¹ Naa di kesepuluˈ buˈ lima taun nu tampusan gadiˈ nu getaw Roma si Tiberio, iini gubirnadur dig benwa Judea si Poncio Pilato. Su kaunutan tu Galilea, si Herodes. Su kaunutan dig benwa Iturea buˈ Trakonite, si Felipe, ngudan ni Herodes. Su kaunutan dig Abilena, si Lisanias. ² Dakus iin su Tampusan Metaas Belian nu getaw Judea, ilan si Anas mukaˈ si Caifas. Naa mitaang dun kini si Juan, kig bataˈ kiin ni Zacarias, pimuunan nu Megbebayaˈ selianen diag limawaˈ. ³ Mendadi genat itu, lineep ni Juan kig benwa lumibut di tubig Jordan, miktituluˈ tu nga getaw. Kaliˈ pektaluˈ si Juan, “Peksikesuun amu, mukaˈ pekpebunag amu tubig tuˈus dun, adun pedesunen nu Megbebayaˈ ki salaˈ niu.” ⁴ Kaas saˈ migukit si Juan, minuud su sinulat dengantu ditu Misulat Taluˈ nu Megbebayaˈ nu pimuunanen si Isaias, laungen,

⁷ Naa saˈ maˈantu, melaun gupia getaw minangay ditu ni Juan mekpebunag tubig. Laak dagid sug duma, miktaluˈ si Juan dinilan, “Paa, yamu pa di nga mamak! Taˈ taway duni mikpegad diniu, adun sia peleguyan niu ki ginukuman nu Megbebayaˈ sungu mateng? ⁸ Subay menggulaula amu gempia, ki mbantang di nga getaw miksikesuun, damikian duni gayu megbunga melengas. Mukaˈ ndiˈ amu pektaluˈ dig dialem ginaa niu puˈ mipemilang namu nu Megbebayaˈ mekesuun puun di kesapuˈ niu dini Abraham. Puˈ taman taluˈu diniu, pia ki ngag batu dinig lupaˈ kini, mesuˈat dadema beluyay nu Megbebayaˈ nga sapuˈ ni Abraham! ⁹ Dagid nandaw, minuyaˈ na sug wasay, dia na tuˈu puun nu gayu. Kaas adini gayu ndiˈ megbunga gempia, penegaˈen nu Megbebayaˈ, dayun piglakay tu gapuy.”

¹⁰ Benaˈ midengeg nu nga melaun getaw ki tinaluˈ ni Juan, sinaak nilan diniin, “Saˈ maˈantu, taˈ alandun maig baalen nami?”

¹¹ Kaliˈ sembag si Juan, “Naa maˈniniˈ. Adini getaw duaˈ buuki suuben, subay begayen su salabuuk ditu ndaˈidunig daniin. Adin pelumig duuni gaanen, maˈantu dadema.”

¹² Naa duun pagidi nga mendawat buis minangay dadema ditu ni Juan mekpebunag diniin tubig. Kaliˈ ilan saak, “Naa Sir, yami pelum, taˈ mai pegbetaden nami?”

¹³ Kaliˈ sembag si Juan, “Iin na laaki pebuis niu tu nga getaw, su gikteb tinduˈ diniu.”

¹⁴ Naa duun pai nga sundalu, laung nilan pelum, “Yami, taˈ mai baalen nami?”

Kaliˈ sembag, “Naa ndiˈ na niu limbungayi getaw pebian di pendeg atawaka galeg. Adin su gikteb nu tindan diniu, iin dai sanguˈ niu.”

¹⁵ Saˈ maˈantu, migisegi kegdedama nu nga getaw, sinaak nilan dig delendeman nilan saˈ si Juan kini, mabuˈ iin na tuˈu su pedetengen nilan Tinduˈ nu Megbebayaˈ Meglekaunutan. ¹⁶ Dagid miktaluˈ si Juan dinilan, “Baa, naan kini, megbunagu laak tubig diniu. Dagid duuni sungu metuaˈ, metaas pai ginuungen batul danaan. Pia su sepatusen, kanaˈu mbantang megubad dun diniin. Iin, bunagen diniu kig Balakat nu Megbebayaˈ mukaˈ gapuy. ¹⁷ Iin, minuyaˈ na mekpalid di ginani. Saˈ metubus mekpalid, pungunenen su trigo, teguˈenen dayun tug lulunen. Laak dagid su gepis mukaˈ gebas, sensulanen tu gapuy ndiˈ na mpaleng.”

¹⁸ Naa melaun pa paduni tituluˈan ni Juan tu nga getaw selianen megukit dinilan Gempia Petenday. ¹⁹ Dagid su kaunutan dia si Herodes, pigbeluˈan ni Juan, puˈ duunig libun, ngalanen si Herodias, inagaw ni Herodes, asa sawa nu pateden. Mukaˈ melaun pai melaat gulaula ni Herodes, pigbeluˈan dadema dun ni Juan iin. ²⁰ Kaas deksuˈanen, sala paig dugang ni Herodes ditu melaat pinggulaulanen, pipirisunen si Juan.

