¹⁴ Si Asor, iinig bataˈen, si Sadoc. Si Sadoc, iinig bataˈen, si Aquim. Si Aquim, iinig bataˈen, si Eliud. ¹⁵ Si Eliud, iinig bataˈen, si Eleasar. Si Eleasar, iinig bataˈen, si Matan. Si Matan, iinig bataˈen, si Jacob. ¹⁶ Si Jacob, kaliˈ pegbataˈ, iin pelum si Jose, su minginsawa dini Maria. Mendadi, kaliˈ pelum pegbataˈ si Maria, kini na tuˈu si Isus, ki gilal Tinduˈ nu Megbebayaˈ Meglekaunutan.

¹⁷ Kaas genat ditu ni Abraham, benaˈ sepuluˈ buˈ paat sumpat, dekag pa migigetaw si David. Dayun genat ditu ni David sampay tu kenguit tu nga getaw Israel ditug Babilonia, sepuluˈ buˈ paat sumpat pa pagid. Genat itu, benaˈ sepuluˈ buˈ paat sumpat na pelum, iin na tuˈu su kegigetaw ni Isukristu, ki Tinduˈ nu Megbebayaˈ Meglekaunutan.

¹⁸ Naa kini si Isukristu, kiniig bian nu kegigetawen. Ki mbaal ginaˈen si Maria, mimbeng diniin ki sala tawan si Jose. Laak dagid su ndaˈ pa pegawid duayan si Jose mukaˈ si Maria, misimaˈ ni Maria puˈ masiˈ pelepuunan na, sabaˈ laak nug Balakat nu Megbebayaˈ. ¹⁹ Naa kini si Jose, mekesuun getaw, kaas delendemanen, subay butasenen sug bembengen dini Maria. Laak pegbuniinen tug launan getaw, adun ndiˈen mpengumpiidan si Maria. ²⁰ Dagid sinegay megdelendem pa si Jose, duun masiˈi sesuguˈen nu Kaunutan Megbebayaˈ getaw langit mituaˈ diniin di teginepenen, kaliˈ pektaluˈ diniin, “Jose, sapuˈa ni David, ndiˈa mekalangalang menginsawa dini Maria. Puˈ kig bedesanen kiin, mikpuun tug Balakat nu Megbebayaˈ. ²¹ Naa megbataˈ tuˈu si Maria, iinig bataˈen, laki. Iini baal niu ngalanen, si Isus, puˈ iini meglegawen tu piglegetawanen di nga salaˈ nilan.”

²² Kaas mipenggulaulaig launanen kini, puˈ adun menuud su pisulat nu Kaunutan Megbebayaˈ tu pimuunanen dengantu ditu Misulat Taluˈen, laung, ²³ “Mendadi, duunig delaga megbedes, dayun megbataˈ, bataˈlaki. Iini baalen ngalanen, si Immanuel” (maˈananen, “Kini su Megbebayaˈ, suminalabuuk na dinita”).

²⁴ Naa si Jose, benaˈ mitanud genat mekteginep, delendemanen diunenen da penginsuaay si Maria, maaˈ dadema nu tinituluˈ diniin nu sesuguˈen nu Kaunutan Megbebayaˈ. Saˈ maˈnia, mikpungun ilan, ²⁵ laak tebiaˈ, ndaˈ pa siben ubayay ni Jose si Maria, sampay da dun migbataˈ. Benaˈ migbataˈ tuˈu si Maria, iin dayuni binaal ni Jose ngalan nu gembataˈ kia, si Isus.