²¹ Laak su saanan pa ni Juan megukit tu kelaun getaw, pimbunaganen ilan tubig. Mendadi si Isus, mikpebunag dadema dini Juan tubig. Benaˈ mitubus bunagay tubig si Isus, kaliˈ penenabi, mipukaˈ sug langit. ²² Dayun sug Balakat nu Megbebayaˈ, kuminilawan, miglanguban di maˈniin palas limuun, luminusad dini Isus. Duun dayuni miktaluˈ ditug langit, laungen, “Yaˈai petailen ku Bataˈu, leliagenu gupia diniˈa.”

²³ Naa su kekpuun ni Isukristu tu kengimbaalen, minayan na saani telu puluˈi taunen. Mendadi, kinii gesalan ni Isus. Laung dun nu nga getaw, iini gamaˈen, si Jose kiin. Si Jose pelum, iini gamaˈen si Heli. ²⁴ Si Heli, iini gamaˈen si Matat. Si Matat, iini gamaˈen si Levi. Si Levi, iini gamaˈen si Melqui. Si Melqui, iini gamaˈen si Jana. Si Jana, iini gamaˈen su sala Jose. ²⁵ Si Jose, iini gamaˈen si Matatias. Si Matatias, iini gamaˈen si Amos. Si Amos, iini gamaˈen si Nahum. Si Nahum, iini gamaˈen si Esli. Si Esli, iini gamaˈen si Nagai. ²⁶ Si Nagai, iini gamaˈen si Maat. Si Maat, iini gamaˈen si Matatias. Si Matatias, iini gamaˈen si Semei. Si Semei, iini gamaˈen si Jose. Si Jose, iini gamaˈen si Juda. ²⁷ Si Juda, iini gamaˈen si Joan. Si Joan, iini gamaˈen si Resa. Si Resa, iini gamaˈen si Sorobabel. Si Sorobabel, iini gamaˈen si Salatiel. Si Salatiel, iini gamaˈen si Neri. ²⁸ Si Neri, iini gamaˈen si Melqui. Si Melqui, iini gamaˈen si Adi. Si Adi, iini gamaˈen si Cosam. Si Cosam, iini gamaˈen si Elmodam. Si Elmodam, iini gamaˈen si Er. ²⁹ Si Er, iini gamaˈen si Josue. Si Josue, iini gamaˈen si Eliezer. Si Eliezer, iini gamaˈen si Jorim. Si Jorim, iini gamaˈen si Matat. Si Matat, iini gamaˈen si Levi. ³⁰ Si Levi, iini gamaˈen si Simeon. Si Simeon, iini gamaˈen si Juda. Si Juda, iini gamaˈen su sala Jose pelum. Si Jose, iini gamaˈen si Jonan. Si Jonan, iini gamaˈen si Eliakim. ³¹ Si Eliakim, iini gamaˈen si Melea. Si Melea, iini gamaˈen si Mainan. Si Mainan, iini gamaˈen si Matata. Si Matata, iini gamaˈen si Natan. Si Natan, iin pelumi gamaˈen si David. ³² Si David, iini gamaˈen si Isai. Si Isai, iini gamaˈen si Obed. Si Obed, iini gamaˈen si Boos. Si Boos, iini gamaˈen si Salmon. Si Salmon, iini gamaˈen si Naason. ³³ Si Naason, iini gamaˈen si Aminadab. Si Aminadab, iini gamaˈen si Admin. Si Admin, iini gamaˈen si Arni. Si Arni, iini gamaˈen si Hezron. Si Hezron, iini gamaˈen si Fares. Si Fares, iini gamaˈen si Juda. ³⁴ Si Juda, iini gamaˈen si Jacob. Si Jacob, iini gamaˈen si Isaac. Si Isaac, iin pelumi gamaˈen si Abraham. Si Abraham, iini gamaˈen si Tare. Si Tare, iini gamaˈen si Nahor. ³⁵ Si Nahor, iini gamaˈen si Serug. Si Serug, iini gamaˈen si Ragau. Si Ragau, iini gamaˈen si Peleg. Si Peleg, iini gamaˈen si Eber. Si Eber, iini gamaˈen si Sala. ³⁶ Si Sala, iini gamaˈen si Cainan. Si Cainan, iini gamaˈen si Arfaxad. Si Arfaxad, iini gamaˈen si Sem. Si Sem, iin pelumi gamaˈen si Noe. Si Noe, iini gamaˈen si Lamec. ³⁷ Si Lamec, iini gamaˈen si Matusela. Si Matusela, iini gamaˈen si Enoc. Si Enoc, iini gamaˈen si Jared. Si Jared, iini gamaˈen si Mahalaleel. Si Mahalaleel, iini gamaˈen si Cainan. ³⁸ Si Cainan, iini gamaˈen si Enos. Si Enos, iini gamaˈen si Set. Si Set, iin na pelumi gamaˈen, naa si Adan. Mukaˈ si Adan pelum, iin na gupiai gamaˈen, su Megbebayaˈ. Kinii gesalan ni Isus.